យ៉ូហាន 18 - គម្ពីរ៍សញ្ញាត្មាយភាសាកួយកួយកបព្រះយេស៊ូវ (ម៉ាថាយ ជំពូក ២៦ ខ ៤៧ តក់ ៥៦ ម៉ាកុស ជំពូក ១៤ ខ ៤៣ តក់ ៥០ លូកា ជំពូក ២២ ខ ៤៧ តក់ ៥៣) 1 ពេលព្រះយេស៊ូវជ្មុងរោច ណាវប៉កចៀខាងទឹសជ្រោះកេដ្រុន រ៉ើសិស្សណាវ តេកអិងកើតស្រៃមូយ កឹព្រះយេស៊ូវណាវមូតចៀស្រៃអិងរ៉ើសិស្សណាវ 2 យូដាសបេកក្បត់ព្រះយេស៊ូវ ណាវស្គាល់បនអិងដែល ចូវរ៉ើព្រះយេស៊ូវរ៉ើសិស្សណាវជួបជុំឃ្នាតេកអិងរាល់ៗ 3 កឹយូដាសណាវនាំតេហៀនរ៉ូម៉ាំងមូយក្រុម រ៉ើបេកយាមប៉ហៀរនឺចចៀបនអិង បេកអិងកាន់ច្លុះ កាន់ចង្គេង រ៉ើកាន់មារ់ច្បាំង កឹបេកយាមប៉ហៀរអិងផង មេៗចួសចារ្យរ៉ើបេកផារិស៊ីនាក់ប៉្រើអនចៀ 4 ព្រះយេស៊ូវដិងប៉ាយ ណាវក្រៃកើតរើងយ៉ាំងអិង កឹណាវប៉កចៀមោះបេកអិងប៉ាយ៖ «ណា ម័ងចូវប៉ឺរង្កួយ?» 5 បេកអិងឆ្លើយប៉ាយ៖ «ហៃចូវប៉ឺរយេស៊ូវ បេកណាសារ៉ែត» កឹព្រះយេស៊ូវសួរប៉ាយ៖ «កឺណិងហឹយ យេស៊ូវ» កឹយូដាសបេកក្បត់ព្រះយេស៊ូវ ណាវកួរ៉ើបេកអិងដែល 6 ពេលព្រះយេស៊ូវសួរប៉ាយ “កឺណិងហឹយ” បេកអិងណាវថយក្រោយលាក់តឹងម៉ាត់ឃ្នា 7 ព្រះយេស៊ូវមោះបេកអិងទ័នប៉ាយ៖ «ណា ម័ងចូវប៉ឺរង្កួយ?» បេកអិងឆ្លើយប៉ាយ៖ «ហៃចូវប៉ឺរយេស៊ូវ បេកណាសារ៉ែត» 8 ព្រះយេស៊ូវសួរទ័នប៉ាយ៖ «កឺសួរម័ងហើយតើប៉ាយ កឺណិងហឹយ យេស៊ូវ បើម័ងចូវប៉ឺរកឺ អនសិស្សណិងផងលោះចៀ» 9 ព្រះយេស៊ូវសួរយ៉ាំងអិង ក្រៃរ៉ើពាក្យលឹមណាវសួរប៉ាយ “បេកលឹមម៉ៃអនចូវកឺ ម៉ឹកើតង្កួយនាប៉ឹតប៉ុងអឺ” 10 កឹស៊ីម៉ូនពេត្រុសណាវកើតដាវមូយ កឹណាវហូតដាវប៉ាច់បេកប៉ម្រើចួសចារ្យពឺតទឹតហ្លាក្តោរខាងតាំ បេកប៉ម្រើអិងជ្រមោះ ម៉ាលកុស 11 ព្រះយេស៊ូវសួរពេត្រុសប៉ាយ៖ «សួកដាវដាក់ឡឹងស្រោមចៀក្រោយចៀ ណា ម៉ៃគឹតប៉ាយ កឺម៉ឹព្រ័មទទោលអែលរើងកាំប៉បាករ៉ើអូវកឺវ៉ាក?» 12 កឹតេហៀន