1 Akolinto 15 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wiiuki wa akiu

¹ Numuĩĩlĩĩle gua anũna aane, iMpola na Nziiza naalĩ numutanantĩĩlie, ziizo naalĩ muzaanũnkuĩle, muasio muumo muĩmĩkile,

² nĩkangĩ kuzaasio mugũnĩkile, malĩĩ muziambĩkilie naalĩ numutanantĩĩlie; isiititũla alĩ musuĩlĩĩle nakanda.

³ Kuitĩ alĩ numupũnĩĩlie kumuandio naalĩ nĩzaanũnkuĩle kĩna uKilisito alukiile kunsooko ya mĩlandu yĩĩtu, kĩna uũgile uwandĩkua,

⁴ nĩya kĩna nuĩĩkua, nũiuka palutondo lwa katatu kina uũgile uwandĩkua,

⁵ nĩya kĩna numũgyeleela uKefa nĩnaikyumi naabĩlĩ.

⁶ Pembele nũigyeleela ĩanũna kwikĩlĩkĩĩla magana mataano, pĩna alĩ akoolĩ palumuĩ; muaasio iingĩ kĩlĩ akoolĩ uumĩ sunga nunzuauu, ipanaĩngĩ agonile.

⁷ Pembele numũgyelela uYakobo, kangĩ nĩatumua tũlũ.

⁸ Nukumpelo ya ĩa tũlũ nwingyeleeela ĩne, zĩ naalĩ numulelue sika mwityũungo liakue.

⁹ Kuitĩ ĩne numuniino muatumua, sika nijĩpĩĩle kwiĩĩtua mutumua, kunsooko alĩ nukuliagagiaa ikyanisa lya kĩNzua.

¹⁰ Ĩpa kuukende wa kĩNzua ntũlile kĩna nĩĩlĩ; nuukende waakue kumuane sika nakanda, ĩpa nanĩkamatĩkia kukĩtuma umulĩmo kwikĩla io tũlũ, ĩpa sika neene, ingĩ ukende wakĩ Nzua nawĩpalumuĩ nineene.

¹¹ Luulo gua, malĩĩ neene malĩĩ aasio, iio kutanantilie kangĩ iio alĩ musuĩlĩĩle.

¹² Ĩpa gua, Malĩĩ uKilisito ĩmutanantigue kunsiani kĩna alĩ muiukigue kwipũna muakiu, nĩkĩ naĩngĩ kunsiani itambula kĩna kutilĩ kawiiuki wa akiu.

¹³ Malĩĩ kutilĩ kawiiuki wa akiu, uKilisito sika alĩ mwiukigue;

¹⁴ kangĩ malĩĩ uKilisito sika alĩ mũiukigue, kwitanantia kumuĩtu ingĩ nakanda, nuusuĩĩli waani ingĩ nakanda.

¹⁵ Ishie gua, kwigyelela kĩna kuakuĩli a ulongo a kĩNzua; Kunsooko kumukuĩlĩĩle uNzua ya kĩna alumũiukilie uKilisito nasika alumũiukilie, malĩĩ ĩakiu sika iiukigua.

¹⁶ Kuitĩ malĩĩ ĩakiu ĩsika iiiukigua, uKilisito nduyo sika alĩ mũiukigue.

¹⁷ Malĩĩ uKilisito ĩsika ali mũiukigue uusuĩĩli waani ingĩ nakanda; kĩlĩ muĩlĩ mumĩlandu yaani.

¹⁸ Iio gua, nĩaasio naagonile mwa kĩKilisito alimĩlĩĩle.

¹⁹ Malĩĩ muumĩ wau dũũ kumulaaĩlĩĩle uKilisito, ishie kuatũka kwikĩla tũlũ ensi.

²⁰ Ĩpa gua uKilisito nũiukigua kwipũna muakiu, nutũla nduĩ-nduĩ kumiao naagonile.

