1 Petelo 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Luulo gua, muuĩĩke kulĩ uubĩĩ tũlũ nuwĩsukukia tũlũ, nuunamampĩlu, nuwĩĩlũ nĩmatekete tũlũ.

² Zĩ aana naatakata naalelue ĩpaino maawĩ ĩmasunsu ma nkolo ĩma, tai, mukulĩle kumaasio mupikĩĩle uugũnua;

³ Kanga ĩmwalũlile kĩna ũShekulu ingĩ mukola ukende.

⁴ Nzuĩ kumuakue, gyũe nipyanga nishiitue nĩantu, ĩpa kwa kĩNzua ingĩ shaagulue, lĩtĩĩte ĩngele nankakũ.

⁵ Inie ni niinie zĩ magũe namapanga muazengue muĩ numba ya kĩnkoolo, muĩ apolia naeelu, muleete ĩmapũnio ma kĩnkoolo namagombigue nuNzua kunzĩla ya kĩYesu Kilisito.

⁶ Kuitĩ ziizo nazikoolĩ muwandĩkua, “Laaa, niĩĩka muSayuni igyũe kyulu kuluũno, nishaagulue, ĩlya ngele nkakũ. Nuwensi nusuĩlĩĩle mumuakue sikukikoligua kansoni.”

⁷ Luulo gua kumiani inie namusuĩlĩĩle, uyo ingĩ wa ngele nkakũ, ĩpa kuaasio nasika asuĩlĩĩle, “iGyũe naalĩ alĩsiitile ĩazengi Lialĩĩ gyũe kyulu lya kuluũno.”

⁸ Kangĩ, “Gyũe lya kĩkũmpia umugulu Nipyampa lya kuguusania.” Nĩndĩo akĩkũmpagiaa, kunsooko sika akulugombagiaa ulukaani, nĩndĩo naaĩĩkue aligie ĩzaasio.

⁹ Ĩpa inie mwĩluuli nalusaagulue, mwĩ apolia a kĩtemi, mwĩndugu nanzelu, mwĩnsao za kĩNzua, mukũmuukie ulukũmo luakue nalumuĩtile mupũne mukiiti mũingĩle muweelu waakue wa ukulĩlua.

¹⁰ Pakalĩ sika alĩ mwĩluuli, ĩpaino mwĩluuli lwa kĩNzua; ĩmuandio sika alĩ muakolelua kĩnishungu, ĩpaino mwakolelaguaa kĩnishungu.

¹¹ Aloogua, numupeepilie zĩ agenda kangĩ anamusĩnzo, ĩnegĩ ninshula za kĩmuĩlĩ nazĩkĩkuaa nĩnkolo.

¹² Muĩ nulugendo naluuza pakatĩ ya ndugu nazĩngĩ, itĩ kanga ĩakumutũngia kĩna mukutendaa mabĩĩ, pĩna alaaile uutendi waani nauuza, amukulie uNzua palutondo lwa kuuza kwilĩngulua.

Kyulio kuantu a kĩtemi

¹³ Kunsooko ya kĩShekulu muugombe ukulu tũlũ naulagĩĩligue nĩantu, kanga wĩĩ mutemi namukulu,

¹⁴ kanga ĩĩ atongeli naatumue ninduyo kukuakaasia ĩatenda mabĩĩ nukukuakũmazukia ĩatenda maaza.

¹⁵ Kunsooko wauu looa wa kĩNzua, kuutenda iiza waani mumũmie ĩmĩlomo ya anaulu muusitimana waao.

¹⁶ Inie muakolelua, ĩpa mulekitumĩla uukolelua kwikũnĩkĩla uubĩĩ, ĩpa muĩ zĩ ĩĩtumi akĩNzua.

¹⁷ Akuliĩ ĩantu tũlũ. Ulooguĩ unũna. Moopokĩ uNzua. Mukuliĩ umutemi.

Ndogolelio ya wĩtumi

¹⁸ Inie ĩtumi muagombile iiShekulu aani muooa tũlũ, sika aao naaaza nĩnampolo udũũ, ĩpa nĩndĩĩo nagaali.

¹⁹ Kuitĩ uu wau uuza nangũlũ, umuntu wagigimĩlie uusungu ĩumũjukile uNzua, paasio pĩna wiaagigua pĩna tilĩ kakulukuuluu.

²⁰ Kuitĩ lukũmo kĩ kwigigimĩlia kwikuua kanga ĩmutimuĩle? Ĩpa kwigigimĩlia kanga ĩmutendile namaaza nukwiligia injago, uu wau uuza nangũlũ ntongela ya kĩNzua.

²¹ Kuitĩ iio alĩ muĩĩtĩlue kunsooko uKilisito nduyo alĩ muagigue kunsooko yaani, numulekela ĩmpiani mutiate inshambatĩlio zaakue.

²² Uzo sika alutendile kamulandu, sunga uupembeelia sika alĩ wigyelĩĩle mumulomo waakue.

²³ Uzo pĩna alĩ witukua sika alushookelĩĩlie kaituki; pĩna alĩ wiaagigua sika aluopokilie, ĩpa alĩ wĩĩĩkile kumuakue uyo nukulamulaa kukulukuuluu.

²⁴ Uzo muene alĩ wĩĩkenkile ĩmĩlandu yĩĩtu mumuĩlĩ waakue mwikyota, lya mpaga itĩ nakutũla akiu mumpola za mĩlandu, kutũle apanga mumpola za kulukuuluu. Numuutiunulua waakue namukamigua.

²⁵ Kuitĩ alĩ mualĩĩ zĩ nkolo nazipaaluukile, ĩpaiino mwamushookelaa uMudĩĩmi, nuMukendegeeli wa nkolo zaani.