2 Akolinto 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uPaulo wiũga kĩna ingũlũ za utumua waakue zipũnile kwa kĩNzua

¹ Ĩne neene Paulo, neene nukumupepia inie kuupolo nĩkĩsuusu kya kĩKilisito; ĩne nanĩmwĩniinupia pĩna nkoolĩ pakatĩ yaani, ĩpa pĩna nukutilĩ ĩnkolo yaane nkamũ kumiani!

² numupeepilie gua, koona pĩna nkoolĩ ndekitũla nĩnkolo nankamũ nansĩĩgile kĩna ukaa ntĩĩte kuaasio naasĩĩgile kĩna ishie kwigendela kwitiata inshula za kĩmuĩlĩ.

³ Kuitĩ sunga pĩna kuĩlĩ mukĩmuĩlĩ sika kukĩlaasa kunzĩla ya kĩmuĩlĩ,

⁴ kuitĩ ĩmata mĩĩtu ma ulugu sika ma kĩmuĩlĩ ĩpa matĩĩte ngũlũ za kĩNzua namasũũmile kwitaula inkĩlĩ.

⁵ Ĩkwitalula ĩmasĩĩgo niintu yensi nayĩkĩkulagiaa nukukuuuukĩĩla umani wa kĩNzua, kangĩ kulĩsolile utepi shĩĩgo liensi, lyumugombe uKilisito.

⁶ Nindishie ĩkwĩlĩganĩlĩĩlie kukuukaasia uuleki wensi; ĩpaasio uugombi wani pĩna ũjilikondeeleka.

⁷ Ilaaĩ naigyelĩĩle pamiiso maani. Wensi anga wĩsanie ya kĩna wa kĩKilisito, wijuke munkolo yaakue kĩna iio umuene na wa kĩKilisito, iio-iioo nindiishie.

⁸ Malĩĩ nkĩlĩkĩĩlile kukĩkũmazukia iniino kunsooko ya usũũmi wĩĩtu ũShekulu naalukupĩĩle kumuzenge inie sika kukumutalula, sika nikikolua kansoni,

⁹ Koona ndekionua zĩ nukumoopookia inie kumbalua zaane.

¹⁰ Kuitĩ akuũgaa, “iMbalua zaakue ingĩ nkakũ kangĩ za usũũmi, ĩpa pĩna ukoolĩ kukĩmuĩlĩ ingĩ muneketũ, ninkani zaakue za kumelua.”

¹¹ ĩAasio alĩnge kĩna mĩna kuĩlĩ munkaani za mbalua pĩna kukutilĩ, iio-iioo kuĩlĩ muutendi nĩpĩna kukoolĩ.

¹² Kuitĩ sika kusũũmile kukĩlĩganĩĩlia nukukĩpianĩkĩĩlia nityũmpĩ lya asio naakola kĩkulia ĩeene. Ĩpa ĩasio pĩna ĩkĩlĩganĩĩlia eene kueene nukukĩpianĩkĩĩlia eene kueene agila kaulĩngi.

¹³ Ĩpa gua, sika kukĩkũmazukia kwikĩlĩkĩĩla, ĩpa kwilika lya ngele naalĩ kuagemeleligue nuNzua, yumupikĩĩle sunga kunsiani.

¹⁴ Kuitĩ sika kwipũũtĩĩla ishie undiishie zĩmbũge kĩna sika kumupikĩlĩĩle. Kuitĩ sunga kunsiani alĩ kwamuandio kukumupikĩĩla inie muMumpola na Nziiza ĩza kĩKilisito.

¹⁵ Sika kukĩkũmazukia kwikĩlĩkĩĩla mumĩlĩmo ya antu naĩngĩ; ĩpa gua ulaaĩĩli wĩĩtu ingĩ pĩna uusuĩĩli waani wiongeeleka, kukikuligua kunsiani kwilika lya ngele yĩĩtu, sunga kwiongeeligua,

¹⁶ koona kuzitanantie iMpola na Nziiza sunga kunsiao naikyalile kulĩ kwikĩla ĩnsĩĩ yaani; kuleke kukĩkũmazukia munkaani nazakondile kwijĩpĩĩligua nĩnaĩngĩ.

¹⁷ “Ĩpa umukola kĩkũmazukia, nwĩkũmazukie mwa kĩShekulu.”

¹⁸ Kuitĩ nukugombagiguaa sika unuasio nukikũmazukagiaa umuene, ĩpa uuyo nukukũmazukagigua nũShekulu.