2 Timoteo 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia nuusongelia

¹ Paulo, mutumua wa kĩKilisito Yesu kuulooa wa kĩNzua; kunsooko ilyago lya upanga naukoolĩ mwa kĩKilisito Yesu;

² nakuandĩkĩla ue Timoteo muanuane muloogua. uUkende wĩĩ kumuako, nĩkĩnishungu nĩmatiliga namapũnile kwa kĩNzua Tata nukwa kĩKilisito Yesu Shekulu wĩĩtu.

³ Namusongelia uNzua nanukumutekelaa kwipũna intondo za atata aane, kumoo namuelu, pĩna iio nanukukũjukaa ue intondo tũlũ muulompi waane utiku nĩmunsĩ.

⁴ Pĩna nijukile ĩmisholi yaako, ntĩĩte nsula dũũ ya kukuona koona nijulue nulumbi.

⁵ Kangĩ nijukile impola za usuĩĩli waako naugila kaunamampĩlu, naalĩ ukoolĩ tangua mwa kĩmaama waako uLoisi, numwa kĩmaau waako uEuniki; manile tai ya kĩna ukoolĩ numumuako gaa.

Usuguli wa kukiakilia ĩkĩpeegua kya kĩNzua nukukĩkamatĩkia

⁶ Kunsooko ĩĩ nakũjukĩlia ukiakĩlie ĩkĩpeegua kya kĩNzua naalukikianũnkuĩle munsĩ yaako kuuĩĩkĩlua wa mĩkono yaane;

⁷ kuitĩ uNzua sikukupĩĩle ishie ĩnkolo ya ooa, ĩpa ukukupeelaa ĩnkolo ya ngũlũ nuuloogua nukukĩtema.

⁸ Luulo gua, uleke kuukolelua inshooni uukuĩli wa kumukuĩla ũshekulu wĩĩtu, katia kunsooko yaane nanumu tũngua waakue; ĩpa kamantana munzago kunsooko ya Mpola na Nziiza, kwilika lya ngũlũ za kĩNzua.

⁹ Uyo alukugũnile nukukuĩta kuwĩĩtua naweelu, sika kwilika lya utendi wĩĩtu, ĩpa kwilika lishiio liakue umuene nuukende waakue, nalĩ kuapeegue ishie mwa kĩKilisito Yesu kwipũna ĩkalĩ,

¹⁰ ĩpa itĩ intondo izi yakũnukuĩlue kunzĩla ya wigyeleli wa Mugũni wĩĩtu Kilisito Yesu naaluuleegilie uukiu, nuũgyelelia muweelu uupanga nuusiitioononeka, kunzĩla ya Mpola na Nziiza.

¹¹ Kunsooko ya Mpola na Nziiza izi nambĩĩkua ntũle mutanantia numutumua, kangĩ mumania.

¹² Kunsooko ĩĩ niligia uwaagigua uu, sunga sika nikolua kansoni, kuitĩ numumanile uyo nanumusuĩlile kangĩ ntite ishanio ya kina uzo usumile kukumĩlindĩĩla ĩmbĩĩka yaane nanĩmĩĩĩkile kumuakue sunga kuLutondo luulo.

¹³ iNkaani za kapanga naaluziigilie kumuane, uziambĩkie muusuĩĩli numuuloogua nawĩĩlĩ mwa kĩKilisito Yesu.

¹⁴ Ĩmbĩĩka nanziiza naalĩ mbĩĩkue kumuako, umĩlindĩĩle kunzĩla ya kĩMuau Muelu nukikyalaa munsĩ yĩĩtu.

¹⁵ Uzimanile impola izi, ya kĩna tũlũ naĩĩlĩ muAsia andekile; mumaũmbi maao ukoolĩ Figelo nuHelimogene.

¹⁶ ũShekulu waakolelue kĩnishungu ĩaasio naa munumba ya kĩOnesifolo; kuitĩ nkua ningĩ alukumpolelagiaa nkolo, sunga sika alumakolĩĩlue kansoni ĩmatendele maane;

¹⁷ ĩpa pĩna nupika kuLumĩ, nundũũmĩkia sunga nundigia.

¹⁸ ũShekulu nwamupeele kwiona ĩkĩnishungu kwa kĩShekulu paLutondo luasio. Nĩkĩna alĩ wĩtumĩĩle kuEfeso, ue umanikilie.