2 Petelo 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia

¹ Simoni Petelo, mwĩtumi, numutumua wa kĩYesu Kilisito, namuandĩkĩla inie naalĩ muligilie uusuĩĩli umuĩ nindiishie, nawa ngele nkakũ, mukulukuuluu ya kĩNzua wĩĩtu nuMugũni Yesu Kilisito.

² uUkende nawongeeligue kumiani nĩmatiliga kukumulĩnga uNzua nũYesu Shekulu wĩĩtu.

Upeegua a kĩKilisito numuna ijĩpĩĩle kwigendela

³ iNgũlũ zaakue, ĩza kĩNzua, zakupĩĩle intu tũlũ naijĩpĩĩle uupanga nukukumutekela uNzua, kunzĩla ya kumulĩnga uyo naalukuĩtile kuukulu waakue nuuuza waakue umuene.

⁴ Kangĩ kuizi wakupĩĩle ĩmalago namakulu nkankanaa, nama ngele nkakũ, koona kuaya mutũle akamantani a upanga wa kĩNzua muene, mugũnue nuoononeki naukoolĩ muna unkũmbigyulu kunsooko ya nsula nambĩĩ.

⁵ Kunsooko yoĩ-yooĩĩ mwĩkakie muusuĩĩli waani mupeegue uuuza, nuuuza nduo umupeele uulĩngi,

⁶ nuulĩngi umupeele kukĩtema uniinie, nukukĩtema yumupeele uugigimĩlia, nuugigimĩlia umupeele kukumukulia uNzua,

⁷ nukukumukulia uNzua wĩloogua wa kĩnũna, nuwĩloogua wa kĩnũna uuloogua weene.

⁸ Kuitĩ impola zaasio nazikoolĩ mumiani nukukijula ndee, zukumutenda inie mulekitũla akata, sunga sika antu naagila kankali kukumulĩnga ũShekulu wĩĩtu Yesu Kilisito.

⁹ Kuitĩ wensi namugila izi ingĩ mupokũ nasikusũũmile kwiona kĩĩsa, wĩĩaguaa ya kĩna alĩ moogigue ĩmĩlandu yaakue nya kalĩ.

¹⁰ Luulo gua, anũna aane, ĩkamatĩkiĩ kwikamĩnkĩĩlia uwĩĩtua waani nuusaagulua waani; kuitĩ kanga mutende iio, sika mukĩkũmpia kainiino.

¹¹ Kuitĩ yaasio mukipeegua kwiingĩla nangũlũ muutemi wa kalĩ nakalĩ wa kĩShekulu nuMugũni wĩĩtu Yesu Kilisito.

Usũgamĩĩli wa nkia ya kĩPetelo

¹² Luulo gua, sika nikileka kukumujukia ĩzaasio intondo tũlũ, kanga ĩmuzimanile nakĩĩ nukwikamĩnkĩĩligua mutai namutĩte.

¹³ Nineene moonie iiza, ityũngo pĩna nkoolĩ mumuĩlĩ uu, kukumutenula nukukumwijukia;

¹⁴ Kuitĩ manile kĩna kwilega mumuĩlĩ waane ipolokile kuukaaũ, kĩna ũShekulu wĩĩtu Yesu Kilisito alundagĩlĩĩle.

¹⁵ Ĩpa nĩkakĩkamatĩkia koona pĩna nasaama muna nsĩĩ, musũũme kukijuka matũngo mensi impola izi.

Ukuĩli wa kĩPetelo nuwa anakĩdagu

¹⁶ Kuitĩ sika alĩ kutiatile inshimu naalĩ ntungue kuusugũ pĩna alĩ kumuĩĩlĩĩle inie impola za ngũlũ za kĩShekulu wĩĩtu Yesu Kilisito nukwiiiza kumuakue, ĩpa alĩ kuuoonie ishie namiiso mĩĩtu uukulu waakue.

¹⁷ Kuitĩ alĩ mupeegue nuNzua Tata lukũmo nuukulu pĩna alĩ muleetelue ululi nalupũnile muukulu naukĩlĩkĩlĩĩle, “Uyu wayu Muana waane muloogua, nanumuloeeligue ninduyo.”

¹⁸ Nululi luasio ishie alĩ kulũgyũũlie kwipũna kwigyulu pĩna alĩ kwĩensi ninduyo munkoko nanzelu.

¹⁹ Kangĩ kutĩĩte ulukaani ulwa unakĩdagu nalukamũ nangũlũ. Mukitenda iiza kanga mulukendegeele zĩ ntala imĩlĩka mukiiti sunga pĩna ikiyeeleela, nĩnsonda nya daau ĩkakigyelela munkolo zaani.

²⁰ Ulu ninduulu mulĩnge tangua, ya kĩna ukutilĩ uunakĩdagu muwandĩkua, nausũũmile kwilondoosigua kukĩuntu udũũ.

²¹ Kuitĩ ukutilĩ kaunakĩdagu naupũnile kuulooa wa kĩuntu, ĩpa antu alĩ akutambula zazi ĩza kĩNzua pĩna alĩ atongeelue nuMuau Muelu.