2 Akolinto 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia nukwishongelia

¹ Paulo, mutumua wa kĩYesu Kilisito kuuloa wa kĩNzua, nũTimoteo umunũna wĩĩtu, kukumuandĩkĩla inie namwikyanisa lya kĩNzua nalĩkoolĩ kuKolinto, palumuĩ nĩeelu tũlũ naakoolĩ munsĩĩ tũlũ nya Akaya.

² uUkende wĩĩ kumiani nĩmatiliga namapũnile kwa kĩNzua Tata wĩĩtu nukwa kĩShekulu Yesu Kilisito.

³ Nwakuligue uNzua, Tata wa kĩShekulu wĩĩtu Yesu Kilisito, Tata wa kĩsuusu, uNzua wipyumbulio tũlũ,

⁴ nukukupumbulagiaa munzago zĩĩtu tũlũ zensi, itĩ kusũũmigue kukuapumbulia naĩĩlĩ munzago za matũmpĩ mensi, kumapumbulio nakuapumbuligue nuNzua.

⁵ Kuitĩ kĩna uwaagi wa kĩKilisito wĩongelĩĩle kunsĩĩtu, iio-iioo nipyumbuliio liĩtu lioongelĩĩle kunzĩla ya kĩKilisito.

⁶ Ĩpa gua, malĩĩ ishie ĩkuĩlĩ munzago, ingĩ kunsooko ipyumbulio liani nuugũnua waani; kanga yĩĩ kuapumbuligue, ingĩ kuunsooko ipyumubulio liani nalikĩtumaa umulĩmo waakue kuugigimĩlia wa waagii uo-uuoo nakukuagagigua nindiishie.

⁷ Nuulaaĩĩli wĩĩtu kunsooko yaani ingĩ ukamũ; kumanile kĩna iio-iioo namukoolĩ muukamantani wa waagi waasio, iio-iioo mukamantĩĩne numuupumbulio waasio.

⁸ Kuitĩ sika kualoe anũna ĩĩtu, mulekimana impola za nzago naali zukuagaanile kuAsia, kĩna nakulemeeligua nkankanaa kwikĩlĩkĩĩla ingũlũ zĩĩtu, sunga nakutia nsula ya kutũla apanga.

⁹ Eeze, ishie undiishie alĩ kuĩlĩ muulamulua wa kukia koona kuleke kĩsania, ĩpa kumusanie uNzua nukũiukagiaa ĩakiu;

¹⁰ naalukugũnile ishie munkia nankulu kĩna niasio, kangĩ ukakukugũna, kumulaaĩlĩĩle kĩna ukilongoleka kukukugũna.

¹¹ Inie niniinie kwĩaalĩĩlie muulompi kunsooko yĩĩtu, itĩ kunsooko ya upeegua waasio nakuapeegue ishie kuwaalĩĩlia wa antu iingĩ, iingĩ apũnie ĩmasongelio kunsooko yĩĩtu.

Shĩĩgo nalyĩkualiĩ lya kĩPaulo

¹² Kuitĩ kukĩkũmazukia kumuĩtu nsuuku, uukuĩli wa mioo yĩĩtu ingĩ kuweelu nuugolokũ naupũnile kwa kĩNzua, sika kumasala ma kĩmuĩlĩ, ĩpa kuukende wa kĩNzua alĩ kwikyalile muna unkũmbigyulu, nangũlũ gua kunsiani inie.

¹³ Kuitĩ sika kumuaandĩkĩĩle inie kalukaani, ĩpa ziizo namuzishomile mukakuzilĩnga; nineene ndaĩlĩĩle kĩna mukakuzilĩnga kwali.

¹⁴ Iio-iioo kĩna naalĩ mukulĩngile kũtyũmpi, ya kĩna kwĩnsooko ya kĩkũmazukia kumuani, kĩna uniinie namuĩlĩ kumwitu ishie mulutondo ulwa kĩShekulu Yesu.

uPaulo wityelia uugenda waakue.

¹⁵ Pĩna ntĩĩte ishanio liasio, alĩ nomile kwiiiza kunsiani muandio, koona muligie uupeegua wa kabĩlĩ;

¹⁶ nukwikĩlĩla kunsiani pĩna nonguĩle kuMakedonia; nĩkangĩ kwipũnĩĩla kuMakedonia nshookelele kunsiani nukwijĩpĩlĩligua umusĩnzo niniinie kwienda kuUyahũdi.

¹⁷ Kuitĩ nishĩĩga izi, niunguĩla masĩĩgone? Katia nizishĩĩgile kunzĩla ya kĩmuĩlĩ koona yĩĩ ilika lĩmuine kumuane kwiũga, eeze nĩ zũi?

¹⁸ Ĩpa kĩna uNzua ingĩ wa usuĩĩli, ulukaani luĩtu kunsiani sika alĩ lutũlile eeze nĩzũi.

¹⁹ Kuitĩ uMuana wa kĩNzua, Yesu Kilisito naalĩ mutanantigue nindiishie pakatĩ yaani nineene nuSiluano nũTimoteo sika alĩ eeze nĩzũi, ĩpa mumuakue ingĩ eeze.

²⁰ Kuitĩ ĩmalago tũlũ ĩma kĩNzua namakoolĩ mumuakue ingĩ eeze, mumuakue ingĩ Amini; uNzua wakũmazukigue nindiishie.

²¹ Kuitĩ uyo nukukukamĩnkĩĩlagiaa palumuĩ nininiie mwa kĩKilisito, nukukukupaka ĩmakũta iingĩ uNzua;

²² nduyo nukukuĩĩkĩla umuntozo nukupeela ĩkĩĩĩkĩĩlo kya kĩMuauu munkolo zĩĩtu.

²³ Ĩne numuĩtile uNzua wĩĩ mukuĩli wa nkolo yaane, ya kĩna sika nalaaza kuKolinto koona mulekiligia usungu.

²⁴ Sika kĩna kwademela uusuĩĩli waani, ĩpa ishie kwĩaalĩĩlia a ulumbi waani, kusoonko muĩmikile kuusuĩĩli waani.