YAYA 2 - Kenyah New Testament

Puyan adet pepeto kaʹ lepoʹ Kana

¹ Neng kedua tau uʹo ina, un dulu ti adet pepeto kaʹ lepoʹ Kana kaʹ tanaʹ Galilia. Ueʹ Yesus pe un kina.

² Yesus pemung ngan diaʹ bayaʹ katuk ke un sihoʹ pengin lete neng adet pepeto ina.

³ Un dau ueʹ Yesus neng ia: “Lepa muʹo ne telang buaʹ anggur idai dulu nisep. Abeʹ un telang buaʹ anggur laʹa.”

⁴ Un dau Yesus mipa ia: “Abeʹ tekep koʹ cuk akeʹ uyan ini ueʹ. Tau heʹ ke uyan nyingan abeʹ awai nai lepe.”

⁵ Ina ukoʹ ueʹ Yesus badaʹ me diaʹ pegayeng neng amin dina: “Ti ne mele inu iaʹ ia cuk ikem uyan.”

⁶ Kelunan Yahudi dina iaʹ ngkang kadoʹ ukum adet, puyan ukoʹ baʹan muheʹ umpat de. Ina pukoʹ un nem nte tajau batu kukoʹ sungai kaʹ ina. Pengebioʹ ca ne senteng kukoʹ suheʹ dua puloʹ gilin sungai.

⁷ Un dau Yesus neng diaʹ pegayeng neng amin dina: “Nyangan ne tajau dina man sungai.” Penco re nyangan tajau dina pa sangan sada paʹ a.

⁸ Penco Yesus cuk ida ngan kuma ha: “Ngadai ne palai sungai ini, tai hem ngkin ne palaʹ laki iaʹ pengebioʹ ngkang adet bunut ini te.” Sulo tai re ngkin ne palaʹ ia.

⁹ Kun ne ten tekaʹ sungai ina iaʹ lepa pekaliu ne uban ne tai nuyan telang buaʹ anggur. Abeʹ e tisen cen mpi kenai telang buaʹ anggur ini. (Un sepuʹo diaʹ pegayeng neng amin dina, iaʹ lepa ngadai telang buaʹ anggur idai, ida tisen kidi.) Kun ne mengin laki iaʹ metip leto ina,

¹⁰ ngan kuma ha neng ia: “Dulu diaʹ ca mencai telang buaʹ anggur iaʹ tiga ading. Uʹo ina, dalau diaʹ sakai lepa nisep kadoʹ, lepa ina dulu mencai telang buaʹ anggur iaʹ malai. Un sepuʹo ikoʹ iaʹ ban peremun telang buaʹ anggur iaʹ tiga ini pa abeʹ naʹkini ne.”

¹¹ Ini iaʹ ading Yesus uyan puyan nyingan. Ia uyan ne kaʹ lepoʹ Kana kaʹ tanaʹ Galilia. Kina ha peluhaʹ seʹ serema peniga ha, ngan diaʹ bayaʹ katuk ke dina ngelan neng ia.

¹² Lepa ina, puke ne Yesus ngan ueʹ e, ngan diaʹ cenganak ke, ngan diaʹ bayaʹ katuk ke tai kaʹ Kapernaum. Sulo re ngelineʹ kina majan kediʹut de.

Yesus tai kaʹ Umaʹ Palan Allah

¹³ Abeʹ un majan laʹa lepoʹ Yahudi ke uyan Adet Bunut Paska. (Sen ne menting patai.) Ina ukoʹ Yesus tai kaʹ lepoʹ Yerusalim.

¹⁴ Dalem Umaʹ Palan Allah, Yesus taʹan dulu matu sapi, dumba, ngan sui garaʹ. Ngan pelaʹa, un pe dulu diaʹ seliwa ligit dina madung kata bijaʹ de.

¹⁵ Ina ukoʹ Yesus muyung ida man tali, apan nungkaʹ ida dina tai kelap cen Umaʹ Palan Allah ne. Mung sapi ngan dumba dina kelap. Kun Yesus puʹup bijaʹ kelunan diaʹ seliwa ligit dina are, mentung murat ligit de.

¹⁶ Kun ne cuk laki diaʹ matu sui garaʹ dina, un dau ue: “Tai ne, ngkin ida kelap cen umaʹ ini. Ayen uyan umaʹ Amai heʹ ne ukoʹ baʹan ca umaʹ kukoʹ dulu matu kujau re.”

¹⁷ Mung diaʹ bayaʹ katuk ke dina are, petawai dau dalem Kitap iaʹ kuma ha: “Ahaʹ Allah, dalem kimet ceʹ akeʹ malaʹ tekaʹ neng umaʹ koʹ, ukoʹ baʹan tekaʹ laʹang luten tutung dalem penawai heʹ.”

¹⁸ Un diaʹ lataʹ lepoʹ Yahudi penco nyakat Yesus ngan lemutu ia: “Inu puyan nyingan ncoʹ, iaʹ ikoʹ senteng peluhaʹ mameʹ uban tuman ncoʹ tekep ti puyan ini?”

¹⁹ Dau Yesus mipa ida? “Ngasing ne umaʹ Allah ini, ngan dalem telu tau akeʹ ke numpak medeng nge laʹa.”

²⁰ Kun nte lemutu ia laʹa: “Ikoʹ ke uyan umaʹ ini dalem telu tau tuaʹ le? Dalem pat puloʹ nem uman ina le Umaʹ Palan ini senteng nuyan.”

²¹ Un sepuʹo umaʹ palan iaʹ Yesus pisiu, ina ne usa ha loʹ.

²² Ina ukoʹ dalau uʹo kenai ia beteʹ cen patai re, diaʹ bayaʹ katuk ke petawai dau Yesus pisiu ini. Sulo re ngelan dau dalem Kitap, ngan peging iaʹ Yesus lepa badaʹ lete.

Yesus tisen kelunan mung

²³ Ngajan Yesus kaʹ lepoʹ Yerusalim dalau sihoʹ Adet Bunut Paska, kadoʹ kelunan ngelan neng ia uban nte taʹan diseʹ puyan nyingan iaʹ Yesus lepa ti.

²⁴ Un sepuʹo usa Yesus tengen abeʹ un tekaʹ tapi ie neng ida, uban ne tisen puyan kelunan mung.

²⁵ Abeʹ un titin aheʹ badaʹ ukoʹ baʹan tuk kelunan neng ia, uban Yesus tisen inu iaʹ dalem kimet de.