2 Timoteo 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Iio gua, ue muanuane, utũle mukamatĩkũ muukende nawĩĩlĩ mwa kĩKilisito Yesu.

² Nĩzaasio naaluziigilie kumuane ntongela ya akuĩili iingĩ, uziĩĩke kumiao naasuĩĩli naikishũũma kukuamania nĩnaĩngĩ gaa.

³ Sangĩla injago palumuĩ nineene zĩ mwĩlaasi namuuza nwa kĩKilisito Yesu.

⁴ Kutilĩ nukĩtumaa umulĩmo wa wĩlaasi nukĩĩĩka muwĩnzi wa muna nsĩĩ, koona wamuloeelie naalumuandĩkile wĩĩ mwĩlaasi.

⁵ Sunga wensi kanga wakamantane muwĩtiganĩĩli wa mĩsĩgo, sikukupeegaguaa ĩngala isiititũla watiate ĩmalagĩĩlio.

⁶ Yumũjĩpĩĩle umulĩmi mukola nzago za mulĩmo, watũle wa kuandia kũtomola.

⁷ Zishĩĩgĩkie izi nanitambula, kuitĩ ũShekulu ukakukupeela ulĩngi mumpola tũlũ.

⁸ Mwijuke ũYesu Kilisito naalĩ mũiukigue kwipũna muakiu; nwa luuli lwa kĩDaudi, kwilika lya Mpola naNziiza nantanantilie.

⁹ Kunsooko yaakue niaagigua sunga kwitũngua zĩ mutimuli, ĩpa ulukaani lwa kĩNzua sika lukutũngaguaa.

¹⁰ Iio gua, nagigimĩlia tũlũ kunsooko ya antu naeelu naasaagulue, ĩo ndĩo aligie uugũnua nawĩĩlĩ mwa kĩKilisito Yesu Palumuĩ nuukulu wakalĩ nakalĩ.

¹¹ Ingĩ lukaani lwa kusuĩĩlua, “Kanga kukie palumuĩ nduyo, kukitũla apanga palumuĩ nduyo gaa;

¹² Kanga kugigimĩlie, kukitema palumuĩ nduyo gaa; Kanga kumukaane uyo, uyo nduyo ukakukukaana ishie;

¹³ Kanga ishie kulekitũla usuĩĩli, uyo ũkyalile wa usuĩĩli, Kuitĩ sikusĩuũmile kukĩkaana umuene.”

Usuguli wa kĩsugansuga ninkungumi

¹⁴ Uijukĩlie izi, ĩukisugula pa kĩShekulu, alekitũla ninkungumi za nkaani nangila kansaĩlo, ĩpa zukoonoonaa ĩategeeli.

¹⁵ Ĩkamatĩkie kukigyelela kĩna umugombigue nuNzua, munamulĩmo nasika wa kukoligua kansoni, ĩukulutumĩla kĩĩsa ulukaani lwa tai.

¹⁶ Ĩnege ĩmakaani namagila kandogolelio, nasika ma awĩtekeli wa tai; kuitĩ ikilongoleka nangũlũ kukumuleka uNzua,

¹⁷ nulukaani luao lukitũlitaluka zĩ kyonko. Muaasio ingĩ Himenayo nuFileto,

¹⁸ naalĩ alekile ĩtai, naiũga ya kĩna uwiiuki wakondile kwiiiza, ndĩo naaugomola uusuĩĩli wa antu naĩngĩ.

¹⁹ Ĩpa itĩ umukũlĩla namukamũ nwa kĩNzua wĩĩmĩkile, nautĩĩte umuntozo uu, “ũShekulu uamanile ĩaakue;” kangĩ, “Wensi nukuliĩta iliina lya kĩShekulu wauleke uubĩĩ.”

²⁰ Mwijumba nikyulu sika ikoolĩ isheme ya zahabũ nimpiia udũũ, ĩpa ikoolĩ niya makota niya ulongo, nayĩngĩ itĩĩte kyulio, nĩnayĩngĩ igila kikyulio.

²¹ Luulo gua, kanga wensi wĩeelie kunzĩla ya kĩnega nĩaasio, ukitũla kĩseme kya kuligia ikyulio, nakieligue, nakyumũjĩpĩĩle ũshekulu, kĩzĩpĩĩligue kumulĩmo wensi namuuza.

²² Uzitalame inshula za usumbatĩ; ĩwĩtiata ĩkulukuuluu, nuusuĩĩli, nuuloogua, nĩmatiliga, palumuĩ nĩaasio naakumuĩtaa ũShekulu kunkolo nanzelu.

²³ Ĩpa umasiite ĩmakolio ĩma ulu namagila kamasala, umane ya kĩna makutũga uwĩleei.

²⁴ Kangĩ sika yumũjĩpĩĩle umwĩtumi kwitũla mwĩleei, ĩpa wĩĩ mupolo kuantu tũlũ, nusũũmile kwimania, mugigimĩlia kuabĩĩ,

²⁵ ĩukuasugula kuupolo naĩkĩkunguma nduyo, koona na yasũũmĩka uNzua waapeele kwipela nukwimana ĩtai,

²⁶ sunga alege mumutego wa kĩShetani, pĩna alĩ aguĩlue nduyo sunga kwitenda uulooa waakue.