1 Timoteo 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Asese

¹ ĩAasio naĩĩlĩ mũpyimpĩ lya usese, aapeele ishekulu aao kĩna ijĩpĩĩle ikulio tũlũ, ĩliina lya kĩNzua nuumanigua wĩĩtu ulekitukua.

² Nĩaasio naatĩĩte iishekulu naakumusuĩĩla uNzua, aleke kuamela kunsooko aazaa ĩkĩnũna, taazu aatumĩlĩkie kunsooko aasio naakuanũnkulaa ĩnsaĩlo ya mulĩmo waao aazaa asuĩĩli nĩaloogua. iMpola izi uzimanie, nukũshugula.

Umania wa ulongo

³ Wensi kanga ĩwimania mamanigua mingĩ, nduyo ĩsikugombile inkaani naza upanga za kĩShekulu wĩĩtu Yesu Kilisito, sunga uumanigua naukamantĩĩne nukukumutekela uNzua kutai,

⁴ unuasio ukĩkentula udũũ, nduyo sikulĩngile kakĩntu, uulemua waakue ingĩ kwishĩĩga impola za makolio ninkungumi za nkaani. ĩZaasio ziizo nazukuleetaa uwĩĩlũ nuwĩleei, niituki, nuwĩsĩĩgĩli naubĩĩ,

⁵ ninkungumi pakatĩ ya antu naoonoonilue ĩmasala maao, naasũpatukilue ĩtai, naishĩĩga kĩna kukumutekela uNzua ingĩ nzĩla ya kĩsaipia.

Ugolĩ wa tai

⁶ Tai, kukumutekela uNzua palumuĩ nukwiendua muumo, ingĩ nsaĩlo nkulu.

⁷ Kuitĩ gua, kutilĩ naalĩ kukĩleetile muna unkũmbigyulu, sunga sika kusũũmile kukuupũna ĩkutĩĩte nĩkĩntu.

⁸ ĩpa itĩ, kanga ĩkutĩĩte ndia ni ntiila, yĩkakukuenda muumo.

⁹ ĩAasio gua naasiiile kwitũla agolĩ akuguaa muugemua nĩmĩtego, ninshula ningĩ nangila kansaĩlo, kangĩ za kualemaalia, nazĩkuaseketelia ĩantu, nukukuagumĩla muoononeki numuulimĩĩli.

¹⁰ Kuitĩ itina lya ubĩĩ tũlũ ingĩ kwiloogua impiia; naĩngĩ pĩna naaawa ĩzaasio, akupuutagigua kwileka uUsuĩĩli nukukĩligĩlia uwaalaalĩki wingĩ wa moo.

Usuguli

¹¹ Ĩpa ue, nwĩmuntu wa kĩNzua, uzitalame ĩzaasio; utiate ĩkulukuuluu nuukulia uNzua, usuĩĩli, uloogua, ukamatĩkũ nuupolo.

¹² Wĩsinke ulugu nauuza wa usuĩĩli; tyapĩkia uupanga wa kalĩ nakalĩ naalĩ umuĩtĩlue, nukũmuula akũmuuli nauuza ntongela ya ukuĩli iingĩ.

¹³ Nakulagĩĩlia ntongela ya kĩnzua nukuipeela iintu tũlũ upanga, nintongela ya kĩKilisito Yesu naalukũmulĩĩle ukũmuuli nauuza ntongela ya kĩPontio Pilatu;

¹⁴ ulĩlĩndĩĩle ilyagĩĩlio liĩ gyila kibyado, liĩ gyila kishokio sunga ukũnukulua wa kĩShekulu wĩĩtu Yesu Kilisito;

¹⁵ naũjile kigyeleligua pamatũngo maakue, uyo muene mukola uliukũ, Mukulu wing'ene, Mutemi wa atemi, Shekulu wa ishekulu.

¹⁶ Uyo wing'ene udũũ mumuakue kutilĩ kaukiu, nwikyalile muweelu nasika ukusũgamĩĩlaguaa, sunga kutilĩ kaumuĩ naalumuoonie, katia nusũũmile kukumuona. Uyo kumuakue liĩ kyulio nuukulu wa kalĩ nakalĩ. Amini.

¹⁷ Ualagĩĩlie naagolĩ muna unkũmbigyulu uu aleke kĩkentula, sunga alekishania uugolĩ naugila kawikyali, ĩpa amusanie uNzua nukukupeelaa ishie iintu tũlũ ku wingĩ, kuitumĩle kũlyumbi.

¹⁸ Atende namaaza, atũle agolĩ kuutendi nauuza, apũnie inshao zaao kuukende, akamantane nĩnaĩngĩ muusilĩlua waao.

¹⁹ Itĩ yoi ĩakĩĩkĩlia ĩkĩuto kĩtũle mukũlĩla namuuza kumatũngo namijile, koona aũtyapĩkie uupanga nawa tai-taaii.

²⁰ Ue Timoteo, ĩmbĩĩka naalĩ mbĩĩkue kumuako, umĩlindĩĩle! Wĩnege ninkaani nasika za wĩtekeli, naangila kandogolelio, ninkungumi za mĩlimu naasika mĩlimu ya tai;

²¹ nĩnaĩngĩ naa ĩgombile, naamĩlimĩĩlia ĩnzĩla ya usuĩĩli. Ukende wĩĩ palumuĩ niniinie.