1 Timoteo 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Muna ijĩpĩĩle kukuatendela ĩakiĩlua ikyanisa

¹ Uleke kumutakĩla umunampala, ĩpa umusugule zĩ tata; nĩasumbatĩ zĩ anũna,

² ĩakombi zĩ amaau, nĩananso zĩ agũlĩ, kuweelu tũlũ.

³ Uakulie ĩakiĩlua naakiĩlua a tai-taaii.

⁴ Ĩpa umukiĩlua kanga ĩutĩĩte aana katia ijukulu, naĩmanie tangua kwitenda nayĩijĩpĩĩle pa kĩNzua mumpola za numba yaao ĩeene, nukukuashokeelia naiiza ĩaleli aao; kuitĩ ulukaani ulu lugombigue ntongela ya kĩNzua.

⁵ Ĩpa unuasio namukiĩlua wa tai-taaii namulekue wing'ene waĩĩkile uulaaĩĩli wakue mwa kĩNzua, nduyo ukĩkakagiaa muwĩneni numuulompi utiku nĩmunsĩ.

⁶ uNuasio nasikukĩgilagiaa umuene wakiile kanga ĩmupanga nakĩĩ.

⁷ Lagĩĩlia izi koona atũle agila kishokio.

⁸ Kanga wensi wasiite kuakendegeela ĩaakue, nangũlũ ĩaasio a munumba yaakue, waukaana uusuĩĩli, kangĩ ingĩ mubĩĩ kwikĩla uyo nasikusuĩlĩĩle.

⁹ uMukiĩlua walekiandĩkua isiititũla ĩwaalĩĩ miaka makumi mutandatu, nduyo ĩalĩ musungu wa mugoosia umuĩ;

¹⁰ namukuĩlue kuutendi nauuza, kanga alĩ mukendegeelaana, kanga alĩ musũgamĩĩlia agenda, kanga alukioogagiaa, ĩeelu ĩmũgulu, kanga aluukuaalĩĩlagiaa naakuagagiguaa, kanga aluutiatile utendi wensi nauuza.

¹¹ Uasiite kukuandĩka ĩakiĩlua a kĩsungu kuitĩ pĩna inshula zaao zaakĩlaa, akumusiita uKilisito naasiia kwitoolua;

¹² ndĩo iingĩla muulamulua kunsooko alĩ alekile usuĩĩli waao wa muandio.

¹³ Palumuĩ niyaasio, akĩmanagiaa kwitũla akata, ĩipilima-pilima numba kunumba, kangĩ sika akata dũũ, ĩpa atĩĩte nĩmĩ ndĩĩpũ nukwipeleela impola za naĩngĩ, naitambula makaani nasika mijĩpĩĩle.

¹⁴ Numuloe ĩakiĩlua a kĩsungu atoolue, alele aana, aziteme impola za munumba; aleke kumupeela umulugu ĩlioma lya kutukĩla.

¹⁵ Kuitĩ naĩngĩ akondilie kwigomoka nukukumutiata ũShetani.

¹⁶ Mugoosia katia musungu naasuĩlĩĩle, kanga ĩatĩĩte akiĩlua, aaalĩĩlie, ikyanisa lĩlekiligia umuligo koona lyĩaalĩĩlie ĩasio naakiĩlua a tai-taai.

Anampala ikyanisa

¹⁷ ĩAnampala naakutongeela iiza ijĩpĩĩle ikyulio nkua zibĩlĩ nangũlũ ĩaasio nakĩtumaa umulĩmo namukakũ kwitanantia nukwimania.

¹⁸ Kuitĩ uwandĩĩkua uũgile; “Uleke kumĩtũnga ĩng'oombe umulomo pĩna ipuula upemba.” Nĩkangĩ, “uMunamulĩmo wijĩpĩĩle ĩkĩnamulĩmo kiakue.”

¹⁹ Kanga umunampala wasokigue, ulekigomba isiititũla kumĩlomo ya akuĩli abĩlĩ katia atatu.

²⁰ Naakutimulaa, uasugule ntongela ya antu tũlũ, koona naĩngĩ oopoke.

²¹ Ntongela ya kĩNzua, nukuntongela ya kĩKilisito Yesu, nukuntongela ya malaĩka naeelu, nukulagĩlĩĩlie ue, uzikendegeele inkaani zaasio, ulekilamula kuukaaũ, ulekitenda kalukaani kuuloeelania.

²² Uleke kumuĩĩkĩla muntu ĩmĩkono kuukaaũ; kangĩ ulekikamantana mumĩlandu ya muntu nuĩngĩ; wĩkendegeele ue wĩĩ muelu.

²³ Ulekikopa ĩmaazĩ matilĩ ĩpa tumĩla nĩpimubinio pikeei kunsooko ya ndaa yaako, nuuluĩle naukukuambaa nkua kunkua.

²⁴ ĩMĩlandu ya antu naĩngĩ yĩkwaliĩ yatongĩĩle kwienda kuulamulua, ĩpa ĩmĩlandu ya naĩngĩ ĩkakigyelela pembele.

²⁵ Iio-iioo nuutendi nauuza wĩkualiĩ; sunga uuo nasika wĩkualiĩ sika usũũmile kũpisĩgua.