YAYA 19 - Kenyah New Testament

¹ Uʹo ina kun Pilatus alaʹ Yesus, cuk sedadu dina lemeta ia.

² Kun sedadu dina uyan tapung suhaʹ, penco naʹ kaʹ ulu ue, ngan naʹ ca sapai dadoʹ silem le mia,

³ penco nai palaʹ ia ngan kuma ha: “Dadoʹ le udip paren bioʹ lepoʹ Yahudi.” penco ketai re kempau, nepap ia.

⁴ Tai kun Pilatus kawang ca liwai laʹa, ngan kuma neng dulu diaʹ kadoʹ: “Ikem naʹat, ini kenai heʹ ngkin ia kawang apan ncem taʹan. Abeʹ keʹ tisen inu iaʹ puʹun ukoʹ le ke mekem salaʹ neng ia.”

⁵ Penco ketai Yesus kawang, petem un sapai dadoʹ o iaʹ silem idai, ngan tapung suhaʹ a. Un dau Pilatus neng ida: “Naʹat, ini ne laki idi.”

⁶ Tegoʹ diaʹ detaʹu lataʹ ngan diaʹ sedadu dina lepa taʹan ia, penco re ngelengap: “Napek ne ia neng kayu tecek. Napek ne ia neng kayu tecek.” Dau Pilatus neng ida: “Buk pekina, ikem alaʹ ne ia ngan napek ia neng kayu tecek. Abeʹ keʹ tisen inu iaʹ puʹun le ke mekem salaʹ neng ia.”

⁷ Un dau kelunan Yahudi dina nyakat: “Un dau dalem Katuk Adet meʹ iaʹ kuma ha tekep tia sihoʹ ukum patai, uban ne badaʹ ia iaʹ Anak Allah.”

⁸ Tegoʹ Pilatus lepa kenahan dau re pisiu ini, tai takut kuʹo pe tekaʹ a.

⁹ Tai kun ne ngeliwet palaʹ amin Gebenur ina, mentung lemutu Yesus: “Cen mpi kenai hoʹ?” Un sepuʹo abeʹ Yesus un mipa.

¹⁰ Dau Pilatus neng ia: “Abeʹ koʹ ke pisiu me akeʹ tupe? Petawai, akeʹ iaʹ un penyukat iaʹ sukat ke nakau ikoʹ, ngan pekina pe penykat iaʹ sukat ke napek ikoʹ neng kayu tecek.”

¹¹ Dau Yesus mipa: “Pukoʹ koʹ un penyukat neng akeʹ bang uban Allah iaʹ lepa naʹ ini mikoʹ. Ina ukoʹ kelunan iaʹ mencai akeʹ me ikoʹ, ia iaʹ nyalit neng penyalaʹ iaʹ baran neng uʹo penyalaʹ koʹ.”

¹² Tegoʹ Pilatus lepa kenahan dau ini, miat tekaʹ a mita janan ke nakau Yesus. Un sepuʹo ngeliwet dau kelunan Yahudi dina ngelengap: “Buk ne ikoʹ ke nakau ia, abeʹ ne ikoʹ un tuyang Laja Kaisar laʹa. Aheʹ iaʹ badaʹ ia ca paren bioʹ, ia ne iaʹ bunoʹ Laja Kaisar.”

¹³ Tegoʹ Pilatus kenahan dau isiu ini, kun ne ngkin Yesus kawang, penco madung kempau adan batu iaʹ kukoʹ metep tiraʹ, iaʹ dulu kuma “Lasan Batu.” (Ngadan ne kuʹun Iberani, “Gabata.”)

¹⁴ Tegoʹ ina, nyeng beluaʹ tau, uban neng ke nempam ina uʹo ida pekimet ke uman Bunut Paska. Kun Pilatus pisiu me kelunan Yahudi dina: “Ini iaʹ paren bioʹ kem.”

¹⁵ Kun nte ngelengap laʹa: “Lematai ne ia, lematai ne ia, napek ke ia neng kayu tecek.” Dau Pilatus lemutu ida: “Ubaʹ kem akeʹ napek paren bioʹ kem neng kayu tecek mo?” Un dau diaʹ detaʹu lataʹ dina mipa: “Bang ca Kaisar le iaʹ paren bioʹ meʹ.”

¹⁶ Ina ukoʹ Pilatus naʹ Yesus mida apan nte ke napek ia neng kayu tecek. Penco re ngkin Yesus.

Yesus tenapek neng kayu tecek

¹⁷ Tai kun ne kawang nyuʹun kayu tecek ke tengen, nai palaʹ kukoʹ iaʹ dulu kuma “Tekahing Ulu.” (Isiu Iberani ida kuma “Gulguta.”)

¹⁸ Kaʹ ina re napek ia neng kayu tecek. Un pe dua usa laki ida napek neng kayu tecek pipa ia, ngan Yesus tegoʹ beluaʹ ida dua.

¹⁹ Kun Pilatus nyurat ca surat, pedetem me neng kayu tecek ina. Un dau dalem surat ina: “Yesus lepoʹ Nasarit, paren bioʹ kelunan Yahudi.”

²⁰ Kadoʹ kelunan Yahudi pecap surat ini, uban kukoʹ dulu napek Yesus neng kayu tecek ina abeʹ un coʹ cen lepoʹ. Surat ina pe senurat neng isiu Iberani, Latin, ngan isiu Gerika.

²¹ Dau diaʹ detaʹu lataʹ lepoʹ Yahudi dina neng Pilatus: “Ayen nyurat ‘paren bioʹ lepoʹ Yahudi,’ bang nyurat ‘laki ini iaʹ kuma ia paren bioʹ lepoʹ Yahudi.’ ”

²² Dau Pilatus mipa: “Inu iaʹ akeʹ lepa nyurat, lepa ne ina.”

