2 Timoteo 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Nzago nazijile

¹ Ĩpa ulĩnge ulukaani ulu, ya kĩna pantondo za mpelo mikitũla matũngo ma nzago.

² Kuitĩ ĩantu ikitũla akola kĩloogua ĩeene, akola kuloogua mpiia, akola kĩkũmuukia, akola lukeemo, akola kutukana nasika akulilie ĩaleli aao, naagila kasongela, nasika amoopokile kaNzua,

³ nasika aaloilue ĩĩa, nasika agombile kwikamantanigua, naaloe uteketi wa usingisĩĩlia, nasika akĩgilagiaa, ataki asuukĩlua namaaza,

⁴ asakia, agaali, akola kĩkentula, naaloe ĩmamona kwikĩla kukumuloogua uNzua,

⁵ akola kĩtenda zĩ akulia Nzua ĩpa ingũlũ zaakue akuzishiitaa. Wĩnege nĩaasio.

⁶ Kuitĩ muaasio akoolĩ naakĩingĩlagiaa munumba za antu, nukukuaguĩla ĩakĩĩma naanaulu naaneketũ naijulue nĩmĩlandu, naalũtĩĩligua ninshula ningĩ,

⁷ naĩkĩmania upiupii, sika naasũũma kainiino kuupikĩĩla uumani wa tai.

⁸ Kĩna ũYane nuYambele naalĩ akĩkunguma nuMusa, iio-iioo nĩndĩĩa akĩkungumaa nĩtai; ingĩ antu naoononekile ĩmasala maao, naasiitilue kumpola za usuĩĩli.

⁹ Ĩpa sika ĩkakĩongeela nangũlũ, kuitĩ uulu waao ukakigyelela kualiĩ ntongela ya antu tũlũ ensi, kĩna iio nuwa aasio naalĩ wigyelĩĩle kualiĩ.

Ukendegeelua nauuza wa kĩTimoteo

¹⁰ Ĩpa ue watiatile uumanigua waane nulugendo luane, nuusiu wane, nuusuĩĩli waane, nuupolo, nuuloogua nuugigimĩlia;

¹¹ sunga mpatĩ nuwaagi waane naalĩ ndigilie uko kuAntiokia niIkonia nĩLisitĩla. Mpatĩ zensi naalĩ ngigimĩĩlie; nduyo ũShekulu nungũna muzensi.

¹² eeze, tũlũ ensi naasiiile kukumukulia uNzua mwa kĩKilisito Yesu ikiligia mpatĩ.

¹³ ĩAbĩĩ gua, nĩapembeelia ikilongoleka kwitũla abĩĩ, ĩakualimĩĩlia ĩantu sunga kwilimĩĩligua ĩeene.

¹⁴ Ĩpa ue, wĩĩme muzaasio naalumumanigue nukwikamĩnkĩĩligua, kunsooko umanile kĩna aani ĩaasio naalĩ wĩmanilie kumiao,

¹⁵ kangĩ kĩna kwipũna ung'inia uumanile uWandĩkua naweelu nausũũmile kukukulĩngia ue ugũnue kunzĩla ya usuĩĩli nawĩĩlĩ mwa kĩKilisito Yesu.

¹⁶ uWaandĩkua wensi usũũpĩlue nuNzua, wijĩpĩĩle kuumanigua, nukukuasugula ĩantu uutimu waao, nukukuatongeela, nukukualanga mukulukuuluu,

¹⁷ koona muntu wa kĩNzua watũle mukamũ, mukamĩnkĩĩligue kuutendi wensi nauuza.