1 Petelo 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Usuguli wa upeepia kuanampala

¹ Naapeepia ĩAnampala naĩĩlĩ kunsiani, ĩne nanuMunampala mĩaao numukuĩli wa waagi wa kĩKilisito numukamantani wa ukulu naukikũnukulua pembele;

² nĩapeepilie itĩ, lĩdĩĩmĩ idyale lya kĩNzua naliĩlĩ kunsiani nukukulĩkendegeela; sika kwiooneeligua, ĩpa kuulooa nauuza; sika kuuawa mpiia za nsoni, ĩpa kuukaũ wa kugomba;

³ sika kukuademela ĩaasio a luuli naluelu, ĩpa muĩ mpiani idyale liasio.

⁴ NuMudĩĩmi namukulu pĩna wijile kigyeleligua, mujiliaanũnkula ĩngala ya ukulu nasika yukoononekaa.

⁵ Iio-iioo niniinie aliluka ĩniinupiĩ paanampala. Ĩnie tũlũ ĩtũngĩ uwĩniinupia uniinie kuniinie, kunsooko “uNzua ukuasiitĩlagiaa ĩakola lukeemo nukukuapeelaa uukende naakola wĩniinupia.”

Usuguli nawĩngĩ

⁶ luulo gua, ĩniinupiĩ nsĩlĩlĩ ya mukono wa kĩNzua naukola ngũlũ, wamunansule pityũngo liakue.

⁷ Mutuĩkĩ umuene uukunkunali waani tũlũ, kunsooko muene ukumukendegeelaa inie.

⁸ Sukukĩ, kyalĩ nuukenge kunsooko ũShetani umulugu waani zĩ nsimba nilũma ipilimĩkĩĩlia, widũũma wensi wamumĩle.

⁹ Musiitĩ; muĩ akamũ muusuĩĩli ĩmumanile kĩna injago zizo-ziizoo zikondeeleka muanũna aani naakoolĩ muna unkũmbigyulu.

¹⁰ NuNzua nwa ukende tũlũ, naalumuĩtile kwiingĩla muukulu waakue wa kalĩ nakalĩ nawĩĩlĩ mwa kĩKilisito, pĩna muagigua kwityũngo niino, uyo umuene ukakumukamĩnkĩĩlia, nukukumukamatĩkia, nukukumupeela ingũlũ.

¹¹ uUsũũmĩ wĩĩ kumuakue sunga ĩkalĩ nakalĩ. Amini.

¹² Kumukono wa kĩSiluano, munũna namusuĩĩli kĩna moonie, numuandĩkĩĩle kunkaani nkeei, nishugula nukwikuĩla yakĩna uu wau ukende wa tai wa kĩNzua. Ĩĩmĩkĩ kee muwaasio.

¹³ uMusungu namusaagulue palumuĩ niniinie nuĩlĩ muna Babeli umulamukilie, sunga nuMaliko umuanuane.

¹⁴ Mwĩlamukie kuwĩsuni wa uloogua. ĩMatiliga namĩĩ kumiani tũlũ namukoolĩ mwa kĩKilisito. Amina.