YAYA 7 - Kenyah New Testament

Yesus ngan diaʹ cenganak ke

¹ Lepa ina tai Yesua masat kaʹ tanaʹ Galilia. Abeʹ e ubaʹ masat kaʹ tanaʹ Yudia uban diaʹ lataʹ lepoʹ Yahudi pekimet ubaʹ ke lematai ia.

² Uban nyeng laʹa lepoʹ Yahudi ke uyan Adet Bunut pekimet puyan udip de neng lepau cen naʹaʹ are,

³ ina ukoʹ cenganak laki Yesus kuma ha neng ia: “Mecin ne ikoʹ cen ini. Tai palaʹ lepoʹ Yudia apan diaʹ bayaʹ katuk koʹ ke taʹan diseʹ puyan gayeng iaʹ ikoʹ uyan.

⁴ Abeʹ un aheʹ nyuhuk pemuyan ne buk ke ubaʹ dulu ke tisen neng ia. Buk lan ncoʹ ti puyan nyingan ini, talan ne dulu mung tisen ikoʹ.”

⁵ Pa abeʹ diaʹ cenganak Yesus pe abeʹ un ngelan neng ia.

⁶ Dau Yesus mida: “Abeʹ un sukung neng penekep keʹ nai lepe. Ikem sepe, mele midan midan iaʹ tekep neng ikem ne.

⁷ Abeʹ dulu kusun tanaʹ ini miʹi neng ikem, un sepuʹo miʹi re neng akeʹ, uban nceʹ lemuto badaʹ uban pemuyan ne iaʹ jaʹat.

⁸ Tai ne ikem neng Adet Bunut ina. Abeʹ keʹ un ketai, uban abeʹ un sukung kaʹ penekep keʹ ke tai lepe.”

⁹ Ia pisiu pekini ngan sulo ho ngelineʹ kaʹ tanaʹ Galilia.

Yesus kaʹ Adet Bunut neng puyan lepau cen naʹaʹ

¹⁰ Uʹo lepa ketai cenganak Yesus palaʹ Adet Bunut ina are, tai lete Yesus pe. Abeʹ e un peluhaʹ ia tai, un sepuʹo nyuhuk le ketai ie.

¹¹ Tegoʹ Adet Bunut ina, un diaʹ lataʹ Yahudi pita Yesus. Un dau re lemutu dulu: “Kempi ie?”

¹² Dalau peng bioʹ, aleʹ dau dulu pisiu selem neng puyan Yesus. Un dau palai iaʹ kuma ha: “Tiga laki ini.” Un dau palai laʹa: “Abeʹ e tiga. Ina ha panyi dulu.”

¹³ Un sepuʹo abeʹ un ca iaʹ luhaʹ dau pisiu puyan ne uban nte takut diaʹ lataʹ lepoʹ Yahudi.

¹⁴ Nyeng ke pa beluaʹ Adet Bunut ina, tai kun Yesus pejakaʹ Umaʹ Palan ngan penco katuk me dulu.

¹⁵ Salam aleʹ tekaʹ diaʹ lataʹ lepoʹ Yahudi dina: “Kumpin ketai laki ini bioʹ aleʹ aleʹ penisen ne, buk ke nyahut te abeʹ un sekula ne?”

¹⁶ Un dau Yesus mipa: “Katuk iaʹ akeʹ penco ini, abeʹ e anun nceʹ tengen, un sepuʹo anun Allah iaʹ cuk akeʹ nai.

¹⁷ Aheʹ iaʹ un tekaʹ kimet ubaʹ ke ti pengubaʹ Allah, kelunan ina iaʹ ke tisen cen mpi kenai katuk keʹ, atek cen Allah buk ke are cen penyukat ceʹ tengen.

¹⁸ Kelunan aheʹ iaʹ pisiu man pengubaʹ a tengen, seʹ e ubaʹ pada ia loʹ. Un sepuʹo aheʹ iaʹ ubaʹ pada mia iaʹ cuk ia nai, laki ina iaʹ telit kimet, abeʹ un inu iaʹ palo neng ia.

