1 Yohana 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Usuĩĩli wa KĩKilisito

¹ Tũlũ wensi nukusuĩĩla kĩna ũYesu ingĩ Kilisito mulelue nuNzua. Tũlũ wensi nukumuloogaguaa umukola kulela, ukumuloogaguaa ninduzo namulelue nduyo.

² Kunzĩla ĩĩ kulĩngile kĩna kualoogilue ĩaana a kĩNzua, pĩna kumuloogilue uNzua nukwikendegeela ĩmalagĩĩlio maakue.

³ Kuitĩ uu wau uuloogua wa kĩNzua, kumakendegeele ĩmalagĩĩlio maakue; kangĩ ĩmalagĩĩlio maakue sika malũto.

⁴ Kunsooko kiensi nakĩlelue nuNzua kyukuudulaa uunkũmbigyulu; uu wau uduli naukuudulaa uunkũmbigyulu, ingĩ uusuĩĩli wĩĩtu.

⁵ Waani mukola kuudula uunkũmbigyulu, isiititũla uuyo nukusuĩĩlaa kĩna ũYesu ingĩ Muana wa kĩNzua.

⁶ Uyu wayu naalĩ wijile kumaazĩ nukumugali, ũYesu Kilisito; sika kumaazi udũũ, ĩpa kumaazi nukumugali.

⁷ Ninduyo uMuau muene nukukuĩlaa, kunsooko uMuau ingĩ muene tai.

⁸ Kunsooko akoolĩ akuĩli atatu mwigyulu, uTata, nuLukaani, nuMuau Muelu; nĩndiia naatatu umuĩ.

⁹ Kangĩ akoolĩ atatu naakukuĩlaa muna nsĩĩ, uMuau nĩmaazi numugali; nĩndĩĩa naatatu akukamantanaa muumuĩ. Kanga kuwaanũnkule uukuĩli wa aana antu, uukuĩli wa kĩNzua ingĩ ukulu nangũlũ, kunsooko uu wau uukuĩli wa kĩNzua naalumukwĩlĩĩle uMuau waakue.

¹⁰ uNuasio nusuĩlĩĩle muMuana wa kĩNzua utĩĩte ukuĩli waasio munsĩ yaakue. uNuasio nasikumusuĩlĩĩle uNzua umutendile watũle mulongo, kunsooko sikuusuĩlĩĩle uukuĩli, naalumukuĩlĩĩle uMuana waakue.

¹¹ Ninduu wau ukuĩli, ya kĩna uNzua alukupĩĩle uupanga wa kalĩ nakalĩ; nuupanga uu ukoolĩ muMuana waakue.

¹² uNuasio numutĩĩte uMuana, utĩĩte uupanga waasio; namugila uMuana wa kĩNzua, mugila kaupanga waasio.

Mumalĩĩlio

¹³ Numuandĩkĩĩle izi, inie namusuĩlĩile muliina lya Muana wa kĩNzua, koona mulĩnge kĩna mutĩĩte uupanga wa kalĩ nakalĩ

¹⁴ Uu wau uukamatiku nakuutĩĩte kumuakue; ya kĩna kanga kulompe lukaani kwilika lya ulooa waakue, ukukũigia.

¹⁵ Kanga kumane kĩna ukukũigia luensi nakwilompa, kwimana kĩna kwapeegagua ĩzaasio nakulompile kumuakue.

¹⁶ Wensi kanga wamuone umunũna waakue witenda umulandu nasika wa ukiu, ukilompa, nuNzua ukakumupeela upanga kunsooko ya aasio naatendile umulandu nasika wa ukiu. Ukoolĩ mulandu wa ukiu, sika mbũgile walompe kunsooko ya waasio.

¹⁷ Luensi nasika lwa kulukuuluu ingĩ mulandu, ĩpa ukoolĩ mulandu nasika wa ukiu.

¹⁸ Kumanile ya kĩna wensi naalĩ mulelue nuNzua sikukutimulaa, ĩpa Uzo naalĩ mulelue nuNzua ukumukendegeelaa, sunga uMubĩĩ sikukumuambaa.

¹⁹ Kumanile ya kĩna ishie ingĩ kwa kĩNzua; nuunkũmbigyulu tũlũ ukoolĩ mungũlũ za mubĩĩ.

²⁰ Kumanile ya kĩna uMuana wa kĩNzua waazile nduyo wakupĩĩle uulĩngi, koona kumulĩnge uzo nwa tai, nindiishie kukoolĩ munsĩ yaakue nwa tai, ingĩ munsĩ ya Muana waakue ũYesu Kilisito. Uyu wayu Nzua nwa tai, nuupanga wa kalĩ nakalĩ.

²¹ Ana ane, ĩkendegeelĩ kuanzegamĩla.