មេតេហៀន រ៉ើបេកយាមប៉ហៀរ ណាវនាំឃ្នាកបសាត់ព្រះយេស៊ូវ 13 បឺនកឹណាវនាំព្រះយេស៊ូវចៀចួសអាណញោង ច្បោះចួសអិងណាវអូវក្មេកចួសកៃផា ក្មអិងចួសកៃផាណាវវ័ចួសចារ្យពឺត 14 ចួសកៃផាណិងហឹយ លឹមសួរបេកដឹកនាំបេកយូដាប៉ាយ “បើកើតកួយមូយណាក់ក្ចែតជំលោសកួយហៃតឹងម៉ាត់ រ័កហឺយ”។ ចួសពេត្រុសម៉ឹទទោលស្គាល់ព្រះយេស៊ូវ (ម៉ាថាយ ជំពូក ២៦ ខ ៦៩ តក់ ៧០ ម៉ាកុស ជំពូក ១៤ ខ ៦៦ តក់ ៦៨ លូកា ជំពូក ២២ ខ ៥៤ តក់ ៥៧) 15 ស៊ីម៉ូនពេត្រុសរ៉ើសិស្សមូយណាក់ទ័ន ណាវប៉កតូនព្រះយេស៊ូវ កឹសិស្សមូយណាក់អិងចួសចារ្យពឺតស្គាល់ណាវដែលអឺ កឹសិស្សអិងណាវមូតចៀឡឹងឡូដុងចួសចារ្យពឺតរ៉ើព្រះយេស៊ូវ 16 ម៉ងពេត្រុសណាវត្យឹងកួខាងក្រាវតេកទ្វារ កឹសិស្សមូយណាក់លឹមចួសចារ្យពឺតស្គាល់ ណាវលោះចូវជ្មុងរ៉ើបេកយាមទ្វារ កឹណាវនាំពេត្រុសមូត 17 ក្រប៉ៃយាមទ្វារណាវមោះពេត្រុសប៉ាយ៖ «ណា ម៉ៃម៉ឹមេនសិស្សកួយទោក់វ៉ាក?» ពេត្រុសឆ្លើយប៉ាយ៖ «ទេ ម៉ឹមេនអឺ» 18 បេកប៉ម្រើចួសចារ្យពឺត រ៉ើបេកយាមប៉ហៀរណាវតៀសអ៊ូសហែង ចូវរ៉ើម្សាអិងច្កក កឹពេត្រុសណាវត្យឹងហែងអ៊ូសរ៉ើបេកអិងដែល។ ចួសចារ្យពឺត ជ្រមោះអាណមោះចម្លើយព្រះយេស៊ូវ (ម៉ាថាយ ជំពូក ២៦ ខ ៥៩ តក់ ៦៦ ម៉ាកុស ជំពូក ១៤ ខ ៥៥ តក់ ៦៤ លូកា ជំពូក ២២ ខ ៦៦ តក់ ៧១) 19 ចួសចារ្យពឺតណាវមោះព្រះយេស៊ូវប៉ាយ៖ «ង្កួយនឺចសិស្សម៉ៃ? ម៉ៃពង្រេនកួយយ៉ាំងនានឺច?» 20 ព្រះយេស៊ូវឆ្លើយរ៉ើចួសអិងប៉ាយ៖ «កឺប៉្រកាសសួរកួយតេកបនកួយក្លឹង កឹកឺពង្រេនកួយតេកសាលាប៉្រជុំ រ៉ើឡឹងឡូប៉ហៀរ បនបេកយូដាតឹងម៉ាត់ជួបជុំឃ្នា កឺម៉ឹដែលជ្មុងន្ទ័ផ្សួនរ៉ើកួយអឺ 21 កើតន្ទ័បឺនម៉ៃមោះកឺ? ម៉ៃមោះបេកលឹមច្ងាត់កឺចៀ ច្បោះបេកអិងណាវដិងដែលអឺប៉ាយ កឺសួរយ៉ាំងនានឺច» 22 កឹកើតបេកយាមប៉ហៀរមូយណាក់ត្យឹងបៀតព្រះយេស៊ូវ ពេលណាវសង់ព្រះយេស៊ូវប៉ាយយ៉ាំងអិង ណាវទះកំផ្លៀងព្រះយេស៊ូវ កឹណាវមោះព្រះយេស៊ូវប៉ាយ៖ «កើតន្ទ័បឺនម៉ៃឆ្លើយរ៉ើចួសចារ្យពឺតយ៉ាំងណិង?» 23 ព្រះយេស៊ូវឆ្លើយប៉ាយ៖ «បើកឺជ្មុងលោស សួរកឺចូវ ម៉ងបើកឺជ្មុងក្រៃ កើតន្ទ័បឺនម៉ៃទះកឺ?» 24 ព្រះយេស៊ូវណង់សាត់លឹមៗ កឹចួសអាណណាវអនកួយអែលព្រះយេស៊ូវចៀចួសចារ្យពឺត ជ្រមោះកៃផា។ ចួសពេត្រុសម៉ឹទទោលស្គាល់ព្រះយេស៊ូវទ័ន (ម៉ាថាយ ជំពូក ២៦ ខ ៧១ តក់ ៧៥ ម៉ាកុស ជំពូក ១៤ ខ ៦៩ តក់ ៧២ លូកា ជំពូក ២២ ខ ៥៨ តក់ ៦២) 25 ពេលស៊ីម៉ូនពេត្រុសកម្ពុងកឹត្យឹងហែងអ៊ូស កួយមោះប៉ាយ៖ «ណា ម៉ៃម៉ឹមេនសិស្សកួយទោក់វ៉ាក?» ពេត្រុសណាវប៉្រកែកប៉ាយ៖ «ទេ ម៉ឹមេនអឺ» 26 កឹកើតបេកប៉ម្រើចួសចារ្យពឺតមូយណាក់ ណាវសែមសាយរ៉ើចួសលឹមពេត្រុសប៉ាច់ទឹតហ្លាក្តោរ ណាវជ្មុងប៉ាយ៖ «កឺពើកម៉ៃកួឡឹងស្រៃរ៉ើកួយអិងដែលអឺ» 27 ពេត្រុសណាវប៉្រកែកម៉្រងទ័ន ហ្លាក់កឹន្ទ្រោយត្ការ់កឺក។ ព្រះយេស៊ូវកួព្នេកចៅហ្វាយ ខែត ជ្រមោះពីឡាត់ (ម៉ាថាយ ជំពូក ២៧ ខ ១ តក់ ១៤ ម៉ាកុស ជំពូក ១៥ ខ ១ តក់ ៥ លូកា ជំពូក ២៣ ខ ១ តក់ ៥) 28 បេកដឹកនាំបេកយូដាណាវនាំព្រះយេស៊ូវលោះរ៉ើដុងចួសកៃផា ចៀមន្ទីរ៍តេហៀន គ្មុងអិងប្រាងរាងស្រើងៗហឺយ កឹបេកអិងណាវម៉ឹមូតចៀឡឹងមន្ទីរ៍អិងអឺ ចូវរ៉ើណាវតួងលោសរ៉ើព្រះ ម៉ឹបឺនង័ចចាតេកត្ងៃរំលឹករ៉ើរើងលឹមព្រះពឺតរំល័ងដុងនាលាបហាមកនចៀម 29 កឹចួសពីឡាត់ណាវលោះចូវក្រាវ ណាវមោះបេកអិងប៉ាយ៖ «ណា កួយណិងវ័ន្ទ័លោស បឺនម័ងកបចូវអនកឺ?» 