2 Akolinto 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Ĩpa alĩ nsĩĩgile kwitenda itĩ, ndekiiiza kangĩ kunsiani kuusungu.

² Kuitĩ kanga numupeele usungu, waani gua nukinumbĩĩlia ĩne, isiititũla uyo naaluligilie usungu kumuane?

³ Alĩ nĩzandĩkĩle ĩzaasio koona pĩna nikiiiza ndekipeegua usungu nĩndĩo naalĩiĩpĩĩle kwinumbĩĩlia; namusanilie inie ya kĩna ulumbi waane ingĩ uulumbi waani gaa.

⁴ Kuitĩ alĩ numuandĩkĩĩle kuualaalĩki wingĩ nuuwai wa nkolo, namupũnia ĩmisholi mingĩ. Sika kĩna muĩ nuusungu, ĩpa itĩ mumane uuloogua waane nanuutĩĩte kumuani kĩna wingĩ dũũ.

Mutimuli nupelile washookigua

⁵ Malĩĩ umuntu ĩupeelanile usungu, sika alumpĩĩle uusungu ĩne kwityũmpĩ-tyũmpĩ (ndekitambula nukwikĩla mutai) wamupeela uusungu niniinie poo.

⁶ Nuĩlĩ muasio, yumuendile muumo muusugulua waasio namupeegue nĩĩĩa naiingĩ.

⁷ Nsũta ya yaasio, taazu yumũjĩpĩĩle inie kukumulekela nukukumukamia ĩnkolo, uyo walekimĩllua nuusungu kwikĩlĩkĩĩla.

⁸ Kuluulo gua numupeepilie inie, mukamĩnkĩĩlie uuloogua kumuakue.

⁹ Iio gua, alĩ numuandĩkĩĩle izi nuuone uugolokũ waani, yakĩna mwagombaa inkaani tũlũ.

¹⁰ Ĩpa gua na mwamulekela, sunga uneene na mulekelaa; kuitĩ ĩne uneene, pĩna namulekela, namulekela kunsooko yaani ntongela ya kĩKilisito,

¹¹ kulekipembeeligua nũShetani; kuitĩ ĩmiena yaakue kwaĩmanile.

Ugiligua nuuduli wa Mpola na Nziiza

¹² ĩPaasio pĩna nampika kuTiloa kwitanantia iMpola naNziiza za kĩKilisito, nanigyuĩlua umulango mwa kĩShekulu.

¹³ Sika namona uutuulũ munkolo yaane kunsooko sika nanumuona umunũna waane ũTito, Ĩpa nakwĩlaga ndĩo nandega kwienda kuMakedonia.

¹⁴ Ĩpa uNzua nwasongeligue nukukupeela kwidula intondo tũlũ zensi, mwa kĩKilisito nukwipũnĩlia kualiĩ umunũnku na muza uwa kumumana uzo kumulĩmo wĩĩtu.

¹⁵ Kuitĩ ntongela ya kĩNzua nakutũla zĩ munũnku namuuza wa kĩKilisito, kumuao naigũnĩka nukumuao nailimĩĩla;

¹⁶ kuaasio munũnku wa ukĩu nauleetile uukiu, kuia gua munũnku wa upanga nauleetile uupanga. Waani nusũũmile ĩzaasio.

¹⁷ Kuitĩ ishie sika kwĩkĩna aasio naiingĩ naakulugulagiaa ulukaani lwakĩNzua; Ĩpa kuugolokũ wa moo, kĩna kwipũna kwa kĩNzua kukutambulaa mwa kĩKilisito ntongela ya kĩNzua.