1 Petelo 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩkamatuli nĩmĩlandu

¹ Iio gua, kĩna uKilisito alĩ muagigue mumuĩlĩ, niniinie uniinie jialĩ ishĩĩgo lĩĩlo zĩ mata kunsooko wensi namuagigue mumuĩlĩ nwĩkamatula nĩmĩlandu;

² itĩ pantondo nazishaagile za kikyala muna nsĩĩ, walekigendela munsula a kĩuntu, ĩpa muulooa wa kĩNzua.

³ Kuitĩ ityũngo lya uumĩ wĩĩtu nalyakĩlile, liendile muumo kwitenda namaaloelĩĩlie ĩa ndugu nazĩngĩ, kwigendela muusambo numunsula nambĩĩ, nulugaalo, nuwĩsũgamĩĩlia wa ulakũ nuukopi, nuwĩtekela anzegamĩla nasika ugombigue.

⁴ Akulĩlue kunsooko sika mukamantanile nĩndĩo muusambo naukĩlĩkĩlĩĩle, kuluulo naakumutuka.

⁵ Ndĩo ikipũnia iyalo kumuakue uyo nwĩlĩganĩlĩĩlie kukualamula naapanga nĩnaakiile.

⁶ Kuitĩ kunsooko ĩĩ nĩndĩo naalĩ akiile naatanantĩligua iMpola na Nziiza kanga alamulue kĩmuĩlĩ zĩ antu, atũle apanga munkolo zĩ uNzua namupanga.

⁷ ĩMpelo ya intu tũlũ yasũgamĩĩlaa; luulo gua, ĩsukukĩ mukengeale kuulompi.

⁸ Kwikĩla tũlũ muĩ nuwĩkakia wingĩ muwĩloogua, kunsooko uuloogua ukukũnĩkĩlaa uwingĩ wa mĩlandu.

⁹ Mwĩ ĩsũgamĩĩlia nĩnĩe kuniinie ĩkutilĩ kawĩng'ũng'ũntia;

¹⁰ wensi kĩna alĩ waanũnkuĩle ĩkĩpeegua, kĩtumĩlĩ gua muwĩaalĩĩlia, zĩ akendegeeli naaaza a ukende nawĩkulĩ-kulĩ wa kĩNzua.

¹¹ Wensi nwitambula, nwalikitie zĩ inkaani za kĩNzua; wensi nawaa kĩtuma, nwĩtumĩle mungũlũ namupeegue nuNzua, koona uNzua wakuligue mumpola tũlũ kunzĩla ya kĩYesu Kilisito. uUkulu nuusũũmi ingĩ kumuakue sunga ĩkalĩ nakalĩ yukutilĩ kampelo. Amini.

Uliukũ wa kuagigua kunsooko ya kĩYesu

¹² Alogua, mulekiona ukulĩlua mulumpatĩ nalumuagaanile zĩ mooto koona mugemua, kĩna zĩ kĩntu kĩgenda nakĩmuagaanile.

¹³ Ĩpa kĩna iio namukamantĩĩne muwaagi wa kĩKilisito, lumbĩkiĩ; koona numuukũnukulua wa ukulu waakue, mulumbe nukwilumbĩĩlia.

¹⁴ Kanga mutukue kunsooko ya liina lya kĩKilisito mualiukũ, kuitĩ uMuau wa ukulu nuwa kĩNzua wamũkyalĩĩle.

¹⁵ Ĩpa wensi kumiani walekiaagigua zĩ muulagi, katia zĩ mũii, katia zĩ mutenda mabĩĩ, katia zĩ nwĩkunkunĩĩlie mumpola za antu naĩngĩ.

¹⁶ Ĩpa malĩĩ kunsooko MuKilisito, walekikolua kansoni; ĩpa wamukũmie uNzua kuliina liasio.

¹⁷ Kuitĩ ityũngo liazaa uulamulua wandilie munumba ya kĩNzua. Na wandia kunsĩĩtu gua, ikitũla mbii kumpelo ya aasio nasika azigombile iMpola naNziiza za kĩNzua?

¹⁸ “Kanga umunakulukuuluu wagũnĩke kuukakũ, nasikukumukulagiaa uNzua, kangĩ munamĩlandu, ukakigyelela mpĩĩ?”

¹⁹ Iio gua, ĩaasio naiaagigua kĩna uNzua muloele, naatende naiiza naamuĩĩkĩlie inkolo zaao zĩ kĩuto, zĩ kwa kiTyũnda wa usuĩĩli.