YAYA 11 - Kenyah New Testament

Puyan Patai Lasarus

¹ Ca laki ngadan Lasarus, iaʹ mudip kaʹ Bitani, tai sakit ne ia. Bitani ne lepoʹ iaʹ ukoʹ Mariam ngan iaʹ sadin ne Marta ne mudip.

² (Mariam ne iaʹ mubeʹ kenyo kaʹ taket Yesus are, ngan lemasa ha man puk ke. Lasarus iaʹ sakit ina, ia ne iaʹ cenganak ke.)

³ Kun nte dua diaʹ cenganak leto ne katu tiraʹ me Yesus kuma ha: “Tuhan sakit ne laki iaʹ ikoʹ malaʹ idai.”

⁴ Tegoʹ Yesus kenahan dau ini, un dau ue: “Abeʹ penyakit ini ke ngkin Lasarus matai. Ini ne puyan iaʹ ke peluhaʹ serema peniga Allah, ngan kuʹun ne lete Anak Allah ke alaʹ serema peniga ha.”

⁵ Ngan malaʹ tekaʹ kimet Yesus neng Marta re dua padeʹ, ngan Lasarus lete.

⁶ Tegoʹ Yesus kenahan dau denga Lasarus sakit, kun ne ngelineʹ dua tau kina laʹa.

⁷ Uʹo ina ha pisiu neng diaʹ bayaʹ katuk ke: “Tai ne ilu uleʹ palaʹ tanaʹ Yudia.”

⁸ Un dau diaʹ bayaʹ katuk ke mipa: “Guru, abeʹ lepe un majan uʹo lepa kelunan Yahudi ubaʹ lemulo batu neng ikoʹ. Adeʹ koʹ ubaʹ tai uleʹ kina laʹa?”

⁹ Dau Yesus: “Singket tau ne un puloʹ dua jam iaʹ dema. Abeʹ e pekina taʹin? Ina ukoʹ buk ca kelunan masat dalau beluaʹ tau, abeʹ e ke petampap, uban ne taʹan diseʹ dema usun tanaʹ ini.

¹⁰ Un sepuʹo buk ke masat ngahu, petampap te ia, uban abeʹ un dema neng usa ha tengen.”

¹¹ Uʹo Yesus pekini dau, un dau ue laʹa: “Tuyang le Lasarus are lepa luntoʹ ne. Ina ukoʹ keʹ ke tai naga ia.”

¹² Dau diaʹ bayaʹ katuk ke mipa ia: “Tuhan, buk ke lepa luntoʹ, seʹ e ke tiga en ina.”

¹³ Un sepuʹo sen dau Yesus ina ne badaʹ ban Lasarus lepa matai. Ida kuma ia badaʹ pengalai ie luntoʹ.

¹⁴ Ina ukoʹ Yesus badaʹ ngan iaʹ luhaʹ dau mida: “Lasarus lepa matai ne.

¹⁵ Naʹ pe kina, bangen tekaʹ keʹ keti ca bang mikem uban nceʹ abeʹ un ngan ne are, apan ncem ke ngelan neng akeʹ. Tai ne ilu palaʹ ia.”

¹⁶ Tumas, (iaʹ dulu pisiu anak pepit) un dau ue pisiu diaʹ kuaʹ ngan ne bayaʹ katuk Yesus: “Tai ne ilu mung serengan Guru lene, idi le pemung matai ngan ne ʹo.”

Yesus pudip diaʹ matai, ngan ia iaʹ atek udip

¹⁷ Tegoʹ Yesus abeʹ kina, tisen ne ia uban pat tau ne uʹo lepa dulu nanem Lasarus.

¹⁸ Pengencoʹ lepoʹ Bitani cen Yerusalim abeʹ un abeʹ dua batu.

¹⁹ Ngan kadoʹ kelunan Yahudi lepa nai pedenaʹ Marta re dua Mariam neng puyan patai iaʹ cenganak de dua ne.

²⁰ Kun Marta kenahan dau denga Yesus nai, penco tai ie naʹat ia. Un sepe Mariam ina iaʹ ngelineʹ kamin.

²¹ Un dau Marta neng Yesus: “Tuhan, buk koʹ un kini are, abeʹ cenganak keʹ ne ke matai.

