2 Akolinto 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Nindiishie pĩna kukĩtuma umulĩmo palumuĩ nduyo kukumupeepia mulekiaanũnkula nakanda uukende wa kĩNzua,

² Kuitĩ uũgile, “Mwityũngo naalĩ gyombigue alĩ nukũgyũũlilie, Palutondo lwa ugũnua nanukualĩĩlia.” Laaa, ityũngo nigyombigue ingĩ ino-iinoo; laaa, ulutondo lwa ugũnua ingĩ nantende.

³ Kutilĩ kaumuĩ nakumukũmpilie mulukaani tũlũ luensi, uwĩtumi wĩĩtu ulekishokigua.

⁴ Tũlũ pensi kwĩpũnilie ishie zĩ ĩtumi a kĩNzua, muugigimĩlia wiingĩ, mumpatĩ, muwaagi, muukoi;

⁵ muukuua, mũityũngo, muutuunĩĩligua, muuwai, muukengeali, muulalĩli;

⁶ muweeligua, muumani, muupolo, muuntu nauuza, muMuau Muelu, muuloogua nasika wa unamampĩlu;

⁷ mulukani lwa tai, mungũlũ za kĩNzua, kumata ma kulukuuluu ma mukono wa kĩgoosia nĩma mukono wa kĩkĩĩma;

⁸ muukulu katia muumelua, muutambulua ibĩĩ katia muutambulua iiza; zĩ apembeelia ĩpa kwĩantu a tai;

⁹ zĩ nasika amanue ĩpa naamanue nkankanaa; zĩ naikia ĩpa kusii kuapanga; zĩ naikuĩkigua ĩpa sika kwaulagua;

¹⁰ zĩ akola usungu ĩpa kulumbile intondo tũlũ; zĩ atũka ĩpa kukuagolĩpia iingĩ; zĩ naagila kakĩintu ĩpa tũlũ yensi kutĩĩte.

Lyompi lya kukũnukula inkolo zaao ĩAkolinto

¹¹ Inie Akolinto, ĩmĩlomo yĩĩtu yĩkualiĩ kumiani, nĩkangĩ inkolo zĩĩtu nkũnukulue.

¹² Sika muatuunĩĩligue munsĩ yĩĩtu, ĩpa munkolo zaani muatuunĩĩligue.

¹³ Mushookie kwilika naalĩ muapeegue (nitambula niniinie zĩ nĩangĩnia) mukũnukule ninkolo zaani gaa.

Usuguli mumpola za kugendania nĩnasika asuĩlĩĩle

¹⁴ Muleke kũtũngĩnkanigua palumuĩ ndĩo nasika asuĩlĩĩle. Kuitĩ kĩkoolĩ kĩsuakĩĩa kĩ pakatĩ ya kulukuuluu nuuleki? Katia ukoolĩ ukamantani kĩ pakatĩ ya weelu nuwiilu?

¹⁵ Ukoolĩ wĩgombia kĩ pakatĩ ya kĩKilisito nuwa kĩBeliali? Lĩkoolĩ tyũmpĩ kĩ pakatĩ ya nusuĩlĩĩle nĩnasikusuĩlĩĩle?

¹⁶ Ukoolĩne uumuĩ pakatĩ ya Numba ya kĩNzua nĩanzegamĩla. Kuitĩ ishie kwĩNumba ya kĩNzua namukola upanga, kĩna uNzua aluũgile, “Nĩkakikyala pakatĩ yaao, kangĩ nikigendela pakatĩ yaao; Nineene nikitũla Nzua waao, ndĩo ikitũla antu aane.

¹⁷ kuluulo, pũnĩ pakatĩ yaao Mutemanuke ndĩo, uũgile ũShekulu, Mulekipaatia ĩmadobũ, Nineene nĩkakumusũgamĩĩlia.

¹⁸ Nikitũla Tata kumiani, Niniinie mukitũla aana aane naagoosia nĩnaakĩĩma, Uũgile ũShekuulu Mukola ngũlũ zensi.”