2 Akolinto 12 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Ukũnukuĩlua naukĩlĩkĩlĩĩle nuuneketũ nauninumpilie

¹ Injĩpĩĩle Kukĩkũmazukia kanga ĩkutilĩ kansaĩlo no, ĩpa nikilongoleka nimaoni nukuukũnukuĩlua nũShekulu.

² Numuĩzĩ muntu umuĩ mwa kĩKilisito, yaalĩĩ miaka kyumi nĩnĩĩ (kanga alĩ wĩĩlĩ mumuĩlĩ magu, katia alĩ wĩĩlĩ kunzi ya muĩlĩ magu, umanile uNzua). uMuntu nuasio nupũlua sunga kwigyulu lya katatu.

³ Nineene numuĩzĩ umuntu nuasio (kanga alĩ wĩĩlĩ mumuĩlĩ magu, katia alĩ wĩĩlĩ kunzi ya muĩlĩ magu, umanile uNzua);

⁴ manile kĩna umuntu nuasio nupũlua sunga kuPaladiso, nũigia inkaani nasika zukulikitagiguaa, nangiligue umuntu walekitambula.

⁵ Mumpola za muntu kĩna uyo nĩkakĩkũmazukia, ĩpa sika nĩkakĩkũmazukia uneene isiititũla mumpola zauneketũ waane.

⁶ Kuitĩ kanga aza nijilishiia kukĩkĩkumazukia sika aza nijilitũla munaulu, kunsooko nikitambula ĩtai, ĩpa nĩgililie kooona umuntu walekinshĩĩgĩla kwikĩlĩkĩĩla ĩzaasio nukuziona kumuane katia kukuziigia kumuane.

⁷ Koona ndeke kũkiulia nangũlũ kunsooko ya ukũnukuĩlua nawingĩ, nambĩĩkĩlua ĩligia mumuĩlĩ, mutumua wa kĩShetani, wankue inkũndi, ndeke kĩkulia nangũlũ.

⁸ Kunsooko ĩĩo nanumupeepia ũShekulu kunkua zitatu wandeegelie.

⁹ Numbuĩla, “uUkende waane ukuendile muumo, kuitĩ muuneketũ, muumo ingũlũ zaane zukukondeelekaa.” Iio gua, nĩkakĩkũmazukĩlia uuneketũ waane kuulumbi wingĩ kwikĩlĩkĩĩla, koona ingũlũ za kĩKilisito zikyale mumuane.

¹⁰ Kunsooko ĩĩ numuloeeligue nuuneketũ, nuugaalĩlua, nuwaagigua, nuupaatigua, nuukoigua kunsooko ya kĩKilisito, kuitĩ pĩna numuneketũ, paapo ntĩĩte ingũlũ.

Paulo witambula kangĩ mpola za wĩkũmazukia waakue.

¹¹ Naalĩĩ munaulu! Ĩpa niinie munonatĩlĩĩlie. Kuitĩ alĩ injĩpĩĩle ĩne nkũmazukigue niniinie, kuitĩ sika numukeepeelue kakĩntu, kĩna ĩaasio naĩkĩpeela uukulu wa atumua; kanga ĩsika nĩkĩntu noo

¹² Tai iilĩngasĩĩlio ya mutumua alĩ itendue pakatĩ yaani muugigimĩlia tũlũ, kuilĩngasĩĩio nĩmakula, nuutendi wa ngũlũ.

¹³ Kĩntu kĩ namuakeepeelue kwikĩla ĩmakanisa namĩngĩ, isiititũla sika ntũlile muligo kumiani? Ndeegelie uutimu uu!

¹⁴ Laaĩ, ĩĩ ĩnkua ya katatu nanĩzĩpĩlĩĩlie kwiiiza kunsiani sika nikitũla muligo kumiani, kuitĩ sika ndũũmile kaintu yaani, ĩpa nukumudũũmaa uniinie. Kuitĩ sika ijĩpĩĩle ĩaana aaĩĩkĩlie ĩaleli iuto, ĩpa ĩaleli aaĩĩkĩlie ĩaana aao.

¹⁵ Kuulumbi wingĩ nikipũnia iyaane, sunga nikipũnigua kunsooko ya nkolo zaani. Malĩĩ nĩkakilie kukumuloogua, numukeepeeluene kwiloogua niniinie.

¹⁶ Na yaa iio, kĩina sika numulemelĩĩlie inie, ĩpa mukuũgaa kĩna ĩne nĩmwĩsukukia, kangĩ alĩ numusolile kuupeembeelia!

¹⁷ Alĩ numusolĩĩlie intune kunzĩla ya aasio naalĩ nĩatumile kunsiani?

¹⁸ Nanumukamatĩkĩla ũTito alumusolĩĩlie yaani? Sika alĩ kukugendelaane kunkolo ĩo-ĩĩoo, nukũtiata inshambatĩlio zizo-ziizoo?

¹⁹ Kangĩ musĩĩgilene kĩna kukĩgidĩĩla kumiani? Ntongela ya kĩNzua kwitambula mwa kĩKilisito, nĩzaasio tũlũ aloogua, koona muzengue inie.

²⁰ Kuitĩ noopokile katia pĩna nijiliiiza sika nĩkakumuona inie kĩna nsiiile kukumuona, nineene sika mukimona kĩna musiiile kwimona. Noopokile katia kwiaagaana wĩleei nuwĩĩlũ, nuutaki, nĩmagũndo, nuusingĩĩlia, nĩmatekete, ninkeemo, nĩmalanga.

²¹ Nineene pĩna nijiliiiza kangĩ, uNzua walekinkolelua inshoni ntongela yaani, nineene nĩaonele uusungu kunsooko ya iingĩ naalĩ atimuĩle ĩmuandĩo nasika apelile muudobũ, nuugololia nuusambo naalĩ autendile.