2 Akolinto 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Iio gua aloogua, kunsooko kutĩĩte ĩmalago aya, kwĩeelie kwipũna muudobũ wensi wa muĩlĩ nĩnkolo; ĩkwikamĩnkĩĩlia uweeligua muooa wa kĩNzua.

Nkankani, nuupumbuligua kuuuzi wa kĩTito

² Kuligiliĩ ĩlioma munkolo zaani. Ukutilĩ naalĩ kumutimuĩlie; ukutilĩ naalĩ kumupembelĩĩlie.

³ Sika nitambula izi itĩ numulamule inie kĩna muatimu. Kuitĩ alĩ ntambuĩle kumuandio ya kĩna mukoolĩ munkolo zĩĩtu, kukie palumuĩ sunga kuĩ apanga palumuĩ.

⁴ Nitambula kualiĩ kumuani, ntĩĩte ningĩ kumiani ĩza kĩkũmuzukĩilia; nkamigue nkolo. Nalumbĩkia munzago zĩĩtu tũlũ.

⁵ Kuitĩ pĩna nakupika kuMakedonia, ĩmiĩlĩ yĩĩtu sika nĩsũũma kwishũũpia alĩ kunsooko ya nzago naalĩ kuligilie tũlũ pensi; kunzi alĩ ukoolĩ wĩkui, munsĩ ooa.

⁶ Ĩpa uNzua nukuapumbulagiaa naalemue nukupumbulia ishie pĩna nuuza ũTito;

⁷ sika kunsooko ya kuuza kumuakue udũũ, ĩpa nukuupumbuligua waasio gaa naalĩ mupumbuligue kumiani, pĩna nukuganuĩla ishie impola za nsula yaani nuusungu waani nuukamatĩkũ waani kunsooko yaane, sunga nanumbĩkia.

⁸ Nineene malĩĩ namuleetĩĩle usungu kumbalua niasio, (sika nĩsokilie, ĩpa kanga alĩ nĩsokilie,) alĩ moonie ya kĩna ĩmbalua niasio yumupĩĩle usungu kwityũngo udũũ.

⁹ Ĩpaino numbile sika kunsooko muoonie usungu, ĩpa kunsooko alĩ muoonie usungu nauleetile uupeli. Kuitĩ muoonie usungu kunzĩla ya kĩNzua, koona mulekiligia uukapĩki muutendi wĩĩtu munkaani tũlũ zensi.

¹⁰ Kuitĩ uugũnua, nawĩĩlĩ kunzĩla ya kĩNzua ukuleetaa upeli nauleetile uugũnua, naugila kawĩsokia; ĩpa uusungu wa unkũmbigyulu akuleetaa ukiu.

¹¹ Kuitĩ laaĩ usungu uu munzĩla ya kĩNzua, ya kĩna ukuleetaa ukamatĩkũ kĩ munsĩ yaani, nuwĩkuĩli, nuusuukua, nuooa, nukũshũũmua ninshula nanziiza, nuukamũ, nuukaasigua. Muzaasio tũlũ zensi alĩ mwĩkamĩnkĩlĩĩlie inie uniinie, kĩna muagila kautimu mulukaani luasio.

¹² Ninene pĩna nanumuandĩkĩla, sika alĩ numuandĩkĩĩle kunsooko yaakue uyo naalutimuĩle, sunga sika kunsooko yaakue uyo naalĩ mutimulĩlue, ĩpa uukamatĩkũ waani kunsooko yĩĩtu wigyelele kumiani ntongela ya kĩNzua.

¹³ Kunsooko ĩĩ kuakamigue nkolo. Palumuĩ nukwikamigua ĩnkolo kunsĩĩtu, alĩ kulumbile nkankanaa kuulumbi wa kĩTito, kunsooko ĩnkolo yaakue yapoleelagiguaa niniinie tũlũ.

¹⁴ Malĩĩ lukoolĩ lukaani kunsiani naalĩ nĩkũmazukilie kumuakue, sika alĩ numukolue inshoni; ĩpa kĩna alĩ kumuĩĩlĩĩle inie tũlũ naza tai, iio-iioo sunga nĩzaasio naalĩ kwĩkũmazukilie kumuakue ũTito alĩ za tai.

¹⁵ Nuuloogua waakue kunsiani ingĩ wingĩ kwikĩlĩkĩĩla, pĩna wijukile uugombi waani inie tũlũ, naalĩ mumuanũnkuĩle kuooa nukwikĩkĩma.

¹⁶ Numbile kunsooko munkaani tũlũ nakumusanilie inie.