1 Akolinto 13 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uUloogua ingĩ kĩpeegua nakĩkulu nangũlũ

¹ Kanga ndikitie muntambo za antu nĩza amalaĩka, ĩpa ĩnumugila uuloogua, naazaa zĩ nkeng'enge nilĩla nĩnkĩnda nijuama.

² Kangĩ kanga ntũle nuunakĩdagu nuumane uunkũnkũ wensi nĩmasala mensi, kanga ntũle nuusuĩĩli zigi-zigi, nsũũme kwishamia sunga inkonko, malĩĩ numugila uuloogua, sikanĩkĩntu ĩne.

³ Kangĩ kanga mpũnie inshao zaane tũlũ zensi kukualĩĩsia ĩatũka, kanganĩpũnie umuĩlĩ waane nsonselue mumooto, malĩĩ numugila uuloogua sika nishaĩpĩla kakĩntu.

⁴ uUloogua ukutũla nuupolo, kuuzaa wa ukende, uuloogua ugila kawĩĩlũ, uuloogua sika ukiinansulaa katia kukĩkeema.

⁵ Sika ukĩkulagiaa sika ukudũũmaa ĩzaakue, sika ukuĩĩpĩlaguaa, sika ukualagiaa namabĩĩ,

⁶ sika ukulumbĩĩlagiaa uoononelani, ĩpa ukulumbaa palumuĩ nĩtai.

⁷ Ukĩtuĩkaa tũlũ, ukusuĩĩlaaa tũlũ ukulaaĩĩlaa tũlũ ukugigimĩlagiaa tũlũ.

⁸ uUloogua ugila kampelo; kanga wĩĩ ukoolĩ unakĩdagu wijilitũla nakanda; kanga zĩĩ zikoolĩ mtambo zijiliula; kanga wĩĩ ukoolĩ umuĩ wijilitũla nakanda.

⁹ Kuitĩ kulĩngile kwityũmpĩ udũũ, kangĩ kukuupũnagiaa uunakĩdagu kwityũmpĩ;

¹⁰ Ĩpa uukamĩnkĩĩlũ pĩnawaaza ĩmatũmpĩ mijilitũla nakanda.

¹¹ Pĩna alĩ numung'inia, ali nukutambulaa zĩ numung'inia, alĩnukulĩngaa zĩ numung'inia, alĩ nukusĩĩgaa zĩ numung'inia, kwipũna paapo pĩna nanĩĩ muntu mukulu, nanizileka ĩza kĩng'inia.

¹² Kuitĩ unzuauu kwiona zĩ mukĩlolelo kunzĩla ya ung'enua; ĩpa pityũngo liasio usiu kuusiu; unzuauu nĩngile kwityũmpĩ udũũ; ĩpa pityũngo liasio nijililĩngĩkia kĩna iio naalĩ numulĩngĩkigue.

¹³ Naukikyalaa gua usuĩĩli, ulaaĩĩli, uloogua, zozi nazitatu; nĩnalukulu muizi ingĩ uloogua.