1 Petelo 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia

¹ Petelo, mutumua wa kĩYesu Kilisito, namuandĩkĩla inie asaagulua namwikyalile zĩ agenda nukwishapatĩla kuasio kuPonto, nĩGalatia nĩKapadokia nĩAsia nĩ Bitinia.

² Kĩna iio uNzua Tata alumumanile kwipũna ĩkalĩ alumuelilie inie kwa kĩMuau, mumugombie ũYesu Kilisito nukwimĩnzĩlua umugali waakue. Uukende nĩmatiliga mongeeligue kunsiani.

Shongelio lya MuKilisito kuulaaĩĩli wa ugũnua

³ Wakũmazukigue uNzua Tata wa kĩShekulu wĩĩtu Yesu Kilisito! Kukĩnishungu kiakue kingĩ alukulelile ĩnkua ya kabĩlĩ kuulaaĩĩli naukola upanga, kunzĩla ya wiuki wa kĩYesu Kilisito kwipũna muakiu.

⁴ Kuligie uUsaali nasika ukoonoonekaa, naugila kibyado, nasika ukutyukaa, naalĩ ukendegeelue kwigyulu kunsooko yaani,

⁵ Kangĩ mualindĩĩlue kungũlũ za kĩNzua kunzĩla ya usuĩĩli sunga muligie uugũnua namuaĩĩkĩligue naukikũnukulua kwityũngo lya mpelo.

⁶ Mwilumbĩkia kunsooko yaakue, kanga ĩpaino kwityũngo, itũle yumũjĩpĩĩle kwiona usungu kumagemua mĩkulĩ kulĩ,

⁷ itĩ kuugemua waani usungu waani nawa ngele nkulu kwikĩla ĩzahabũ nyukoononekaa, kanga ĩtũle ngemue kumooto nakĩĩ, uusuĩĩli waasio wigyelele kwitũla kulukũmo nuukulu nikyulio muukũnukulua wa kĩYesu Kilisito.

⁸ Nduyo mumuloilue pĩna sika mumuoonie; kanga ĩsika mumuoonie unzuauu nakĩĩ, musuĩlĩĩle mumuakue nukwilumbĩkia kuulumbi nasika usũũmĩkile kwitambulua, kangĩ naukũmigue.

⁹ Namwiaanũnkula ĩmpelo ya usuĩĩli waani, ingĩ uuugũnua wa nkolo zaani.

¹⁰ ĩAnakĩdagu naalĩ apũnilie uunakĩdagu mumpola za ukende kumuani, naakudũũma-dũũmaa nukwikeesekia mumpola za ugũnua uu,

¹¹ naakeesekia kĩna muntu kĩ nityũngo kĩ naalĩ lyagĩĩligue nuMuau wa kĩKilisito naalĩ wĩĩlĩ munsĩ yaao, pĩna alukuatongeela kwikuĩla impola za waagigua wa kĩKilisito nuukulu naukitiata.

¹² Naalĩ akũnukuĩlue ya kĩna sika kunsooko yaao ĩeene, ĩpa kunsooko yĩĩtu naatumĩka mumpola zaasio naalĩ ntanantigue kunsiani nĩaasio naalĩ amutanantĩĩlie inie iMpola naNziiza kunzĩla ya kĩMuau Muelu naalĩ mutumue kwipũna kwigyulu. Sunga ĩamalaĩka asũũmue nsula kwishungĩĩla impola zaasio.

Muna yumũjĩpĩĩle uMuKilisito.

¹³ Luulo gua, lĩganĩĩliĩ kĩĩsa masĩĩgo maani, kengealĩ, mulaaĩĩlĩkie kuukamĩnkĩĩlũ uukende namukileetelua muukũnukulua wa kĩYesu Kilisito.

¹⁴ Zĩ ĩaana naakugombaa muleke kĩlĩganĩĩlia ninshula zaani ĩza kalĩ ĩza usiitimana waani.

¹⁵ Ĩpa kĩna uzo naalumuĩtile namuelu, niniinie gaa muĩ eelu mulugendo luani tũlũ.

¹⁶ Kunsooko yandĩkue, “Muĩ eelu, kuitĩ ĩne nĩmuelu.”

¹⁷ Kanga ĩmukumuĩta Tata uzo nulamuĩle wensi, kutilĩ kauloeelania, kwilika lya utendi waakue, gendelĩ muooa mwityũngo liani ĩlya kikyala ĩpa zĩ agenda;

¹⁸ ĩmulĩngile kĩna alĩ muakomolue, sika kuintu nayukoononekaa, kumpiia katia kuzahabũ, kwipũna mulugendo luani nasika lujĩpĩĩle, naalĩ muluanũnkuĩle kuatata aani;

¹⁹ ĩpa alĩ muakomolue kumugali wa kĩKilisito nwa ngele nkakũ, zĩ wa muana-nkolo namugila kakĩlema, namugila kibyado.

²⁰ Uzo alĩ mumanue pĩna sika alĩ walaĩĩkua umukũlĩla wa unkũmbigyulu, ĩpa alĩ mukũnukulue kumumalĩĩlio wa matũngo kunsooko yaani.

²¹ Kwa kĩuyo mukusuĩĩlaa mwa kĩNzua naalumũiukilie kwipũna muakiu, numupeela ukulu; sunga uusuĩĩli waani nuulaaĩĩli waani wĩĩ kwa kĩNzua.

²² Pĩna namuzeelia inkolo zaani kukumĩgombia ĩtai, mwĩloogekigue nkankanaa mukĩnũna, ĩkutilĩ kaunamampĩlu; ĩkakiĩ gua kukĩloogua kunkolo nanzelu.

²³ Mwalelilue nkua ya kabĩlĩ, sika kumbeu nyukoononekaa, ĩipa nasika yukoononekaa, kunzĩla ya ulukaani lwa kĩNzua nalutĩĩte uupanga nĩnalũkyalile sunga ĩkalĩ nakalĩ.

²⁴ Kunsooko, “uUuntu wensi zĩ masanzĩ, Nuukulu waakue tũlũ zĩ lyua lya masanzĩ, ĩMasanzĩ makuumaa nilyua liakue lyukuguaa,

²⁵ Ĩpa ulukaani lwa kĩNzua lukikyalaa sunga ĩkalĩ nakalĩ. Nulukaani luasio luulo Mpola naNziiza naalĩ ntanantigue kunsiani.”