2 Akolinto 11 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kulukuuluu ya kĩPaulo nuutumua waakue

¹ Taazu aza mũjilingigimĩlia iniino muulu waane. Eeze, mungigimĩlie!

² Namuluĩla wĩĩlũ nauuza wa kĩNzua kuitĩ numuligĩĩlie inie umugoosia umuĩ, ingĩ uKilisito, koona numutualĩle umunanso namueligue.

³ Ĩpa noopokile kĩna ĩnzoka naalĩ yumupembelĩĩlie uHawa kuwĩsukukia waakue, iio-iioo ĩmasĩĩgo maani mikioononeka, nukukuuleka uugolokũ nuweelu kwa kĩKilisito.

⁴ Kuitĩ kanga muntu waaze nukukumutanantia ũYesu wĩngĩ nasika kumutanantilie ishie, katia mwiaanũnkula ĩnkolo yĩngĩ nyĩsia nĩndĩo naalĩ mumianũnkuĩle, katia mwiaanũnkula iMpola na Nziiza nazĩngĩ nasikaalĩ muzigombile, mwigigimĩlia iiza yoo!

⁵ Kuitĩ nsĩĩgile sika numukeepeelue kakĩntu, kĩna ĩaasio naĩkĩpeela uukulu wa utumua!

⁶ Kanga ĩsika numutambuli nakĩĩ, sika numulũto wa kulĩnga; munzĩla tũlũ kũigyeleligue kualiĩ kumiani mumpola zensi.

⁷ Alĩ ntimuĩlene kukĩniinupia, koona inie mukuligue, kunsooko alĩ numutanantĩĩlie iMpola na Nziiza za kĩNzua, kakĩnamulĩmo alĩ numugila?

⁸ Alĩ nĩmaleegĩĩlie ĩmakanisa namĩngĩ kunzĩla ya kuwaanũnkula uukendegeeli waao, koona numutumĩle inie.

⁹ Pĩna alĩ nkoolĩ kunsiani nukwisilĩlua, sika alĩ ntũlile muligo kumuntu wensi, kuitĩ ĩanũna naalĩ ijile kwipũnĩĩla kuMakedonia naampela naalĩ numusilĩlue. Munkaani tũlũ alĩ nĩgililie, kangĩ nĩkakĩgilia, ndekitũla muligo kumiani.

¹⁰ Kĩna iio ĩtai ya kĩKilisito ĩkoole mumuane, ukutilĩ nwakumũmia umulomo waane nuwĩkũmazukia waane kunandĩ za Akaya.

¹¹ Nĩkĩ gua, kunsooko sika numuloiluene inie? Umanile uNzua!

¹² Ĩpa nanukulutendaa, nĩkakulutenda, nĩaleegelie ĩnsooko ĩasio naidũũma ĩnsooko ya kĩkũmazukĩlia kukigyelekia kĩna kwilika nindiishie.

¹³ Kuitĩ ĩaasio ingĩ atumua a ulongo, naakĩtumaa umulĩmo wa upembeelia, naĩkĩpĩlulaa atũle zĩ aatumua a kĩKilisito.

¹⁴ Kangĩ sika ukulĩlua, kuitĩ ũShetani umuene ukĩpĩlula wĩĩ mpiani ya malaĩka wa weelu.

¹⁵ Luulo gua, sika lukani lukulu kanga ĩtumi aakue ĩĩkĩpĩlulaa atũle mpiani ya ĩtumi a kulukuuluu, nĩmpelo yaao ikitũla kwilika lya mĩlĩmo yaao.

Ulĩganĩĩlia kwa kĩPaulo nĩasio naalĩ ĩkulilie ĩeene kĩna atumua

¹⁶ Natambula kangĩ, “Wensi walekinshĩĩga kĩna ĩne numunaulu; kanga munsĩĩgĩle iio gua, mung'ombie zĩ numunaulu, koona nineene gua nĩkũmazukie kainiino.”

¹⁷ Nanukuzitambula ĩpaino sika mbũgile kĩna nkaani za kĩShekulu, ĩpa zĩ kuulu, muukamatĩkũ uu wa wĩkũmazukia;

¹⁸ kunsooko iingĩ ĩkĩkũmazukia mukĩuntu, nineene nĩkakĩkũmazukia.

¹⁹ Kuitĩ inie namutĩĩte ĩmasala mukuagigimĩlagiaa ĩanaulu kuulumbi!

²⁰ Mukugigimĩlagiaa umuntu kanga wamutende muĩ asese, kanga wamulĩe inie, kana wamuleegelie iiintu yaani, kanga wĩkulie nukukumukua inie muusiu.

²¹ Numukolue nsoni kwitambula itĩ, alĩ kuaniekũ kwikĩlĩkĩĩla kwitenda yaasio! Ĩpa gua mulukaani luensi kanga umuntu wĩĩ mukamũ kukĩkũmazukia (nitambula kĩulu) nineene gaa numukamũ kukĩkũmazukia.

Wĩlũgi nuukakũ naalĩ umuagaanile uPaulo

²² Aebũlaniane ĩo? Nineene gaa. Aĩsilaeline ĩo? Nineene gaa. A wĩleli wa kĩIbũlahimune ĩo? Nineene gaa.

²³ Ĩtumi a kĩKilisitone ĩo? Ĩne nangũlũ (nitambula zĩ numusali) muukoi wa mulĩmo kwikĩlĩkĩĩla, mũitũngo kwikĩlĩkĩĩla, muukuua kwikĩlĩkĩĩla nkankanaa, nkua ningĩ piipĩ kwikia.

²⁴ Nkua zitaano alĩ numukuue kuAyahũdi mĩkoa makumi manĩĩ kwikeepia umuĩ.

²⁵ Alĩ numukuue nankome nkua zitatu; alĩ numutũlue magũe nkua ĩmuĩ; ipyango liane naalĩ nononekeela munanza nkua zitatu, nanĩĩ nkoolĩ munanza utiku nĩmunsĩ.

²⁶ Mumĩsĩnzo nkua ningĩ, muwĩlũgi wa miongo, muwĩlũgi wa aleegelania, muwĩlũgi wa antua aane, muwĩlũgi wa ndugu nazĩngĩ, muwĩlũgi wa mukaa nankulu, muwĩlũgi wa mumbuga, muwĩlũgi wa munanza, muwĩlũgi wa anũna a ulongo;

²⁷ mumĩlĩmo namĩkakũ, munzago, muuumia ndoolo, nkua kunkua munzala nĩnoota, nkua ningĩ muulia ndia, mumpeepo pĩna numugila kantiila.

²⁸ Leka ĩzaasio za kunzi, zikoolĩ gua nazukunzũgaa mumeelele, nduo iingĩ uukendegeeli wa makanisa tũlũ.

²⁹ Waani namuneketũ nineene ndekineketa? Waani namukũmpigue nineene ndekishuukĩlua?

³⁰ Kanga ĩinjĩpĩĩle kukĩkũmazukia, nĩkakĩkũmazukĩlia uuneketũ waane.

³¹ uNzua Tata wa kĩShekulu Yesu namukuligue ĩkalĩ nakalĩ, umanile ya kĩna sika nilomboka.

³² kuDamesiko ũjũmbe nwa mutemi Aleta alukumĩlindĩĩlaa ĩkaa ya Damesiko koona wanguĩle,

³³ nineene naniikĩligua mũtyooto kwipũna mũdilishia lya nkĩlĩ, nangũnĩka kwipũna mumĩkono yaakue.