YAYA 4 - Kenyah New Testament

Yesus ngan ca leto lepoʹ Samaria

¹ Kelunan diaʹ Perisi kenahan dau denga puyan kadoʹ dulu diaʹ penat bayaʹ katuk Yesus cen ʹo Yaya, penco re alaʹ batis kuʹun ne.

² (Iaʹ lan ne, abeʹ usa Yesus tengen iaʹ ngebatis dulu, bang diaʹ bayaʹ katuk ke le iaʹ ti.)

³ Midan Yesus kenahan dau isiu ina, sulo ketai ie mecin tanaʹ Yudia ngan tai uleʹ palaʹ tanaʹ Galilia.

⁴ Neng janan ne kina atek ke tai ngedalau dale Samaria.

⁵ Nai Yesus abeʹ kaʹ ca lepoʹ Samaria iaʹ ngadan ne Sikar, iaʹ abeʹ un coʹ cen lasan iaʹ Yakup lepa naʹ me anak ke Yusup cen naʹaʹ re.

⁶ Kina pe un lubang sungai Yakup. Kenai Yesus abeʹ kina tegoʹ beluaʹ tau, ngan lelat tekaʹ a masat. Penco ho madung kata lubang sungai ina.

^7-8 Ngajan ketai diaʹ bayaʹ katuk ke kaʹ lepoʹ, tai lemeli penguman, idi kenai ca leto Samaria ke alaʹ sungai kaʹ lubang ina. Un dau Yesus neng ia: “Naʹ ne sungai makeʹ, akeʹ nisep ading.”

⁹ Un dau leto Samaria ina mipa ia: “Ikoʹ ca kelunan lepoʹ Yahudi, ngan akeʹ ca leto lepoʹ Samaria. Moʹ inu senteng ngkoʹ nyat tisep neng akeʹ?” (Abeʹ lepoʹ Yahudi ubaʹ pekelet inu re ngan lepoʹ Samaria.)

¹⁰ Un dau Yesus mipa ia: “Awaʹ pe ikoʹ tisen inu iaʹ Allah naʹ me kelunan, ngan tisen aheʹ keʹ iaʹ nyat tisep neng ikoʹ ne, atek koʹ ke nyat neng ia lete, ngan ia pe naʹ sungai iaʹ mudip mikoʹ.”

¹¹ Un dau leto ina pisiu Yesus: “Amai, abeʹ un kadai hoʹ, ngan dalem aleʹ lubang sungai ini. Kempi uban ncoʹ alaʹ sungai mudip ina tupe?

¹² Tepun meʹ Yakup iaʹ naʹ lubang sungai ini mameʹ. Usa ha pe nisep sungai ini, ngan diaʹ anak, ngan pekina pe pakan ne. Ikoʹ kuma ikoʹ iaʹ ke pelapa bioʹ cen Yakup tupe?”

¹³ Un dau Yesus mipa ia: “Aheʹ kelunan diaʹ nisep sungai ini, atek de ke muhang lete laʹa.

¹⁴ Un sepuʹo aheʹ kelunan diaʹ nisep sungai iaʹ akeʹ naʹ ne, abeʹ de ke muhang laʹa. Sungai iaʹ akeʹ ke naʹ me kelunan, ina iaʹ nuyan seleket lubang tebut iaʹ peluput sungai mudip kaʹ dalem penawai ie, ngan naʹ udip saheʹ kelineʹ iaʹ ngeriman mia.”

¹⁵ Un dau leto ina pisiu Yesus: “Amai, naʹ ne sungai ina makeʹ, inu pe ninco heʹ nai alaʹ sungai kini laʹa ʹo.”

¹⁶ Kun Yesus badaʹ me leto ina: “Tai ne mengin laki hoʹ te, ngan ngkin ia uleʹ kini.”

¹⁷ Un dau leto ina pisiu mia: “Abeʹ un laki heʹ.” Un dau Yesus neng ia laʹa: ‘Lan dau hoʹ kuma ikoʹ abeʹ un laki,

¹⁸ un sepuʹo lepa ne ikoʹ pepeto ngan lema usa laki, ngan un laki iaʹ ngelineʹ ngan ncoʹ naʹkini ne, abeʹ ina atek laki hoʹ lan. Ikoʹ badaʹ makeʹ lan.”