²³ Lepa sedadu dina napek Yesus neng kayu tecek, kun nte alaʹ gelam me petulat me pat usa sedadu dina. Ida alaʹ pe sapai dadoʹ o iaʹ nanyam pa tipo, abeʹ un jelut te.

²⁴ Dau sedadu dina pisiu neng ida selepeʹ: “Ayen ne ilu lemerit te. Tiga le ti tenung. Naʹat mele aheʹ iaʹ ke un ne.” Puyan ini nuyan apan kenai nuyan dau isiu Kitap iaʹ kuma ha: “Ida petulat gelam ngkeʹ neng ahang ida tengen, Ngan ida nenung neng sapai heʹ ne.” Pekina ne puyan sedadu dina ti.

²⁵ Un diaʹ nekejeng nyeng kata tecek Yesus, ina ne iaʹ ueʹ ngan iaʹ cenganak ueʹ e ne, ngan Mariam leto Kelupas, ngan Mariam Madalina.

²⁶ Yesus taʹan diseʹ ban ueʹ e ngan iaʹ bayaʹ katuk ke, iaʹ ia malaʹ didai, nekejeng kina, ina ukoʹ o kuma neng iaʹ ueʹ: “Ueʹ, ini ne anak koʹ.”

²⁷ Dau ue neng iaʹ bayaʹ katuk ke ne laʹa: “Ini ne ueʹ koʹ.” Cen uʹo ina, iaʹ bayaʹ katuk ke ina, ngkin leto ina mudip neng amin ne.

Puyan patai Yesus

²⁸ Cen naʹkini ne Yesus tisen mung puyan iaʹ lepa nuyan, ngan laʹa apan isiu dalem Kitap ke nuyan lan. Ia kuma ha: “Muhang tekaʹ keʹ ne.”

²⁹ Un ca bisin kina sangan kuʹun telang anggur iaʹ mesem ina. Kun nte mejep ca keruko abak neng telang anggur ina. Kun nte netuk keneng awe ca daʹan jelemutin, ngan mejung nge kaʹ paʹ a.

³⁰ Cen ina ne Yesus nisep telang anggur ina ngan kuma ha: “Lepa palup ne udai.” Uʹo ina tai ulu ue petuheng, ngan penco matai.

Sedadu mesuk tegahang Yesus

³¹ Ina ukoʹ lepoʹ Yahudi lemutu Pilatus, nyat lesau neng ia, apan ne dayo ida lemutun taket kelunan iaʹ lepa sihoʹ ukum patai, ngan muno ida kentaʹ cen kayu salip. Ida ti puyan ini uban tegoʹ tau lema, abeʹ de ubaʹ patai ke petem neng kayu tecek tegoʹ Tau Kelineʹ, uban Tau Kelineʹ iaʹ kenai ina uʹo ke sihoʹ neng adet bioʹ iaʹ buheʹ.

³² Ina ukoʹ sedadu dina tai lemutun taket kelunan iaʹ ading, uʹo ina re ti iaʹ ca iaʹ sihoʹ ukum patai ngan Yesus.

³³ Un sepuʹo nai kun nte palaʹ Yesus. Ida taʹan ia lepa matai, ina ukoʹ de abeʹ un lemutun taket te.

³⁴ Penco ca usa me sedadu dina mesuk nyatap pe kaʹ tegahang Yesus. Serengan ina ne kenai dahaʹ ngan sungai musa kawang.

³⁵ Laki iaʹ lepa taʹan puyan ini iaʹ nugen badaʹ a apan ikem lete ke ngelan. Isiu ue iaʹ telit lan, ngan ia tisen pe isiu ue iaʹ telit lan.

³⁶ Ini ne lepa nuyan apan dau iaʹ dalem Kitap ke nai nuyan lan: “Pabeʹ ca tulang nge pe abeʹ un putun.”

³⁷ Ngan un pe dau dalem Kitap diaʹ ca kuma ha: “Dulu ke naʹat ia iaʹ ida mesuk man nyatap.”

Puyan nanem Yesus

³⁸ Lepa ina, Yusup, iaʹ nai cen lepoʹ Arimatia ina, lemutu Pilatus mele he senteng ke alaʹ patai Yesus. (Yusup ne ca iaʹ bayaʹ katuk Yesus lete, un sepuʹo selem puyan ne cen kena re, uban ne takut diaʹ lataʹ lepoʹ Yahudi.) Kun Pilatus badaʹ mia: “Senteng te ikoʹ alaʹ patai ie ne.” Penco ketai Yusup puke patai Yesus.

³⁹ Un Nikudimus, iaʹ ading tai naʹat Yesus ngahu, penco ho tai ngan Yusup, ngkin kihoʹ kihoʹ nem puloʹ kateʹ kemanyan pekelet lisan tumu ngan lisan gareʹ.

⁴⁰ Laki dua, diaʹ alaʹ patai Yesus ne, lemino ia man belasoʹ peging ngan kemanyan ina. Pekini ne puyan lepoʹ Yahudi petenup me kelunan diaʹ lepa matai kena re nanem ida.

⁴¹ Kukoʹ de lematai Yesus ne un pula kina. Un ca liang batu iaʹ mading kidi, abeʹ un awai dulu kanan ne lepe.

⁴² Ida mahung patai Yesus kaʹ dalem liang ina, uban liang ina nyeng kata kina, ngan laʹa uban neng kenempam me ke Tau Kelineʹ lepoʹ Yahudi.