1 Timoteo 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Atongeeli ikyanisa

¹ uLukaani ulu ingĩ lwa tai; wensi kanga wadũũme udĩĩmi wa ulĩnguli usiile mulĩmo namuuza.

² Luulo gua, ijĩpĩĩle mulĩnguli wĩĩ utĩĩte lukũmo naluuza, mugoosia wa musungu umuĩ, kangĩ nasikukugaalaa, munamasala muntu wa kĩĩsa-kĩĩsa, musũgamĩĩlia agenda, numanile kwilanga;

³ sika muntu nwijiĩlĩĩle ulugaalo, sika mukuani ĩpa wĩĩ mupolo, sika wa nkungumi, sunga sika muawa mpiia.

⁴ Ijĩpĩĩle wakendegeele ĩnumba yaakue iiza, nukuamanagiaa ĩaana aakue ĩniinupie nukukuapeela ĩantu ikyulio;

⁵ wensi nasikumanile kwikendegeela ĩnumba yaakue umuene, ukishũũma mbii kwikendegeela ikyanisa lya kĩNzua.

⁶ Ijĩpĩĩle walekitũla mulĩnguli koona waleke kĩkentula wague muulamulua wa kĩShetani;

⁷ kangĩ ijĩpĩĩle kwikuĩlua uuza nĩantu naĩĩlĩ kunzi, koona walekiguĩla mumutego wa kĩShetani.

⁸ Iio-iioo nĩaalĩĩlia iKyanisa ĩĩ akola lukũmo, nasika a masĩĩgo mabĩlĩ, nasika akukopekagiaa umubinio, sunga sika aawa mpiia za nsoni,

⁹ ĩakendegelĩĩle uunkũnkũ wa usuĩĩli muumoo namuelu.

¹⁰ Nĩndĩĩa gaa agemue tangua; na akondia kukigyelela kĩna agila kishokio, paapo ĩtume umulĩmo wa waalĩĩlia wiKyanisa.

¹¹ Nĩasungu gaa ĩĩ a lukũmo naluuza, sika asingĩĩlania, nasika akugaalaa, asuĩĩli mumpola zensi.

¹² ĩAalĩĩlia iKyanisa ĩĩ agoosia a musungu umuĩ, ĩakendegelĩĩle iiza inumba zaao nĩaana aao;

¹³ kuitĩ naakĩtumaa umulĩmo wa waalĩĩlia iiza, akĩligĩlagiaa ikyulio naliiza, nuukamatĩkũ wingĩ muusuĩĩli nawĩĩlĩ mwa kĩKilisito Yesu.

¹⁴ Ndaaĩlĩĩle kwiiiza kumuako kuukaaũ, ĩpa nakuandĩkĩla izi

¹⁵ kanga ntinie, umane kĩna ijĩpĩĩle ĩantu kwigendela munumba ya kĩNzua. ĩlĩ lyolĩ kyanisa lya kĩNzua namupanga, ishĩmbĩlĩ kangĩ mukũlĩla wa tai.

¹⁶ Kutilĩ kankankani, uunkũnkũ wa wĩtekeli wĩĩtu ingĩ ukulu. uNzua alĩ mũgyeleligue mumuĩlĩ, Nulĩngĩkigua kĩna munakulukuuluu mwa kĩMuau, Alĩ wigyelĩĩle kuamalaĩka, Nutanantigua pakatĩ ya ndugu, Nusuĩĩlua muna unkũmbigyulu, Nunansulua kukiania muukulu.