¹⁹ Un Musa lepa naʹ adet mikem mo? Un sepuʹo abeʹ un ca usa mikem iaʹ atek bayaʹ adet ina. Inu adeʹ kem ubaʹ mita janan man lematai akeʹ?”

²⁰ Un dau dulu diaʹ kadoʹ dina mipa: “Un bali neng ikoʹ. Aheʹ iaʹ mita janan ubaʹ ke lematai ikoʹ tupe?”

²¹ Dau Yesus mipa ida: “Un ca puyan iaʹ bioʹ akeʹ lepa ti, ngan ikem mung iaʹ salam kidi.

²² Musa iaʹ cuk ikem ti adet sunat neng anak laki hem. (Naʹ pe ia pekina, abeʹ e Musa iaʹ nading nge, un sepuʹo tepun ncem cen naʹaʹ te iaʹ nading adet ini me ikem.) Ina ukoʹ kem uyan adet sunat me anak laki hem tegoʹ Tau Kelineʹ.

²³ Ikem nyunat anak laki hem tegoʹ Tau Kelineʹ apan ncem abeʹ un ke ngesa adet Musa. Buk pekina, inu adeʹ kem miʹa neng akeʹ uban nceʹ pedaʹam paget ca kelunan tegoʹ Tau Kelineʹ?

²⁴ Ayen pebetep tiraʹ neng kelunan bayaʹ diseʹ puyan nte tuaʹ le. Pebetep ne tiraʹ bayaʹ puyan iaʹ teneng lan.”

Ia iaʹ ngkang pungu udip taʹin?

²⁵ Un dau palai kelunan lepoʹ Yerusalim: “Maaʹ ini laki iaʹ ida ubaʹ ke lematai are.

²⁶ Naʹat seʹ e, neng peng tuaʹ ne ia pisiu, ngan abeʹ un aheʹ iaʹ pisiu inu inu ke nyakat dau ue ne. Masaʹ diaʹ lataʹ lataʹ pe tisen lan ini ne Keristus iaʹ ngkang pungu udip?

²⁷ Tegoʹ Laki iaʹ ngkang pungu udip ina nai, ca usa pe abeʹ un tisen cen mpi ie. Un sepuʹo tisen mung ne ilu cen mpi uban kenai laki ini are.”

²⁸ Dalau Yesus pekatuk kaʹ dalem Umaʹ Palan Allah, bioʹ dau ue lemutu dulu: “Un ncem tisen akeʹ lan mo? Ngan un ncem tisen cen mpi kenai heʹ? Abeʹ keʹ nai man kimet ceʹ tengen. Naʹ pe pekina, ia iaʹ telit lan, ia iaʹ cuk akeʹ nai. Abeʹ kem tisen ia lepe.

²⁹ Akeʹ iaʹ tisen ia, uban akeʹ iaʹ nai cen ia, ngan ia iaʹ cuk akeʹ nai.”

³⁰ Penco re mita janan ubaʹ ke dakep ia, un sepuʹo ca usa pe abeʹ un mekem ujoʹ o neng ia, uban neng jakaʹ iaʹ penekep pe abeʹ melai nai lepe.

³¹ Un sepuʹo kadoʹ dulu diaʹ pepeng kina ke ngelan neng Yesus, ngan ida kuma ha: “Tegoʹ Laki iaʹ ngkang pungu udip nai ʹo, un ne ti puyan nyingan iaʹ lapa cen puyan nyingan iaʹ laki ini lepa ti ne taʹin?”

Ida cuk sedadu nai dakep Yesus

³² Kelunan Perisi kenahan dau dulu pisiu selem neng puyan ini are, ina ukoʹ de tai pemung ngan diaʹ detaʹu lataʹ ke cuk sedadu tai mapo Yesus.

³³ Un dau Yesus: “Abeʹ keʹ kumpin majan ke ngan ncem laʹa, uban nceʹ ketai mecin ikem, tai palaʹ ia iaʹ cuk akeʹ nai.

³⁴ Ikem ke pita heʹ ʹo, di le reʹ abeʹ kem senteng ke taʹan akeʹ pe, uban kempi ketai heʹ, abeʹ kem senteng tai.”

