2 Akolinto 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Kuitĩ kumanile ya kĩna igyũnda liĩtu muna kukikyala kanga lĩtaulue, kutĩĩte ĩnumba kwa kĩNzua, ingĩ numba na sika nzengue kumĩkono, ndĩo ĩkoolĩ ĩkalĩ na kalĩkwigyulu.

² Kuitĩ mwigyũnda ĩlĩ kukĩsũsũma, kangĩ kutĩĩte nsula kujialue uwikyaalĩ wĩĩtu naupũnile kwigyulu,

³ kuitĩ pĩnakukakuujiala, sika kukakigyelela kukĩpuĩ.

⁴ Kunsooko ishie nakukoolĩ munu munigyũnda kukĩsũsũmaa kuulemeeligua; sika kĩna kusiile kwijiulua, ĩpa kusiiile kwijialua, koona namĩkola kukia ĩmĩlue nuupanga.

⁵ Ĩpa gua naalukuzĩpĩlĩĩlie ishie zizo-ziizoo ingĩ uNzua naalukupĩĩle ĩkĩĩĩkĩĩloo kya kĩMuau.

⁶ Kuluulo, kutĩĩte nkolo nkamũ intondo tũlũ, kangĩ kumanile ya kĩna pĩna kuĩlĩ mumiĩlĩ, kuĩlĩ kulĩ nũShekulu,

⁷ kuitĩ ishie kukugendelaa muusuĩĩli sika kuuoni.

⁸ Kutĩĩte nkolo nkamũ gua, taazu kuleke kikyala mumiĩlĩ nukukikyala ensi nũShekulu.

⁹ Kunsooko ĩĩ kanga ĩkukooli ĩpa katia kukutilĩ ĩpa, kwĩkamatĩkilie kukumulooeelia.

¹⁰ Kuitĩ yukũjĩpĩĩle kukigyelela ntongela ityengu lya ulamulua lya kĩKilisito, koona muntu wensi waanũnkule naalumatendile pĩna alĩwĩĩlĩ mumuĩlĩ, namatũla maaza katia mabĩĩ.

Uloogua wa kĩKilisito ingĩ shĩĩgo ningũlũ zĩĩtu

¹¹ Iio gua, pĩna kwamana uooa kwa kĩShekulu, kukuasugulaa ĩantu; ĩpa kũigyeleligue kualiĩ pa kĩNzua, sunga nsuĩlĩĩle kũigyeleligue kualiĩ numumioo yaani gaa.

¹² Sika kwĩkũmazukilie kangĩ ntongela yaani, ĩpa kukumupeela inie ĩnsooko ya kĩkũmazukia kunsooko yĩĩtu, musũũme kukuashookeelia ĩaasio naĩkĩkeemela ĩza kunzi udũũ, nazukutilĩ munkolo.

¹³ Kuitĩ kanga ĩkuaziishala, ingĩ kunsooko ya kĩNzua; katia kanga kuĩ nĩmasala, ĩngĩ kunsooko yaani.

¹⁴ Kuitĩ uuloogua wa kĩKilisito wakũtyapĩkia; kunsooko kĩna umuĩ wa kiile kunsooko ya tũlũ; iio gua tũlũ akiile.

¹⁵ Ninduyo wakile kunsooko ya tũlũ; koona naakoolĩ apanga aleke kikyala ĩeene, ĩpa ikyale kwa kĩuyo naalukiile nukwiiiuka kunsooko yaao.

Upanga naupia mwa kĩKilisito

¹⁶ Kuluuloo gua kwipũnĩĩla yoi, kutilĩ nakumanile mukĩmuĩlĩ. Kanga ĩalĩĩ kumulĩngile uKilisito mukĩmuĩlĩ, ĩpaino sika kumulĩngile kayoi kangĩ.

¹⁷ Kuitĩ wensi kanga ĩwĩĩlĩ mwa kĩKilisito waazaa kĩumbe nakĩpia; iya kalĩ yakĩlaa, laaa katĩ naipia yaazaa.

¹⁸ Ndio tũlũ ipũnile kwa kĩNzua, muene alukukamantĩĩnie ishie ninduzo muene kwa kĩKilisito, nukukukupeela ishie uwĩtumi wa ukamantani;

¹⁹ yakĩna uNzua alĩ wĩĩlĩ mwa kĩKilisito nukuukamantania uunkũmbigyulu nĩnduzo, waleke kuaalĩĩlia uutimu waao; nduyo nuĩĩka mumuĩtu ulukaani lwa ukamantani.

Utanantia wa ukamantanigua

²⁰ Kuluulo gua, ishie kuatumua palioma lya kĩKilisito kĩna uNzua ukumupeepia kumĩlomo yĩĩtu. Kwa mulompa inie kunsooko ya kĩKilisito, mukamantanigue nuNzua.

²¹ Uyo nasikuumanile umulandu, numutenda watũle mulandu kunsooko yĩĩtu, koona kutũle kulukuuluu ya kĩNzua mumuakue.