1 Akolinto 12 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Ipeegua nayĩsiasia ya kĩnkoolo nuukamantani waao

¹ Mumpola za ipeegua ya kĩnkolo anũna aane, sika nsiiile mulekilĩnga.

² Mumanile kĩna pĩna alĩ muanakĩlungu, alĩ mukutualaguaa kuanzegamĩla nasika akulikitagiaa, iio kĩna alĩ muatongue.

³ Luulo gua numulĩngilie ya kĩna ukutilĩ nwitambula muMuau wa kĩNzua kwiũga, “Yesu wazũmilue!” Sunga ukutilĩ nusũũmile kwiũga, “ũYesu ingĩ Shekulu,” isiititũla muMuau Muelu.

⁴ Ukoolĩ wĩkĩlankĩli wa ipeegua, ĩpa uMuau uyo-uyoo;

⁵ Ukoolĩ wĩkĩlankĩli wa mĩlimo, ĩpaũShekulu uyo-uyo;

⁶ Ukoolĩ wĩkĩlankĩli wa kĩtuma umulĩmo, ĩpa uNzua uyouyoo ukuasũũmagiaa kwitenda ĩmĩlĩmo, yensi mutũlũ ensi.

⁷ Ĩpa wensi ukupeegaguaa uukũnukulua wa kĩMuau kukuasaĩpĩla nĩnaĩngĩ.

⁸ Kuitĩi umuĩ kwakĩMuau mupeegue lukaani lwa masala; umuua lukaani lwa umani kwa kĩMuau uyo-uuyoo.

⁹ umuua usuĩĩli mwa kĩMuau uyo-uuyoo; umuua ipeegua ya kukamia ĩaluĩle mwa kĩMuau uyo umuĩ;

¹⁰ uumua kwitenda makula; umuua unakĩdagu; umuua kwilekanula ya nkolo; umuua muntaambo nang'enda; umuua kwilondoosia intambo.

¹¹ Ĩpa ĩmĩlĩmo ĩĩ tũlũ yensi yĩkĩtumaguaa nuMuau uuyo umuĩ, nwioomolania muntu wensi muna muloele umuene.

Umania kwipũna mumpiani ya muĩlĩ.

¹² Kuiti kĩna iio umuĩlĩ ingĩ umuĩ, nduo utĩĩte pitũmpĩ piingĩ, nipitũmpĩ tũlũ pya muĩlĩ kanga ĩpingĩ noo, ingĩ muilĩ umuĩ dũũ; iio-iioo nuKilisito.

¹³ Kuitĩ mwa kĩMuau umuĩ ishie tũlũ alĩ kuabadĩĩzigue kutũle muĩlĩ umuĩ, malĩĩ kuAyahũdi katia kuAgiliki, malĩĩ kuasese katia kuakolelua; tũlũ kwakopiligue uMuau umuĩ.

¹⁴ Kuitĩ umuĩlĩ sika katũmpĩ kamuĩ, ĩpa pingĩ.

¹⁵ uMugulu kanga uũge, “Kunsooko ĩne sika numukono, ĩne sika na muĩlĩ; kunsooko ĩĩ sika wa muĩlĩine.”

¹⁶ Nukutuĩ kanga waũge, “Kunsooko ĩne sika nĩlĩĩso, ĩne sika na muĩlĩ; kunsooko ĩĩ sika wa muĩlĩne.”

¹⁷ Numuĩlĩ tũlũ kanga wĩĩ liiso, yĩĩlĩ mpĩĩ kwiiigia? Kanga umuĩlĩ tũlũ wĩĩ kutuĩ, yĩĩlĩ mpĩĩ kũnũnkia?

¹⁸ Ĩpa uNzua nupiĩĩkĩla ipitũmpi piensi mumuĩlĩ iio kĩna alusiiile.

¹⁹ Ĩpa gua, kanga tũlũ aza piĩ katũmpĩ kamuĩ, umuĩlĩ aza wijile kigyelela mpĩĩ?

²⁰ Ĩpaino gua, ipitũmpĩ ingĩ pingĩ, ĩpa umuĩlĩ ingĩ umuĩ.

²¹ Nĩliiso sika lĩsũũmile kukuuĩĩla umukono, “Sika nukukutumĩla ue;” sunga ityũe sika lĩsũũmile kukuĩĩĩla ĩmĩgulu, “Sika nukumutumĩla inie.”

²² Ĩpa nangũlũ gua, ipitũmpĩ ipya muĩlĩ napishĩĩgue kĩna pineketũ dũũ, piipio pishuiiilue nangũlũ.

²³ Nipiasio napishĩĩgĩlue kĩna pigila kikyulio kwapipeela ikyulio nangũlũ, nipityũmpĩ piĩtu napigila kauuza, pitĩĩte uloelia kwikĩlĩkĩĩla.

²⁴ Kuitĩ ipitũmpĩ piĩtu napitĩĩte uuza, sika pishiile uuloeelia, ĩpa uNzua nuukamantania umuĩlĩ, nukukukapeela ikyulio katũmpĩ kensi nakakeepeelue nuuuza;

²⁵ koona ilekitũla nuulekanuki mumuĩlĩ, ĩpa ipitumpĩ piĩ nuwĩgombia kukĩaalĩĩlia, katũmpĩ kensi nĩkĩĩa.

²⁶ Nĩpĩna katũmpĩ kamuĩ kaalaalika, pitumpĩ piensi napialaalĩka ndipio, nikatũmpĩ kamuĩ pĩna kakuligua, iio pitumpĩ piensi napilumba palumuĩ.

²⁷ Niniinie gua, mwatũlile muĩlĩ wa kĩKilisito, katũmpĩ kensi muna kĩĩmile.

²⁸ NuNzua waaĩĩkile ĩĩa mũkyanisa; ĩa muandio atumua, ĩa kabĩlĩ anakĩdagu, ĩa katatu amania nĩnaakutendaa ĩmakula, ĩakola ipeegua ya kukamia naaluĩle, nĩaalĩĩlia nĩatoongeeli nĩalikitia ntambo nang'enda.

²⁹ Tũlũ atumuane? Tũlũ anakĩdagune? Tũlũ amaniane? Tũlũ atenda makulane?

³⁰ Tũlũne atĩĩte ipeegua ya kukamia naaluĩle? Tũlũne ilikitia mtambo nang'enda? Tũlũne alondoosia ntambo?

³¹ Ĩkamatĩkiĩ kũligia iipeegua naiiza zigi-zigi. Nĩkangĩ numulagĩlĩĩle ĩnzĩla nanziiza kwikĩla tũlũ zensi.