YAYA 16 - Kenyah New Testament

¹ “Lepa ne akeʹ badaʹ ini mikem apan ncem abeʹ un tai luʹap tekaʹ kimet.

² Dulu ke mesau ikem cen amin sebayang ʹo. Ngan un te kenai jakaʹ dulu diaʹ ke lematai ikem, ke pekimet ban kuʹun puyan ini re kuma ida ke penco gayeng Allah.

³ Atek de ke ti puyan ini neng ikem, uban nte abeʹ un tisen Amai Bioʹ, pekina pe akeʹ.

⁴ Nekena ne akeʹ badaʹ puyan ini mikem, apan ncem ke petawai dau iaʹ akeʹ lepa badaʹ mikem tegoʹ tau dulu ke ti puyan ini ʹo.” “Abeʹ keʹ un badaʹ puyan ini mikem cen kena re, uban nceʹ petem un ngan ncem.

Gayeng Berua Buheʹ

⁵ Naʹkini ne akeʹ ketai palaʹ ia iaʹ cuk akeʹ nai. Un sepuʹo abeʹ un aheʹ mikem iaʹ lemutu akeʹ kuma ha: ‘Tai kempi hoʹ?’

⁶ Naʹkini bahat ne tekaʹ tawai hem uban nceʹ lepa badaʹ ini mikem.

⁷ Un sepuʹo atek telit dau heʹ pisiu mikem, tiga kuʹo pe akeʹ tai puke, uban buk keʹ abeʹ un tai, abeʹ un iaʹ mepo ikem kenai palaʹ ikem. Un sepe buk keʹ tai puke uʹo, ina ne akeʹ ke cuk ia nai palaʹ ikem.

⁸ Ngan tegoʹ o nai uʹo, ia ke peluhaʹ me kelunan kusun tanaʹ ini uban nte salaʹ pekimet puyan penyalaʹ de, ngan puyan iaʹ teneng, ngan puyan Allah ke metep ukum kusun tanaʹ ini.

⁹ Ida salaʹ pekimet puyan penyalaʹ uban nte abeʹ un ngelan neng akeʹ.

¹⁰ Ngan ida salaʹ pekimet puyan iaʹ teneng, uban akeʹ ketai palaʹ Amai Bioʹ, ngan abeʹ kem ke taʹan akeʹ laʹa.

¹¹ Ida salaʹ pekimet puyan iaʹ metep ukum, uban lepa betep ne ukum neng ia iaʹ ngaren usun tanaʹ ini.

¹² “Kadoʹ lepe isiu iaʹ akeʹ ke badaʹ mikem laʹa, idi pe naʹkini abeʹ pe nyatan ncem senteng alaʹ dau heʹ neng ikem.

¹³ Un sepuʹo tegoʹ kenai Berua katuk iaʹ telit, ia iaʹ ke ngkin ikem ngedalau mung puyan katuk iaʹ telit. Abeʹ e ke pisiu cen kimet te tengen, bang ia badaʹ inu iaʹ ia kenahan, ngan ia ke badaʹ puyan iaʹ kenai bayaʹ.

¹⁴ Ia ke naʹ serema peniga makeʹ, uban ne ke alaʹ isiu heʹ, ngan penco ho mikem.

¹⁵ Ketoʹ inu iaʹ anun Amai heʹ, anun nceʹ lete ina. Ina iaʹ ukoʹ keʹ kuma Berua Buheʹ ke alaʹ iaʹ akeʹ naʹ mia, penco badaʹ a mikem.”

Puyan bahat kimet ngan puyan bangen tawai

¹⁶ “Abeʹ un majan laʹa abeʹ kem ke taʹan akeʹ. Abeʹ un majan uʹo ina ikem ke taʹan pe akeʹ laʹa.”

¹⁷ Un dau palai diaʹ bayaʹ katuk ke pisiu neng ida diaʹ ca: “Inu sen iaʹ baʹan ne milu ne tupe, iaʹ kuma ha: ‘Abeʹ un majan laʹa abeʹ kem ke taʹan akeʹ: abeʹ un majan uʹo ina ikem ke taʹan pe akeʹ laʹa?’ Ngan un pe dau ue laʹa kuma ha: ‘Uban nceʹ tai palaʹ Amai Bioʹ?’ ”

¹⁸ Dau re lemutu ida selepeʹ: “Inu sen dau ue kuma: ‘Abeʹ un majan laʹa?’ Abeʹ le tisen inu iaʹ baʹan ne.”