²¹ Kuitĩ ĩnkia alĩ ndeetue numuntu, iio nuwiiuki wa akiu alĩ uleetue numuntu.

²² Kuitĩ kĩna mwa kĩAdamu tũlũ akukiaa, iio-iioo numwa kĩKilisito tũlũ ikipangatigua.

²³ Ĩpa wensi paluandĩ luakue, ĩnduĩ-nduĩ ingĩ uKilisito, pembele naa kĩKilisito pĩna ukiiizaa.

²⁴ Paapo ĩmpelo yĩĩlĩ, pĩna wijile kukumupeela uNzua Tata uutemi, pĩna ukitenda uukulu tũlũ nuusũũmi ningũlũ tũlũ zĩĩ nakanda.

²⁵ “Kuitĩ yĩmũjĩpĩĩle muene wateme sunga waaĩĩke ĩalugu tũlũ ensi nsĩlĩlĩ ya mĩgulu yaakue.”

²⁶ uMulugu wa mpelo nukitendua wĩĩ nakanda ingĩ ĩnkia.

²⁷ “Kuitĩ uNzua nuiiĩka iintu tũlũ yensi nsĩlĩlĩ ya mĩgulu yakue.” Pĩna itambulue, “Tũlũ yaĩĩkilue nsĩlĩlĩ yaakue,” ingĩ kualiĩ kĩna uyo naalumuĩĩkĩĩlie tũlũ yensi nsĩlĩlĩ yaakue ukutilĩ muasio.

²⁸ Ĩpa iintu tũlũ yensi pĩna yakonda kwiĩĩkua nsĩlĩlĩ yaakue, paapo uMuana umuene nduyo ukiĩĩkua nsĩlĩlĩ yaakue uyo naalumuĩĩkĩĩlie iintu tũlũ yensi nsĩlĩlĩ yaakue, koona uNzua wĩĩ tũlũ mutũlũ ensi.

²⁹ Ĩpa gua naabadĩĩzigue kunsooko yaakiu ijilitenda yaani. Malĩĩ ĩakiu ĩsika iiiukigua kainiino, nĩkĩ naabadĩĩzigua kunsooko yaao?

³⁰ Nindiishie nĩkĩ kwiagigua tyũngo liensi?

³¹ Eeze, kukĩkũmazukia kumuane nantĩĩte kunsooko yaani anũna aane, mwa kĩKilisito Yesu Shekulu wĩĩtu; nikia lutondo kulutondo!

³² Malĩĩ kunzĩla ya kĩuntu udũũ, alĩ nĩkuile ninkialu kuasio kuEpeso? ntĩĩte nsaĩlo kĩ. Malĩĩ sika iiiukigua ĩakiu. “Kulĩe gua nukwikopa kunsooko mudaau kukikia.”

³³ Muleke kĩlimĩĩlia; “Uwĩtambuĩli naubĩĩ ukuzoonoonaa intendo nanziiza.”

³⁴ Sukukĩkiĩ kulukuuluu, mulekitimula. Kuitĩ naĩngĩ sika amuĩzĩ uNzua. Nitambula izi numukolie inshoni.

³⁵ Katia umuntu ukiũga, “Ikiiiukigua mbii ĩakiu? Nukumuĩlĩ kĩ ijile?”

³⁶ Ue munaulu! nupandĩĩle ue sika kĩkushookaa muupanga isiititũa kikie.

³⁷ nĩndĩo numĩpandĩĩle sikupandĩĩle umuĩlĩ naukitũla, ĩpa kuuzaaĩmbeu ntilĩ kanga yĩĩ upemba katia yĩngĩ.

³⁸ Ĩpa uNzua ukuĩpeelaa umuĩlĩ kĩnamuloelue, ĩmbeu yensi umuĩlĩ wakue.

³⁹ iNama tũlũ sika nama ĩmuĩ dũũ ĩpa zimuĩ ingĩ za antu, zimuĩ za nimu, zimuĩ za noni, zimuĩ za nsiĩ.

