1 Timoteo 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia nuusuguli mumpola za umania waulongo

¹ Paulo, mutumua wa kĩKilisito Yesu, kuulagĩĩligua wa kĩNzua Mugũni wĩĩtu nuwa kĩKilisito, uulaaĩĩli wĩĩtu;

² nakuandĩkĩla ue Timoteo, muanuane wa tai muusuĩĩli. uUkende wĩĩ kumuako, nĩkĩnishungu nĩmatiliga namapũnile kwa kĩNzua Tata nukwa kĩKilisito Yesu Shekulu wĩĩtu.

³ Kĩna iio alĩ nukuĩĩlĩĩle pĩna alĩ nitũnga umusĩnzo kwienda kuMakedonia, wikyale muEfeso koona ualagĩĩlie naĩngĩ alekimania ĩmamanio ma kĩgenda,

⁴ sunga alekikendegeela inshimu nasika za tai, sunga impola za kalĩ nangila nuukinĩĩlo, nazukuleetaa inkungumi dũũ, sika uzengi wa kĩNzua nawĩĩlĩ muusuĩĩli.

⁵ Ĩpa itĩ, ĩnsooko ya ulagĩĩligua wĩĩtu ingĩ uloogua naupũnile munkolo nanzelu, numoo namuelu, nuusuĩĩli naugila kaunamampĩlu.

⁶ Naĩngĩ naazileka ĩzaasio, naalimĩĩla, naagomokela ĩmakaani namagila kansaĩlo.

⁷ ĩAasio naishiia atũle alangi a Ulagĩĩlio, sika naalĩnga naakumatambulaa, sunga impola ziizo naakuzidunduulaa kungũlũ.

⁸ Kumanile gua, kĩna uUlagĩĩlio ingĩ uuzakanga wensi wautumĩle kunzĩla nang'ombigue;

⁹ kangĩ walĩnge kĩna uUlagĩĩlio sika umũjĩpĩĩle umunakulukuuluu ĩpa ĩaleki, nĩanakiaka, nĩnasika amoopookile uNzua, nĩanamĩlandu, nĩnasika amukulilie uNzua, nĩadobũ, nĩnaakuulagaa atata nĩamaau aao, nĩaulagi,

¹⁰ nĩagololia, nĩnaĩkĩgololagiaa agoosia atilĩ, nĩnaakuiia ĩantu, nĩalongo, nĩnaakulapaa kuulongo, naa lwa lukoolĩ lukaani luensi naluĩngĩ nasika lukamantĩĩne nuumanigua nautĩĩte upanga,

¹¹ kwilika lya mpola na nziiza za ukulu wa kĩNzua namuliukũ; ziizo nineene numupeegue kukuzitanantia.

Shongelio lya kĩPaulo mumpola za ukende wa kĩNzua

¹² Nineene namusongelia uKilisito Yesu Shekulu wĩĩtu naalumpĩĩle ingũlũ, kunsooko alumoonie kĩna numusuĩĩli, numbĩĩka muwĩtumi waakue;

¹³ ĩne ĩmuandio naalĩ numutukani, mukola kuagia antu, mugaali; ĩpa nankolelua kĩnishungu kunsooko alĩ ntendile yaasio kuusiitimana, numuusiitishuĩĩla.

¹⁴ Ĩpa itĩ uukende wa kĩShekulu wĩĩtu nawĩongeelekia palumuĩ nuusuĩĩli nuuloogua nawĩĩlĩ mwa kĩKilisito Yesu.

¹⁵ Ingĩ lukaani lwa kusuĩĩlua, nalwijĩpĩĩle kwigombigua nkankanaa, ya kĩna uKilisito Yesu alĩ wijile muna unkũmbigyulu waagũne ĩanamĩlandu, nineene namuandio waao;

¹⁶ kunsooko ĩĩ nankolelua kĩnishungu, koona mumuane nanamuandio, ũYesu Kilisito wigyelelie uugigimĩlia waakue tũlũ, ntũle mpiani kuaasio naikishuĩĩla mumuakue aligie upanga wa kalĩ nakalĩ.

¹⁷ KuMuteni wa kalĩ nakalĩ, nasikukuonaa uoononeki, nasika wigyĩĩle, uNzua wing'ene dũũ, kumuakue liĩ kyulio nuukulu ĩkalĩ nakalĩ, kutilĩ kampelo.

¹⁸ iLyagĩĩlio ĩlĩ nĩlĩlagĩlĩĩlie kumuako, muanuane Timoteo, kwilika lya nkaani za unakĩdagu naalĩ zitongĩĩle kumuako, itĩ muzaasio wĩkue uulugu nauuza.

¹⁹ Uuambe uusuĩĩli numoo namuuza. Naĩngĩ alĩ ausiitilie umoo waao naakapĩla mumpola za uusuĩĩli waao.

²⁰ Muaasio akoolĩ uHimeneyo nuAlekizando, aao naaĩĩkile mumĩkono ya kĩShetani amanigue aleke kumutukĩla uNzua.