2 Petelo 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Anakĩdagu a ulongo nulugendo lwa oononeki

¹ Ĩpa naigyelela anakĩdagu a ulongo pakatĩ ya antu, kĩna iio kunsiani naikitũla amania a ulongo naikiingĩlia kukĩmpisĩ-mpisĩ uumanigua wa kulimĩĩlia, ĩakumukaana sunga ũShekulu naalĩ waakomuĩle, ĩakĩleetela uoonooneki kuukaaũ.

² Nĩnaiingĩ ikitiata uusambo waao, nukunsooko yao ĩnzĩla ya tai ikitukua.

³ Numukĩaya ĩkakĩligĩlia nsaĩlo kumiani kunkaani naalĩ ntungue, nuulamulua waao kwipũna ĩkalĩ sika utinilie, sunga uoononeki waao sika witindila.

⁴ Kuitĩ malĩĩ uNzua sika alĩ waalekile ĩamalaĩka naalĩ atimuĩle, ĩpa alĩ waagumĩĩle kuulungu, naatũngua nĩmatendele ma kiiti, alindĩĩlue muumo sunga uulamulua uuze;

⁵ kangĩ malĩĩ sika aluulekile uunkũmbigyulu wa kalĩ, ĩpa numukendegeela uNoe, umutanantia wa kulukuuluu, nĩantu naĩngĩ mupũngatĩ, paasio pĩna aluleetile uUkapĩli wa maazĩ muna unkũmbigyulu wa antu nasika alĩ amukulilie uNzua.

⁶ kangĩ malĩĩ aluzilamuĩle ikaa za Sodomũ nĩGomola zikaasigue, kukuzigalula nukukuzitenda zitũle maũ nwitenda izo zĩĩ kĩlingasĩĩlio kuantu nasika ĩkakumukulia uNzua pembele;

⁷ kangĩ numugũna uLoti, umunakulukuuluu, naaluoonie usungu kunsooko ya lugendo lwa oononeki lwa antu naabĩĩ; (

⁸ kuitĩ uyo munakulukuulu, pĩna nwikyala pamuao kwiona nukwiiigia, nuagigua munkolo yaakue nya kulukuuluu lutondo kulutondo, kunsooko ya utendi waao naugila kilyagĩĩlio),

⁹ iio gua, ũShekulu umanile kukuagũna mumagemua ĩaasio naakumukulagiaa, nukukuaĩĩka naagila ĩkulukuuluu akaasigue sunga palutondo ulwa ulamulua,

¹⁰ naikulu nangũlũ ĩaasio naakutiataa ya kĩmuĩlĩ, naakugendela munsula za udobũ, nukwimela uusũũmi wa utemi. ĩAasio naagila kaooa kangĩ akakũ, sika akukĩkĩmaa pĩna akuatuka naatĩĩte uukulu.

¹¹ Ĩpa sunga ĩamalaĩka naakĩlile muusũũmi ningũlũ, sika akupũnagiaa uusokia wa utukĩlani kumiao ntongela ya kĩShekulu.

¹² Ĩpa ĩaasio ĩkĩna mĩtũgo nangila kamasala. naalĩ ndelue zĩ iyumbe udũũ za kuguĩlua nukwiulagua, naakĩtuka mumpola nasika azilĩngile, sunga muononeki waao ikioonoonua,

¹³ ĩiaanũnkula uualaalĩki wa uleki waao. Naasĩĩgile ya kĩna ulugaalo ĩmunsĩ ingĩ wĩloeelia. Ĩa ingĩ mabado ninshoni naatiatile uwĩsũgamĩĩlia waao wa kĩsuakĩĩa, pĩna ijĩpia uwĩsũgamĩĩlia palumuĩ niniinie.

¹⁴ ĩMiiso maao namijuile uusambo, antu nasika alekile kwitenda ĩmĩlandu. Naapuutia ĩaasio naatĩĩte inkolo za uneketũ. Naatĩĩte inkolo nazukumanaa mpola zensi za kĩaya; aana ijũmo,

¹⁵ naalĩ amĩlekile ĩnzĩla nangolokũ, naalimĩĩla, naamĩamba ĩnzĩla ya kĩBalamũ, muana wa kĩBeoli naalĩ muloe ĩkĩpeegua kya uleki.

¹⁶ Ĩpa alĩ musugulue kunsooko ya utimu waakue umuene; ndoguĩ nasika ĩsũũmile kwilikitia nĩtambula kululi lwa kĩuntu, nĩgilia uuputigua masala wa munakĩdagu nuasio.

¹⁷ Ĩa ingĩ njiĩlio nangila kamaazĩ; malũnde namakenkue nukĩlaũmbĩ; uwiilu wa kiiti ingĩ kĩuto naaĩĩkĩligue.

¹⁸ Naitambula ĩmakaani namakulu ĩma ulu nuwĩnansulĩkia, munsula za muĩlĩ za usambo naakuapuutia ĩaasio naandagiaa kukuatalama ĩo naikyalile muulimĩĩli.

¹⁹ Naapũnĩlia ĩmalago ma ukomolua nĩndĩo ĩeene asese a oononeki. Kuitĩ nazukumudulaa umuntu, uzo ukutũla musese wa zaasio.

²⁰ Kuitĩ ĩaasio naalĩ atalamile uudobũ wa unkũmbigyulu kunzĩla ya kumumana ũShekulu nuMugũni wĩĩtu Yesu Kilisito, paapo kanga aguĩligue kangĩ nukwidulua, uwikyaalĩ waao wa mpelo witũla ubĩĩ kwikĩla uwaasio wa muandio.

²¹ Kuitĩ aza ijilitũla iiza nangũlũ kumiao kanga ĩsika alĩ amĩmanile ĩnzĩla ya kulukuuluu, kwikĩla kukumĩmana, pembele alĩleke ilyagĩĩlio nalielu naalĩ apeegue.

²² Ĩpa igyelela kumiao kwilika lya ung'enua wa tai, “ĩMbua yĩshookĩĩle ĩmalukiu maakue ĩnene, nĩngũlũma naalĩ nzogigue ĩshookĩĩle kwigala-gala mumalolo.”