30 បេកអិងឆ្លើយប៉ាយ៖ «បើកួយណិងម៉ឹបឺនវ័លោស ហៃម៉ឹកបចូវអនម៉ៃអឺ» 31 កឹចួសពីឡាត់សួរបេកអិងប៉ាយ៖ «ម័ងអែលណាវចៀដាក់ទោសតូនច្បាប់ម័ងចៀ» ម៉ងបេកអិងឆ្លើយប៉ាយ៖ «កួយណិងក្រៃកម្ចែត ម៉ងហៃម៉ឹកើតសិទ្ធិកម្ចែតកួយអឺ» 32 បេកអិងណាវប៉ាយយ៉ាំងអិង ក្រៃរ៉ើពាក្យលឹមព្រះយេស៊ូវសួររ៉ើរើងណាវក្រៃក្ចែតយ៉ាំងនា។ 33 ចួសពីឡាត់ណាវមូតចៀមន្ទីរ៍ចៀក្រោយ កឹណាវក្យាព្រះយេស៊ូវចូវ បឺនកឹណាវមោះប៉ាយ៖ «ណា ម៉ៃស្ដាច់បេកយូដាវ៉ាក?» 34 កឹព្រះយេស៊ូវមោះចៀក្រោយប៉ាយ៖ «ណា ម៉ៃប៉ាយកឺយ៉ាំងណិង ចូវរ៉ើម៉ៃប៉្ទាល់ រ៉ើកួយសួរម៉ៃ?» 35 ចួសពីឡាត់សួរប៉ាយ៖ «កឺម៉ឹមេនបេកយូដាអឺ បេកយូដាឃ្នាម៉ៃ រ៉ើមេៗចួសចារ្យតើ ណាវនាក់អែលម៉ៃចូវអនកឺ ណា ម៉ៃវ័ន្ទ័បឺនកួយកបម៉ៃ?» 36 ព្រះយេស៊ូវសួរប៉ាយ៖ «កឺម៉ឹមេនយ៉ាំងស្ដាច់ឡឹងក្តែកណិងអឺ បើកឺយ៉ាំងស្ដាច់ឡឹងក្ដែកណិង ច្បាស់កឹបេកប៉ម្រើកឺណាវនាំឃ្នាច្បាំង ម៉ឹអនកួយកបកឺអែលចៀអនបេកដឹកនាំបេកយូដាអឺ ម៉ងកឺម៉ឹមេនយ៉ាំងស្ដាច់ឡឹងក្តែកណិងអឺ» 37 ចួសពីឡាត់ជ្មុងប៉ាយ៖ «បើយ៉ាំងអិង ម៉ៃស្ដាច់ដែលតើ» កឹព្រះយេស៊ូវសួរប៉ាយ៖ «ម៉ៃប៉ាយកឺស្ដាច់ ក្រៃហឺយ កឹកឺចូវកើតឡឹងក្តែកណិង ចូវសួរកួយរើងពឹត កួយនាកើតចូវរ៉ើរើងពឹត កួយអិងច្ងាត់កឺ» 38 ចួសពីឡាត់ជ្មុងប៉ាយ៖ «រើងពឹតរើងប៉ាច់ន្ទ័តូស»។ ពេលចួសពីឡាត់ប៉ាយយ៉ាំងអិងរោច ណាវលោះចៀជួបរ៉ើបេកយូដាទ័ន កឹណាវសួរប៉ាយ៖ «កឺម៉ឹពើកកួយណិងវ័ន្ទ័លោសអឺ កួយប៉ាយក្រៃកម្ចែតព្រះយេស៊ូវ (ម៉ាថាយ ជំពូក ២៧ ខ ១៥ តក់ ៣១ ម៉ាកុស ជំពូក ១៥ ខ ៦ តក់ ២០ លូកា ជំពូក ២៣ ខ ១៣ តក់ ២៥) 39 តូនទំលាប់ អនកឹត្ងៃរំលឹករ៉ើរើងណិង កឺក្រៃប៉្រោសបេកទោសមូយណាក់អនម័ង យ៉ាំងអិង ម័ងស្អៀអនកឺប៉្រោសស្ដាច់បេកយូដាវ៉ាក?» 40 កឹកួយណាវនាំឃ្នាច្រេកប៉ាយ៖ «ញ្ជ័ក់ប៉្រោសកួយណិង ប៉្រោសបារ៉ាបាសចៀ» កឹបារ៉ាបាសអិង ណាវបេកប៉្លន់កួយ។ |
© 2020, Wycliffe Bible Translators, Inc. All rights reserved.
Wycliffe Bible Translators, Inc.