2 Akolinto 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Naalĩ aalĩĩligue nuPaulo kwigũnĩka

¹ Kuandagiaane kangĩ kukĩkũmazukia undiishie? Katia kusiilene zĩ naĩngĩ imbalua zalukũmo kwiiiza kumuani, katia kwipũna kumuani?

² Inie niinie mwĩmbalua yĩĩtu nanandĩkue munkolo zĩĩtu, nigyelĩĩle nukwishomua nĩantu tũlũ.

³ Mũigyeleligue kualiĩ ya kĩna mwĩmbalua ya kĩKilisito nantualue nindiishie, sika alĩ nandĩkue kuwiino, ĩpa alĩ kwa kĩMuau wa kĩNzua namukola upanga, nĩkangĩ sika muibao ya magũe, ĩpa muibao naya nkolo za kĩuntu.

⁴ Ishanio kĩna liasio kutĩĩte kwa kĩNzua kunzĩla ya kĩKilisito.

⁵ Sika kĩna kusũũmile kwishĩĩga kalukaani ishie undiishie, ĩpa uusũũmi wĩĩtu ukupũnaa kwa kĩNzua,

⁶ nukũsũũmilie kwitũla ĩtumi ilyago nĩpia, nasika lya wandĩkua, ĩpa lya kĩMuau; kuitĩ uwandĩkua ukuulagaa ĩpa uMuau ukupangatagiaa.

Ukulu wa Mpola na Nziiza kwilĩganĩĩlia nuukulu wa Ulagĩĩlio

⁷ Ĩpa kanga uwĩtumi nautĩĩte uukiu naalĩwandĩkue nukwioolua mumagũe ĩalĩĩ wijile muukulu, sunga ĩaana a Ĩsilaeli sika alĩ asũũmile kukuulaaa uusiu wa kĩMusa kunsooko ya ukulu muusiu waakue, nduo ukulu nauleegigua;

⁸ mbii gua uwĩtumi wa kĩMuau sika ukitũla nuukulune kwikĩla uwaasio?

⁹ Kuitĩ uwĩtumi naukuleetaa uulamulua wa ukaasigua malĩĩ utĩĩte ukulu, uwĩtumi wa kulukuuluu utĩĩte ukulu nangũlũ kwikĩla uwaasio.

¹⁰ Kuitĩ sunga uukulu waasio naalĩ ukuligue sika nautũla nuukulu tai, kunsooko ya ukulu naukĩlĩkĩlĩle.

¹¹ Iio gua, malĩĩ uwaasio naukuleegagigua ĩalĩĩ utĩĩte ukulu, naikulu nangũlũ uwaasio naukikyalaa utĩĩte ukulu.

¹² Kuitĩ nakutĩĩte uulaaĩĩli kĩna uu, ishie kwatũla nuukamatĩkũ;

¹³ nindiishie sika kutendile kĩna uMusa naaluukũnĩkĩĩle uusiu waakue nantiila, ĩaana a Ĩsilaeli alekishũũma kwiona ĩmpelo ya zaasio naalĩ zaaziileegigua.

¹⁴ Ĩpa masĩĩgo maao namakakĩligua, kuiti sunga nantende yoĩ pĩna ishoma ilyago lya kalĩ, kĩkoolĩ kĩkũnĩkĩlo kĩĩkĩo, isiititũla kĩkũnukulue mwa kĩKilisito udũũ.

¹⁵ Ĩpa sunga nantende yoĩ pĩna inkaani za kĩMusa zishomua, ĩkĩkũnĩkĩlo kĩkoolĩ munkolo zaao;

¹⁶ ĩpa ĩpaasio pĩna amupĩlukĩĩla ũShekulu, paapo ĩkĩkũnĩkĩlo kyukuleegagiguaa.

¹⁷ Ninduyo ũShekulu muene Muau, nĩpaasio uMuau wa kĩShekulu pĩna wĩĩlĩ, uukolelua ukoolĩ.

¹⁸ Ĩpa nindiishie kuusiu nasika ukũnĩkĩlue, pĩna kuulaaile uukulu wa kĩShekulu zĩ mukĩlolelo, kwikaĩlĩka kuĩ nĩmpiani ĩĩo-ĩĩoo, kwipũna uukulu sunga kuukulu naupũnile kwa kĩShekulu, uyo nwa Muau.