¹⁹ Dau leto ina neng Yesus laʹa: “Amai, akeʹ taʹan ikoʹ ca pegawa bioʹ.

²⁰ Un tepun meʹ lepoʹ Samaria lemameʹ Allah kusun mudung ini, un sepuʹo ikem kelunan Yahudi pisiu kaʹ Yerusalim kukoʹ ilu tekep lemameʹ Allah.”

²¹ Un dau Yesus neng leto ina: “Tiga hoʹ ngelan dau heʹ ne, atek nai lete tau tegoʹ kelunan ke lemameʹ Amai Bioʹ, abeʹ e kaʹ mudung ini, ngan abeʹ e kaʹ Yerusalim pe.

²² Abeʹ kem lepoʹ Samaria tisen lan aheʹ iaʹ ikem ke lemameʹ. Ameʹ Yahudi tisen aheʹ iaʹ ameʹ lemameʹ. Uban puyan iaʹ ke pudip kelunan nai cen lepoʹ Yahudi.

²³ Un sepuʹo jakaʹ iaʹ ke nai uʹo ini, lepa un ne luhaʹ naʹkini, tegoʹ diaʹ lemameʹ lan, ke lemameʹ Amai Bioʹ man berua re ngan katuk iaʹ telit. Un kelunan diaʹ lemameʹ pekini puyan, ida dina iaʹ Amai Bioʹ ubaʹ lemameʹ palaʹ ia.

²⁴ Allah ne iaʹ atek Berua, ngan aheʹ diaʹ lemameʹ neng ia, atek de ke lemameʹ dalem berua re, peging ngan katuk iaʹ telit.”

²⁵ Un dau leto ina neng ia: “Tisen nceʹ uban Mesias, iaʹ ilu pisiu Keristus ne, atek ke nai ʹo. Buk ke nai, tegoʹ ina ha ke badaʹ mung naʹan inu milu.”

²⁶ Un dau Yesus mipa ia: “Akeʹ ne ia, iaʹ pisiu ngan ncoʹ naʹkini ne.”

²⁷ Tegoʹ ina, uleʹ ne diaʹ bayaʹ katuk Yesus ne, ngan atek tecu tekaʹ de taʹan Yesus pisiu ngan ca leto. Un sepuʹo pabeʹ ca usa pe abeʹ un kuma ha neng leto ina: “Inu iaʹ ikoʹ ubaʹ nyat neng Yesus tupe?” Pekina lete abeʹ un aheʹ lemutu neng Yesus kuma ha: “Inu adeʹ koʹ pisiu ngan ne?”

²⁸ Kun leto ina mahung tajau sungai ie, penco tai uleʹ kaʹ lepoʹ o ngan pisiu me dulu kina:

²⁹ “Un cha kelunan iaʹ badaʹ mung uban pemuyan nceʹ cen kena. Nai ne ikem naʹat ia ading. Un ne Kristus iaʹ ngkang pungu udip taʹin?”

³⁰ Sulo ketai re mecin lepoʹ ina ngan tai palaʹ Yesus.

³¹ Ngajan ina lete diaʹ bayaʹ katuk Yesus temesen dau neng ia: “Guru, uman ading.”

³² Un sepuʹo dau Yesus mipa ida: “Un lete penguman akeʹ uman iaʹ ikem abeʹ un tisen.”

³³ Sulo diaʹ bayaʹ katuk ke dina lemutu ida selepeʹ: “Un aheʹ nai ngkin penguman mia taʹin?”

³⁴ Kun Yesus pisiu mida: “Penguman nceʹ ne keti bayaʹ pengubaʹ kimet ia iaʹ cuk akeʹ nai, ngan pedaʹam gayeng iaʹ ia cuk akeʹ ti.

³⁵ Un dau ca isiu hem iaʹ kuma ha: ‘Pat bulan laʹa, ina meʹ majau.’ Un sepuʹo dau heʹ badaʹ mikem, ikem nugen naʹat diseʹ uma le ne ading, lepa mesak ne diseʹ padai iaʹ ilu tenup ke majau.

³⁶ Kelunan diaʹ majau, ida iaʹ alaʹ suaʹ a, ngan ngkin padai seleket kelunan neng udip saheʹ kelineʹ iaʹ ngeriman, apan kelunan iaʹ nugan ngan kelunan iaʹ majau pemung le bangen.