⁴⁰ Nĩ kangĩ ĩkoolĩ ĩmilĩ nya kwigyulu nĩnya muna nsĩĩ, ĩpa uuuza waakue nya kwigyulu wĩsia nuuuza waakue nya muna nsĩĩ.

⁴¹ uUuza wa mpasu wĩsia; nuuuza wa mueli wĩsia; nuuuza wa nsonda wĩsia. kuiti sunga ĩnsonda kunsonda zĩkĩlile uuza.

⁴² Iio-iio nuwiiuki wa akiu. Yukupandĩlaguaa muuolũ, niiukigua muusiitiola.

⁴³ Yukupandĩlaguaa muumeleeligua, niiukigua muukulu; Yukupandĩlaguaa muuneketũ, niiukigua mungũlũ.

⁴⁴ Yukupandĩlaguaa muĩlĩ wa kĩuntu; nuiiukigua muĩlĩ wakĩnkoolo; ukoolĩ umuĩlĩ wa kĩuntu nuwa kĩnkoolo gaa.

⁴⁵ Iio yandĩkue, “uMuntu wamuandio, uAdamu, nutũla nĩnkoolo; ya uumĩ.” uAdamu nwamumalĩĩlio nutũla nkolo ya kupangatia.

⁴⁶ Ĩpa sika utongelĩĩle uwa kĩnkoolo, ĩpa uwa kĩuntu, pembele wa kĩnkolo.

⁴⁷ uMuntu wa muandio upũnile mumasalu, ingĩ wa ulongo. uMuntu wa kabĩlĩupũnile kwigyulu.

⁴⁸ Kĩna wĩĩlĩ nwa ulongo iio ĩĩlĩ ĩo ĩa uloongo; kĩna wĩĩlĩ uyo nwa kwigyulu, iio ĩĩlĩ nĩa kwigyulu.

⁴⁹ Kĩna iio naalĩ kumĩsolile ĩmpiani yaakue uyo nwaulongo, iio-iioo kwijilishola ĩmpiani yaakue uyo nwakwigyulu.

⁵⁰ Nanukuzitambula ntiizi, anũnaaane, ya kĩna ĩnama nĩmĩgali sikazishũũma kwishala uutemi wa kĩNzua, sunga oononeki kwishaala usiitiononeka.

⁵¹ Laaĩ nukumuĩĩla unkũnkũ. Sika kujiligona tũlũ, ĩpa tũlũ kukikaĩlĩka,

⁵² Kukatũngo kaniino, kwitũtiia nukwilaĩlia, pityũngo lidyede lya mpelo; kuitĩ idyede lijililĩla, nĩakiu ukiiiukigua ĩĩ agila kaoononeki, nindiishie kukikaĩlĩka.

⁵³ Kuitĩ uu wa koononeka wijĩpĩle ujiale usitioononeka nunduu wa kukia ujiale usiitikia.

⁵⁴ Ĩpa gua uu wakoononeka pĩna ukijiala usiitioononeka, nunduu wa kukia pĩna ukijala usiitikia, ĩpaasio paapo lukikondeeligua ulukaani naalĩ luandĩkue, “Ukiu wamĩlaguaa muuduli.”

⁵⁵ “Wĩmpĩĩ ue nkia, uuduli waako?” “Wĩmpĩĩ ue nkia, uusungu waako.”

⁵⁶ uUsungu wankia ingĩ umulandu, ninguĩũ za mulandu ingi uUlagĩĩlio.

⁵⁷ Kumusongelie uNzua nwa kupĩĩle uduuli mwa kĩShekulu wĩĩtu Yesu Kilisito.

⁵⁸ Kuluulo gua anũna aane aloogua, mutũle akamu mulekishũngũsĩka, mwĩongeelekie kwitenda umulĩmo wa kĩShekulu intondo tũlũ zensi, mumanile kĩna mwa kĩShekulu umulĩmo waani namukakũ sika nakanda.