YAYA 21 - Kenyah New Testament

Yesus nai luhaʹ kata tujoʹ usa diaʹ bayaʹ katuk ke

¹ Lepa ini, Yesus nai luhaʹ kata diaʹ bayaʹ katuk ke ca liwai laʹa kaʹ leteng Tiberias. Pekini ne puyan ne ti.

² Simun Peterus, Tumas (iaʹ dulu pisiu pepit), Natanil ca iaʹ nai cen lepoʹ Kana tanaʹ Galilia, dua usa diaʹ anak Sapdi, ngan dua usa diaʹ ca diaʹ bayaʹ katuk Yesus, un pemung kaʹ ina.

³ Un dau Simun Peterus neng diaʹ ca: “Tai lemukat ceʹ ne.” Kun nte badaʹ mia: “Nai meʹ ngan ncoʹ ʹo.” Ina ukoʹ de tai kalut. Un sepuʹo putung alem ina pabeʹ ca inu pe ida abeʹ un alaʹ.

⁴ Tegoʹ kenai tau nyelat, Yesus nekejeng kaʹ sada bahi sungai. Abeʹ diaʹ bayaʹ katuk ke dina tisen ina Yesus.

⁵ Ina ukoʹ o kuma neng ida: “Anak, un ncem telu alaʹ atuk mo?” Dau re mipa: “Naʹun, pabeʹ ca inu pe ameʹ abeʹ un alaʹ.”

⁶ Un dau ue neng ida: “Muno pukat cem ne tahaʹ taʹu alut cem, ina le ikem ke alaʹ ʹo.” Penco re muno pukat de kaʹ sungai, abeʹ ne ida senteng menat te uleʹ laʹa, uban kadoʹ aleʹ atuk ida alaʹ kidi.

⁷ Un dau ca mida diaʹ bayaʹ katuk ke, iaʹ Yesus malaʹ idai, kuma neng Peterus: “Tuhan ne ini.” Tegoʹ Simun Peterus kenahan dau ina Tuhan, kun ne negahat tempan sapai ie neng ia, uban ne ngelusa, penco petuhun kaʹ dalem sungai.

⁸ Un palai diaʹ bayaʹ katuk dina nai man alut, menat pukat ina sangan kuʹun atuk. Abeʹ de un kumpin coʹ cen tanaʹ. Kihoʹ kihoʹ lema puloʹ depa le pengecoʹ o.

⁹ Tegoʹ de abeʹ kaʹ sada bahi, ida taʹan diseʹ baha luten. Un pe atuk ngan ruti kempau ue.

¹⁰ Un dau Yesus neng ida: “Ngkin palai atuk diaʹ tumpak ikem alaʹ dina.”

¹¹ Penco ketai Simun Peterus kaʹ alut, menat pukat ina kusun tanaʹ sangan kuʹun atuk lataʹ. Pengekadoʹ atuk dina ca ato lema puloʹ telu re pemung. Naʹ pe ida kadoʹ ne, abeʹ pe pukat ina un berit.

¹² Dau Yesus neng ida: “Nai ne uman.” Pabeʹ ca me diaʹ bayaʹ katuk dina pe abeʹ un tempa lemutu ia kuma ha: “Aheʹ koʹ ne?” uban nte tisen ia Tuhan.

¹³ Ina ukoʹ Yesus tai alaʹ ruti, penco naʹ mida. Pekina pe puyan ne neng atuk dina.

¹⁴ Ini ne iaʹ ketelu liwai Yesus nai luhaʹ kata diaʹ bayaʹ katuk ke, uʹo lepa ha nai beteʹ cen patai are.

Yesus ngan Peterus

¹⁵ Uʹo lepa re uman, dau Yesus neng Simun Peterus: “Simun anak Yaya, un ncoʹ malaʹ akeʹ lapa neng ʹo ida dini mo?” Dau Peterus mipa ha: “Ahaʹ Tuhan, tisen te ikoʹ akeʹ malaʹ neng ikoʹ.” Dau Yesus neng ia: “Nubo tiga le anak dumba heʹ ne.”

¹⁶ Kedua liwai Yesus kuma neng ia: “Simun anak Yaya, un ncoʹ malaʹ akeʹ mo?” Dau Peterus mipa ia: “Ahaʹ Tuhan, tisen te ikoʹ akeʹ malaʹ neng ikoʹ.” Un dau Yesus neng ia: “Nubo tiga le dumba heʹ ne.”

¹⁷ Ketelu liwai Yesus kuma ha: “Simun anak Yaya, un ncoʹ malaʹ akeʹ mo?” Tai bahat ne tekaʹ kimet Peterus uban Yesus lemutu ia telu liwai: “Un ncoʹ malaʹ akeʹ mo?” ngan Peterus kuma neng ia: “Tuhan, tisen mung ngkoʹ, tisen te ikoʹ akeʹ malaʹ neng ikoʹ.” Dau Yesus neng ia: “Nubo tiga le dumba heʹ ne.

¹⁸ Lan dau heʹ mikoʹ, dalau hoʹ iʹut te, malai pe ikoʹ negahat seketeng neng aking ngkoʹ, ngan tai kempi pengubaʹ koʹ ke tai. Un sepuʹo tegoʹ koʹ ke mukun ʹo, ikoʹ ke mejo lengen ncoʹ, ngan dulu diaʹ ca iaʹ ke lemeka ha, ngan tai ngkin ikoʹ kempi hoʹ abeʹ un ubaʹ ke tai.”

¹⁹ (Man isiu ini Yesus badaʹ kumpin puyan Peterus ke matai ngan ke nyerema peniga palaʹ Allah.) Sulo dau Yesus neng ia: “Nai ne bayaʹ akeʹ.”

Yesus ngan ca laki iaʹ uban bayaʹ ia

²⁰ Kun Peterus pupa, penco taʹan ca laki iaʹ bayaʹ katuk Yesus, ngan ia iaʹ Yesus malaʹ idai, ia iaʹ pesen kata Yesus dalau re uman are, ngan lemutu ia: “Tuhan, aheʹ iaʹ ke mencai ikoʹ me bunoʹ koʹ ʹo?”

²¹ Tegoʹ Peterus taʹan ia, un dau ue pisiu neng Yesus: “Tuhan, kumpin puyan laki ini?”

²² Dau Yesus mipa ia: “Buk keʹ ubaʹ ia mudip pa kenai heʹ laʹa ʹo, mele inu pe ia pekina neng ikoʹ? Nai ne ikoʹ bayaʹ akeʹ.”

²³ Ina ukoʹ denga ina tai purat ne kahang ida diaʹ bayaʹ Yesus ne kuma laki ini abeʹ un ke matai. Un sepuʹo abeʹ Yesus un kuma ia abeʹ un ke matai. Dau ue: “Buk keʹ ubaʹ ia mudip pa kenai heʹ laʹa ʹo, mele inu pe ia pekina neng ikoʹ?”

²⁴ Ia ne laki iaʹ lepa badaʹ puyan dini, ngan ia lete iaʹ nyurat te, ngan tisen te ilu mung ban iaʹ ia badaʹ ina lan.

Iaʹ pengekuʹo isiu

²⁵ Kadoʹ pemuhan diaʹ ca Yesus lepa ti. Buk ketoʹ dina lepa senurat tahaʹ ca tahaʹ ca, akeʹ ngihoʹ ketoʹ usun tanaʹ ini abeʹ un senteng ukoʹ Kitap diaʹ ke senurat dina. 2