1 Akolinto 16 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Nsangĩ kuatũka iYelusalemũ

¹ Kumpola za usangulia kunsooko ya naeelu, kĩna iio naalĩ ndagĩlĩĩlie kumakanisa ma kuGalatia, niniinie tendĩ iio-iioo.

² Palutondo lwa muandio ulwijũma, muntu wensi kunsiani nwaĩĩke ĩkĩuto kumuakue kĩna iio muna uligĩĩlie, ilekitũla usangulia ĩpaasio pĩna nikiiza.

³ Nineene pĩna nikipika, nĩkakuatuma nambalua ĩaasio namukakuasaagula, atuale uukende waani sunga kũYelusalemũ.

⁴ Naa injĩpĩĩle nende nineene, kukienda palumuĩ ni neene.

Mpola zaakue nuwĩlagi

⁵ Nikiiza kunsiani gua pĩna nakondia kwikĩlĩla pakatĩ ya Makedonia; kuitĩ nikĩlĩla pakatĩ ya Makedonia.

⁶ Katia nĩkakikyala kunsiani, katia nikiĩĩma kunsiani muntondo za mbula, musũũme kwinjĩpĩlĩlia umusĩnzo kĩna nunziĩ.

⁷ Kunsooko sika nsiile kukĩona niniinie ĩpaino pĩna ukaa nkĩlĩle; Ĩpa itĩ ndaaĩlĩĩle nikyale kunsiani ntondonkeei, nũShekulu walooagua.

⁸ Ĩpa nikiĩĩma kuEpeso sunga ĩPentekote,

⁹ kuitĩ numũgyuĩlue umulango mukulu nawinjĩpĩĩle, kangĩ akoolĩ iingĩ nainkaania.

¹⁰ Ĩpa ũTimoteo na waaza, laaĩ wĩĩme kunsiani, ĩmugila kaooa; kuitĩ ukĩtuma umulĩmo wa kĩShekulu kĩna uneene.

¹¹ Luulo gua, wensi waleke kumumela ĩpa mumuzĩpĩlĩlie umusĩnzo kumatiliga, koona waaze kumuane, kuitĩ numulaaĩlĩĩle palumuĩ nĩanũna.

¹² Ĩpa gua, kumpola za kĩApolo umunũna wĩĩtu alĩ numupeepilie waaze kunsiani palumuĩ nĩanũna ndĩo, ĩpa sika ulooa wa kĩNzua waaze ĩpaino; ukiiza pĩna waligia ĩlioma.

¹³ Kengealĩ, muĩmĩke kee muusuĩĩli, muĩ akĩgoosia, muĩ akamatĩkũ.

¹⁴ Munkaani zaani, tũlũ zensi zitendeke muuloogua.

¹⁵ Mumĩmanile ĩnumba ya kĩSitefana ya kĩna ingĩ nduĩ-nduĩ ya kuAkaya, nĩndĩo ĩpũnilie mumulĩmo wa kuatumĩkĩla ĩeelu; numupeepilie niinie, anũna aane;

¹⁶ muakulie ĩantu naĩkĩna ĩa sunga kumuntu wensi nukĩtuma umulĩmo nukukĩaagia palumuĩ nĩndĩo.

¹⁷ Nineene numbile kunsooko ya kuuza kumuao uSitefano nu Folitunato nu Akaiko; kuitĩ ĩa alĩ ansũgamĩlĩĩliee dũũ naalĩ numukeepeelue kumiani,

¹⁸ Kunsooko alĩ ampumbuĩlie ĩnkolo yaane, ninkolo zaani gaa; kuluulo gua, mualĩngĩkie ĩantu naĩkĩna aasio.

¹⁹ ĩMakanisa ma kuAsia mamulamukilie. uAkila nuPilisika amulamukilie dũũ mwa kĩShekulu palumuĩ nikyanisa nalĩkoolĩ munumba yaao.

²⁰ ĩAnũna tũlũ amulamukilie. Mwĩlamukie kuwĩsuni naweelu.

²¹ Uu wau mulamu waane nanĩPaulo, kumukono waane uneene.

²² uMuntu nasikumuloilue ũShekulu nuĩ muzũmue. Shekulu wĩĩtu, poloka!

²³ uUkende wa kĩShekulu Yesu Kilisito wĩĩ palumuĩ niniinie.

²⁴ Uloogua waane nawĩĩ palumuĩ niniinie tũlũ mwa kĩKilisito Yesu. Amini.