1 Timoteo 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Muna ijĩpĩĩle kukuatenda ĩamania a ulongo

¹ uMuau gua, utambuĩle kualiĩ ya kĩna pamatũngo ma mpelo naĩngĩ ĩkakĩkamatula nuusuĩĩli, ĩitegeela inkolo naza ulimĩĩli nĩmamanigua ma asĩĩmuĩ,

² kuunamampĩlu wa antu naakutambulaa ulongo, naakiile gyandi munkolo zaao ĩeene.

³ ĩAasio naakuagilia ĩantu kwitoola nukukualagĩĩlia ĩpugamuke nindia, ĩzaasio uNzua aluziumbile zaanũnkulue kwishongelio nĩnaatĩĩte usuĩĩli nĩnaamanile ĩtai.

⁴ Kunsooko kĩumbua kiensi kya kĩNzua ingĩ kĩĩza, sunga kĩkutilĩ nakya kusiitua kanga kianũnkulue kuusongeelia.

⁵ Kuitĩ kielagiguaa kulukaani lwa kĩNzua nukuulompi.

⁶ Ijukĩlie ĩanũna impola izi, nunduue ukitũla mwĩtumi namuuza nwa kĩKilisito Yesu, nukukĩlĩĩsia nukulukaani lwa usuĩĩli nuumanigua nauuza nuutiatile kĩĩsa.

⁷ Ĩpa inshimu za ulu nasika za wĩtekeli nauuza, uzishiite. ĩkamatĩkie kukumutekela uNzua;

⁸ kuitĩ kukĩkamatĩkia kwiligia ingũlũ za muĩlĩ yukuleeta nsaĩlo iniino, ĩpa uuuza wa wĩtekeli ukuleetaa nsaĩlo mumpola zensi; kuitĩ utĩĩte lyago lya upanga wityũngo ĩlĩ nuwaasio naũjile.

⁹ uLukaani ulu ingĩ lwa tai, ndulo lwijĩpĩĩle kwigombigua nkankanaa.

¹⁰ Kuluulo kwĩkakilie kukĩtuma mulĩmo nukukĩkamatĩkia kũshiio ĩlĩ, kunsooko kumulaaĩlĩĩle uNzua namupanga, nduyo Mugũni wa antu tũlũ, naikulu nangũlũ wa aasio naasuĩlĩĩle.

Wikyaalĩ wa kĩTimoteo umuene nuumania waakue

¹¹ Mpola izi uzilagĩĩlie nukukuzimania.

¹² Muntu wensi waleke kuumela uugalimanga waako, ĩpa wĩĩ mpiani kumiao naasuĩlĩĩle, muutambuli numulugendo, muuloogua muusuĩĩli numuweelu.

¹³ Ĩkamatĩkie kukuasomela, kukuasugula, nukukuamania ĩantu sunga pĩna nikiiza.

¹⁴ Ulekileka kukĩtumĩla uupeegua naukoolĩ munsĩ yaako naalumupeegue kunzĩla ya unakĩdagu palumuĩ nukuuĩĩkĩlua wa mĩkono ya anampala.

¹⁵ Uzishĩĩge ĩzaasio, wikyale muzaasio, uwĩongeeli waako utũle kualiĩ kuantu tũlũ.

¹⁶ Ĩkendegeele uuue mukola, sunga uumania waako; wĩkakie muziizo, kuitĩ pĩna witenda itĩ, ukakĩgũna uuue mukola sunga ndĩo naakukũigia.