³⁷ Un ca isiu iaʹ lan iaʹ kuma ha: ‘Ca kelunan iaʹ nugan, un pe ca naʹan kelunan iaʹ majau.’

³⁸ Akeʹ cuk ikem tai majau neng ca uma iaʹ ikem abeʹ un pegayeng cen kena. Un kelunan diaʹ ca iaʹ pegayeng kina, ngan ikem iaʹ ke alaʹ bang cen gayeng nte.”

³⁹ Kadoʹ kelunan lepoʹ Samaria ngelan neng Yesus uban kuʹun leto idai lepa pisiu iaʹ kuma ha: “Ia badaʹ ketoʹ pemuyan nceʹ iaʹ akeʹ ti cen kena.”

⁴⁰ Ina ukoʹ dalau kenai lepoʹ Samaria dina palaʹ Yesus, kun nte ngelapen dau mapo ia ngelineʹ ngan nte. Sulo Yesus ngelineʹ ngan nte kina dua tau.

⁴¹ Kadoʹ kuʹo ke diaʹ ngelan Yesus kuʹun katuk ke.

⁴² Un dau re neng leto idai: “Naʹ kini ameʹ ngelan neng Yesus, abeʹ e kuʹun dau hoʹ badaʹ mameʹ le, un sepuʹo ameʹ tengen lepa kenahan dau ue, ngan tisen lan ban ia iaʹ atek Laki iaʹ keniga udip kelunan kusun tanaʹ ini.”

Yesus paget anak ca kelunan iaʹ pengebioʹ perinta

⁴³ Lepa dua tau Yesus kina, sulo ho mecin tai kaʹ Galilia.

⁴⁴ Uban Yesus tengen lepa badaʹ: “Abeʹ kelunan nyelama pegawa kaʹ lepoʹ o loʹ.”

⁴⁵ Un sepuʹo tegoʹ ketai Yesus abeʹ kaʹ Galilia, kadoʹ dulu nyelama alaʹ ia, uban ida diaʹ lepa tai naʹat Bunut Paska kaʹ lepoʹ Yerusalim are, ngan ida lepa taʹan ketoʹ pemuyan iaʹ Yesus lepa ti dalau Bunut Paska ina.

⁴⁶ Sulo ketai Yesus uleʹ palaʹ lepoʹ Kana kaʹ tanaʹ Galilia, iaʹ kukoʹ o pekaliu sungai tai nuyan telang buaʹ anggur are. Kina un ca laki iaʹ pengebioʹ perinta, un anak ke sakit kaʹ Kapernaum.

⁴⁷ Tegoʹ o kenahan dau denga Yesus nai uleʹ cen tanaʹ Yudia tai palaʹ tanaʹ Galilia, penco ketai laki ina palaʹ Yesus, ngan mengin ia nai kaʹ lepoʹ Kapernaum ngan paget anak ke.

⁴⁸ Un dau Yesus neng ia: “Pabeʹ ca usa mikem pe abeʹ un ngelan buk kem abeʹ un taʹan puyan nyingan ngan iaʹ salam diseʹ.”

⁴⁹ Un dau laki pengebioʹ perinta ina neng ia: “Amai, nai ne serengan akeʹ ayen anak keʹ ke matai le ʹo.”

⁵⁰ Kun Yesus badaʹ mia: “Tai ne uleʹ. Mudip te anak koʹ ne ʹo.” Laki ina ngelan ne dau tiraʹ Yesus ngan penco tai uleʹ ne pe.

⁵¹ Ngalang janan kun ne petegoʹ ngan diaʹ panyen amin ne iaʹ badaʹ mia kuma ha: “Mudip ne anak koʹ de.”

⁵² Kun ne lemutu ida: “Jam kudaʹ anak keʹ nai tiga?” Ngan un dau re: “Dalau jam ca, beluaʹ tau nyahap de ia nteng dadem.”

⁵³ Kun amai ie petawai uban marung neng jam ina lete Yesus lepa badaʹ mia iaʹ pekini dau: “Mudip ne anak koʹ.” Ina ukoʹ o, peging ngan diaʹ amin ne, ngelan neng Yesus.

⁵⁴ Ini ne kedua liwai puyan nyingan iaʹ Yesus ti lepa ha uleʹ cen tanaʹ Yudia tai kaʹ tanaʹ Galilia.