2 Petelo 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Lutondo lwa kushooka kumuakue uKilisito

¹ Aloogua, ĩĩ yaĩ mbalua ya kabĩlĩ nanukumuandĩkĩĩla; muzaasio nazibĩlĩ nalaĩlia ĩmasĩĩgo maani namaaza kukumũjukia,

² muzijuke inkaani naalĩ ntambulue ĩkalĩ nĩanakĩdagu naeelu, nilyagĩĩlio ĩlya kĩShekulu nuMugũni naalilyeetue nĩatumua aani.

³ Mumane tangua ulukaani ulu, ya kĩna pantondo za mpelo ijiliiiza nĩmapana maao, aao ĩakola kumela, naatiatile inshula zaao ĩeene,

⁴ ĩiũga, “Liĩlĩ mpĩĩ ilyago liasio ĩlya kuuza kumuakue? Kuitĩ kwipũna paapo iishekulu ĩĩtu pĩna agonĩĩle intu tũlũ ikyalile iio-iioo kwipũna iyuukĩ lya uutũndua.”

⁵ Ndĩo naĩitĩ naasiitile kwigomba ulukaani ulu, ya kĩna alĩ lĩkoolĩ gyulu kwipũna ĩkalĩ, nĩnsĩĩ gaa alĩ mumbue kwipũna mumaazĩ nukunzĩla ya maazĩ kulukaani lwa kĩNzua.

⁶ Kunzĩla ya maayo, uunkũmbigyulu wa ntondo zaasio naukapĩligua nĩmaazĩ, naoonoonua.

⁷ Ĩpa igyulu lya nzuauu nĩnsĩĩ mbĩĩkue kĩuto kumooto kulukaani lulo-luuloo, mbĩĩkue sunga kulutondo lwa ulamulua nulwa koonoonua kumuao ĩantu nasika akumukulagiaa uNzua.

⁸ Ĩpa aloogua, mulekiĩĩwa ulukaani ulu nalumuĩ, ya kĩna kwa kĩShekulu lutondo lumuĩ zĩ miaka gyana lya nzogũ, nĩmiaka gyana lya nzogũ zĩ lutondo lumuĩ.

⁹ ũShekulu sikutinilie kwitimĩĩlia ilyago liakue, kĩna naĩngĩ naakuũga watinia. Ĩpa ukugigimĩlagiaa kumuani, sika muloe tũlũ wensi walimĩĩle, ĩpa tũlũ ensi apikĩĩle uupeli.

¹⁰ Ĩpa ulutondo lwa kĩShekulu lukiiza zĩ mũii; palutondo luasio paapo igyulu likilega kumulugũzo mukulu niyaasio naalĩ iumbue kwipũna iyuukĩ ikitaulua nukwishonsua namooto, nĩnsĩĩ nĩmĩlĩmo nĩkoolĩ munsĩ yaakue ikijigĩligua.

Muna ijĩpĩĩle kukĩkamatĩkia

¹¹ Iio gua, kunsooko iintu tũlũ ĩkĩnekentuka itĩ, yumũjĩpĩĩle inie muĩ antu kĩ mulugendo naluelu nukukumukulia uNzua,

¹² pĩna mwilaaĩĩla sunga luĩze ulutondo luasio ulwa kĩNzua, nukukulukangasĩĩlia. Ĩpaasio paapo igyulu likitaulua nukwishonsua, niiumbe iyuukĩ ikijigĩligua nukwinekentuka!

¹³ Ĩpa gua, kunsooko ilago liakue, kulaaĩlĩĩle igyulu nĩpia nĩnsĩĩ nampia, muna ĩkulukuuluu ikikyalaa.

¹⁴ Luulo gua aloogua, kunsooko mulaaĩlĩĩle ĩzaasio, ĩkamatĩkiĩ koona mwigyelele kĩna muagila kakĩlema sunga kibyado ntongela yaakue mumatiliga.

¹⁵ Inie muusĩĩgĩle uugigimĩlia wa kĩShekulu wĩĩtu kĩna ĩngi ugũnua. Iio-iioo umunũna wĩĩtu muloogua uPaulo naalumuandĩkile kumasala naalĩ mupeegue,

¹⁶ kĩna mumbalua zaakue tũlũ, nwipũnia inkaani za mpola izi. Mumbalua zaasio zikoolĩ impola nzia nkakũ kukuzilĩnga; nĩndĩo nasika amanigue, kangĩ nasika akamatĩkũ akuzipĩlulaa kĩna iio naakuupĩlulaa uwandĩkua nawĩngĩ kuoononeki waao ĩeene.

¹⁷ Luulo gua aloogua, na mwakondia kwimana izi, ĩsukukĩ mulekikenkeeligua nuulimĩĩli wa aasio naaleki, mugue nukwileka uukamũ waani.

¹⁸ Ĩpa mukule muukende nukukumumana ũShekulu nuMugũni wĩĩtu Yesu Kilisito. Ukulu wĩĩ kumuakue ĩpaino sunga kulutondo lwa kalĩ nakalĩ. Amini.