1 Petelo 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Agoosia nĩasungu

¹ Iio niniinie asungu, mwĩniinupie paagoosia aani; koona malĩĩ akoolĩ agoosia nasika alugombile uLukaani, kulugendo lwa asungu aao pĩna kutilĩ uLukaani luasio.

² alũtue pĩna alaaile ulugendo luani naluuza nulwa ooa.

³ Kukĩoogeelia kumiani ilekitũla kukĩoogeelia kunzi, iio kwishũka ĩmatũmbĩ, kukĩoogeelia nĩzahabũ nukwijalĩla ĩmajialo ma loogo,

⁴ ĩpa kiĩ kĩuntu kya munsĩ nasika kigyelĩĩle, mumajialo nasika makoononekaa, ĩngĩ nkolo ya upolo nuuliukũ, nĩtĩĩte ĩngele nankulu ntongela ya kiNzua.

⁵ Kuitĩ iio alĩ ĩkĩoogeelagiaa ĩasungu naeelu a kalĩ naalĩ amusanilie uNzua, naalĩ ĩniinupilĩe paagoosia aao.

⁶ Kĩna iio uSala naalumugombilie uIbũlahimu, numuĩta shekulu; nĩniinie mwĩaana aakue pĩna mwitenda namaaza, sunga sika mukutundualagigua muooa tũlũ wensi.

⁷ Iio-iio niniiie agoosia, mwikyale nĩasungu aani kumasala, nukukuapeela ikyulio zĩ kĩumbe nakya ngũlũ nkeei, kuitĩ muasaali palumuĩ muukende wa upanga, koona uulompi waani ulekigiligua.

Kĩsuusu kya KĩKilisito

⁸ uLukaani lwa mpelo ntuulu, muĩ nishĩĩgo lĩmuĩ, mwĩkolelue kĩnishungu nukukĩloogua zĩ anũna, namuakola kĩsuusu nuuniinupia.

⁹ Mulekishookeelia ubĩĩ kuubĩĩ katia ituki kuituki; taazu mukembete, kunsooko iio alĩ muĩĩtĩlue, koona muusaale uukembetua.

¹⁰ Kuitĩ, “Nusiiile kwilooa uuumĩ nukwiona intondo nanziiza Wagilie ululĩmĩ luakue lulekitambula uubĩĩ, Nĩmĩlomo yaakue ĩlekilikitia uupembelia.

¹¹ Waleke uubĩĩ, watende namaaza; Wadũũme ĩmatiliga nukukumatiata.

¹² Kunsooko ĩmiiso ma kĩShekulu maalaaile ĩanakulukuuluu, Nĩakutuĩ aakue akutegeelaa uulompi waao; Ĩpa uusio wa kĩShekulu wĩnsũta kuaasio naakutendaa uubĩĩ.”

Waagigua nasika wa kulukuuluu nĩmpiani ya kĩKilisito

¹³ Waani gua nukakumutendela uubĩĩ kanga mwĩkakie kwitenda namaaza?

¹⁴ Ĩpa kanga muaagigue kunsooko ya kulukuuluu, iiza kulukuuluu. Mulekioopooka kwioopookia kumuao, sunga muleke kĩkunkunalia;

¹⁵ ĩpa mueliĩ uKilisito Shekulu munkolo zaani. Mwĩzĩpĩĩlie upiupii kukumushookeelia kuupolo nuooa wensi numukolilie impola za ulaaĩĩli nawĩĩlĩ munsĩ yaani.

¹⁶ Muĩ numoo namuuza, koona mulukaani luasio muna mwiooneeligua ya kĩna muatenda mabĩĩ, akoligue inshoni ĩaasio naakulutukaa ulugendo luani naluuza mwa kĩKilisito.

¹⁷ Kuitĩ ingĩ taazu kwiaagigua pĩna mwitenda namaaza, kanga wĩĩ uulooa wa kĩNzua, kwikĩla kunsooko ya kutenda namabĩĩ.

¹⁸ Kuitĩ uKilisito nduyo alukiile kamuĩ dũũ kunsooko ya mĩlandu, munakulukuuluu kunsooko yaao nasika anakulukuuluu, koona wakutuale ishie kwa kĩNzua; nuulagua umuĩlĩ ĩpa ĩnkolo yaakue nĩpangatigua.

¹⁹ Kunkolo ĩĩ nuzaagaana inkolo naalĩ zikoolĩ mukĩtũngo kya kuulungu, nuatanantĩlia;

²⁰ ĩaasio naalĩ asiitile kwigomba pakalĩ, uugigimĩlia wa kĩNzua pĩna alĩ utũngĩĩle pantondo za kĩNoe, ipyango pĩna alĩ kuuzaa lijĩpigua; muasio antu akeei, ingĩ antu munaana, naagũnĩka kunzĩla ya maazĩ.

²¹ iMpiani ya mpola izi ingĩ ubadĩĩzo naukumugũnaa ĩpaino, sika kuuĩĩka kulĩ uudobũ wa muĩlĩ, ĩpa ishookeelio lya moo namuuza ntongela ya kĩNzua kunzĩla ya wiiuki wa kĩYesu Kilisito.

²² Nunduyo ukoolĩ kumukono wa kĩgoosia nwa kĩNzua, wendile kwigyulu, pĩina ĩamalaĩka nĩnaakola usũũmi, ningũlũ, naakumugombagiaa, aĩĩkilue nsĩlĩlĩ yaakue.