³⁵ Kelunan lataʹ lepoʹ Yahudi pisiu kahang ida selepeʹ: “Kempi ia ketai iaʹ ukoʹ le abeʹ un senteng ke taʹan ia tupe? Un ne ubaʹ tai ngan lepoʹ ilu Yahudi diaʹ mudip kaʹ lepoʹ Gerika taʹin, ngan penco pekatuk dulu kaʹ lepoʹ Gerika?

³⁶ Uban dau ue: ‘Ikem pita heʹ ʹo, di le reʹ abeʹ kem senteng ke taʹan akeʹ, ngan abeʹ kem senteng tai kukoʹ keʹ ne.’ Inu sen iaʹ baʹan ne tupe?”

Sungai Sio

³⁷ Neng kebayaʹ tau Adet Bunut, ina ne iaʹ atek tau pengesin ne, tau ina ne Yesus nekejeng ngan pisiu bioʹ dau iaʹ kuma ha: “Aheʹ kelunan iaʹ muʹang, tiga ne ia nai palaʹ akeʹ ngan nisep.

³⁸ Ukoʹ baʹan dau dalem Kitap: ‘Aheʹ kelunan iaʹ ngelan neng akeʹ, cen dalem penawai ie kenai kalo sungai iaʹ nyio ke ngkin udip.’ ”

³⁹ Yesus pisiu ini neng puyan Berua Tuhan, uban aheʹ kelunan diaʹ ngelan neng ia, ida iaʹ ke alaʹ Berua ini ʹo. Tegoʹ Yesus pisiu ini, abeʹ Tuhan naʹ Berua ini lepe, uban abeʹ lepe Yesus luhaʹ ngan serema peniga ha.

Tekajaʹ kimet dulu

⁴⁰ Kadoʹ dulu diaʹ kenahan dau ini iaʹ kuma ha: “Laki ini ne iaʹ atek pegawa bioʹ lan.”

⁴¹ Dau palai: “Ia iaʹ Keristus iaʹ ngkang pungu udip.” Un sepuʹo un dau palai pelaʹa: “Abeʹ Keristus un nai cen Galilia.

⁴² Un dau dalem Kitap iaʹ badaʹ Keristus iaʹ ke nai cen mela Daut, ngan nai pempet kaʹ lepoʹ Bitlahim, kukoʹ Daut mudip cen naʹaʹ.”

⁴³ Ina ukoʹ tai tekajaʹ kimet dulu diaʹ kadoʹ uban kuʹun ne.

⁴⁴ Un pe palai ubaʹ mapo ia, un sepuʹo pabeʹ ca usa pe abeʹ un mekem ujoʹ de neng ia.

Puyan diaʹ lataʹ Yahudi muau

⁴⁵ Tegoʹ sedadu dina tai uleʹ, kun diaʹ detaʹu lataʹ ngan diaʹ Perisi dina lemutu ida: “Inu adeʹ kem abeʹ un ngkin Yesus?”

⁴⁶ Un dau sedadu dina mipa: “Abeʹ un aheʹ iaʹ pisiu kuaʹ puyan laki ini lepe.”

⁴⁷ Un dau Perisi dina lemutu: “Un uban ne peduncau ikem lete ina?

⁴⁸ Kumpin, un ncem tisen ca usa mameʹ diaʹ lataʹ, mele ca usa mameʹ diaʹ Perisi ngelan neng ia mo?

⁴⁹ Kelunan kadoʹ dini abeʹ de tisen Katuk Adet Musa, uban nte bang kentaʹ pudoʹ Allah tuaʹ le.”

⁵⁰ Nikudimus lete ca usa Perisi dina, ia lete iaʹ lepa tai taʹan Yesus cen kena re, un dau ue mida:

⁵¹ “Bayaʹ adet le abeʹ le senteng metep ukum neng ca kelunan, kena le kenahan dau ue, ngan nugen inu iaʹ ban pemuyan ne iaʹ ia lepa uyan.”

⁵² Un dau re mipa ia: “Kumpin, ikoʹ lete ca nai cen Galilia mo? Nugen ne tiraʹ dalem Kitap, idi hoʹ tisen nyahut ca pegawa pe abeʹ un nai cen Galilia.”