¹⁹ Lepa tisen ne Yesus ida ubaʹ lemutu ia, ina ukoʹ o kuma ha neng ida: “Un dau heʹ re: ‘Abeʹ un majan laʹa, abeʹ kem ke taʹan akeʹ, uʹo ina pelaʹa abeʹ un majan ikem ke taʹan pe akeʹ.’ Ini iaʹ ikem lemutu kahang ikem semaheʹ ne mo?

²⁰ Lan dau heʹ mikem, ke nange hem ʹo, uban ke ngelumo akeʹ. Un dulu kusun tanaʹ ne, ida iaʹ ke bangen. Naʹ pe bahat kimet cem, puyan pengebahat kimet cem ina iaʹ ke tai pekaliu nuyan bangen ʹo.

²¹ Buk ca leto nyeng ke nganak, taru tekaʹ a pekimet uban tegoʹ ina ha ke sihoʹ tuyen. Lepa ne anak ke pempet, abeʹ ne ia nawai tuyen laʹa, uban bangen tekaʹ a kuʹun anak iaʹ lepa pempet kusun tanaʹ ini.

²² Pekini lete puyan neng ikem. Naʹkini bahat tekaʹ tawai hem, un sepuʹo akeʹ iaʹ kenai naʹat ikem laʹa. Ina le pengebangen tawai hem ketai daʹam lan. Ca naʹan pengebangen ina, abeʹ un aheʹ senteng mesau ue cen ikem.

²³ “Tegoʹ tau ina lepa nai uʹo, abeʹ kem ke nyat ca inu neng akeʹ. Lan dau heʹ mikem, mele inu iaʹ ikem ke nyat neng Amai Bioʹ dalem ngadan nceʹ, ia ke naʹ lete mikem.

²⁴ Pabeʹ naʹkini ne ikem abeʹ un nyat ca inu dalem ngadan nceʹ. Nyat ne, idi hem ke alaʹ a, apan pengebangen ncem ketai daʹam.”

Iaʹ un usun neng puyan usun tanaʹ

²⁵ Man kata katuk akeʹ lepa badaʹ puyan ini mikem are. Un sepuʹo tegoʹ jakaʹ iaʹ kenai ʹo, abeʹ keʹ kanan isiu kata laʹa. Atek besut dau heʹ ke badaʹ puyan Amai Bioʹ neng ikem.

²⁶ Tegoʹ jakaʹ ina ke nai ʹo, ikem ke nyat neng ia dalem ngadan nceʹ. Abeʹ keʹ kuma akeʹ iaʹ ke nyat neng ia tuman ikem,

²⁷ uban Amai Bioʹ tengen iaʹ malaʹ neng ikem. Ia malaʹ neng ikem uban ncem malaʹ neng akeʹ, ngan ngelan neng akeʹ iaʹ uban lepa nai cen Allah.

²⁸ Akeʹ lepa nai cen Amai Bioʹ, nai heʹ kusun tanaʹ ini. Naʹkini akeʹ ke mecin tanaʹ ini, tai palaʹ Amai Bioʹ.”

²⁹ Penco dau diaʹ bayaʹ katuk ke neng ia: “Ahaʹ, besut dau hoʹ pisiu ameʹ naʹkini. Abeʹ koʹ man isiu kata laʹa.

³⁰ Tisen ne ameʹ naʹkini iaʹ mung inu ne ikoʹ lepa tisen, ngan abeʹ titin kelunan ke peluhaʹ putu re neng ikoʹ. Kuʹun puyan ini ne ameʹ ngelan ikoʹ uban nai cen Allah.”

³¹ Dau Yesus mipa ida: “Lan ncem ngelan naʹkini taʹin?

³² Seʹ kenai ne jakaʹ a, ngan iaʹ lan ne lepa un ne naʹ kini, tegoʹ mung ngkem ke tai purat ʹo, semingket ketai hem palaʹ amin ncem tengen. Bang akeʹ tengen le iaʹ nahung laʹa. Un sepuʹo iaʹ lan, abeʹ keʹ tengen, uban Amai Bioʹ iaʹ un ngan nceʹ.

³³ Lepa ne akeʹ badaʹ ini mikem apan ncem ke un denaʹ tawai kuʹun puyan ncem pebeka udip ngan nceʹ. Puyan usun tanaʹ ini iaʹ ke petuyen ikem, un sepuʹo ngebawaʹ ne ikem, lepa ne akeʹ nyupeʹ puyan usun tanaʹ ini.”