²² Un sepuʹo tisen nceʹ naʹkini, Allah ke naʹ mikoʹ inu iaʹ ikoʹ nyat neng ia.”

²³ Dau Yesus badaʹ mia: “Atek cenganak koʹ ke beteʹ numpak mudip lete.”

²⁴ Un dau Marta mipa: “Tisen te akeʹ ia kenai beteʹ numpak mudip tegoʹ le mung nai beteʹ numpak mudip neng tau iaʹ kebayaʹ ʹo.”

²⁵ Dau Yesus neng Marta: “Akeʹ iaʹ pudip kelunan diaʹ matai, ngan akeʹ pe ngkin udip mida. Buk aheʹ diaʹ ngelan neng akeʹ, kenuen pe ia matai, atek ke nai mudip lete.

²⁶ Ngan aheʹ kelunan mudip diaʹ ngelan neng akeʹ, nyahut de abeʹ un ke matai ne. Un ncoʹ ngelan dau ini tupe?”

²⁷ Dau Marta mipa ia: “Ahaʹ Tuhan, akeʹ ngelan lete ikoʹ iaʹ Keristus iaʹ ngkang pungu udip, iaʹ Anak Allah, iaʹ ameʹ mengaʹ ke nai kusun tanaʹ ini.”

Yesus nange

²⁸ Lepa Marta pisiu ini, tai kun ne uleʹ ngan nyelem mengin iaʹ cenganak ke Mariam. Kun ne badaʹ mia: “Ini Guru kini. Ina ha ubaʹ taʹan ikoʹ.”

²⁹ Tegoʹ Mariam kenahan dau ini, busek ketai ie kawang naʹat ia.

³⁰ (Abeʹ awai Yesus abeʹ kaʹ lepoʹ ini lepe, uban ne petem kaʹ ukoʹ Marta tegoʹ ia re lepe.)

³¹ Kelunan Yahudi diaʹ ngan Mariam kaʹ amin, diaʹ pedenaʹ ia neng puyan patai Lasarus are, kun nte taʹan Mariam busek diseʹ nai kawang. Penco tai re bayaʹ ia, uban nte kuma ia ketai nange kaʹ pulung.

³² Tegoʹ Mariam abeʹ kaʹ ukoʹ Yesus ne, kun ne taʹan ia, penco ho muʹup kaʹ taket te. Un dau ue: “Tuhan buk koʹ un kini are, abeʹ cenganak keʹ ne ke matai.”

³³ Kun Yesus taʹan ia nange, ngan kelunan Yahudi diaʹ nai tugung ia ne pe nange. Tai kelesau pe tekaʹ a, ngan siʹet ne tekaʹ tawai ie.

³⁴ Kun ne lemutu ida: “Kempi hem nanem ia?” Dau re mipa ia: “Tuhan, nai ne naʹat ading.”

³⁵ Nange ne Yesus.

³⁶ Ina ukoʹ kelunan Yahudi dina kuma ha: “Naʹat, malaʹ aleʹ diseʹ kimet te neng ia.”

³⁷ Un dau palai mida: “Moʹ abeʹ ia iaʹ mesik mata laki butaʹ idai mo? Ke senteng lete ia are, mulen Lasarus ne matai?”

Lasarus ngeliwet nai mudip

³⁸ Ca liwai laʹa siʹet tekaʹ kimet Yesus. Tai kun ne kaʹ pulung kukoʹ liang batu. Un ca batu bioʹ le kep paʹ lubang liang ina.

³⁹ Penco dau Yesus: “Mesau ne batu kep liang ini.” Un dau Marta iaʹ cenganak neng laki iaʹ matai ina mipa: “Tuhan, jaʹat baʹoʹ ina ʹo. Pat tau ne lepa meʹ nanem ia.”

⁴⁰ Dau Yesus neng ia: “Moʹ abeʹ keʹ un badaʹ mikoʹ re, buk koʹ ngelan, ikoʹ ke taʹan lete diseʹ serema peniga Allah ʹo?”

⁴¹ Kun nte mesau batu kep liang ina, penco Yesus naʹat kempau, ngan kuma: “Akeʹ nyuaʹ saheʹ kimet neng ikoʹ Amai, uban ncoʹ ngeringa dau heʹ.

⁴² Akeʹ tisen te ikoʹ lemuto ngeringa dau heʹ. Un sepuʹo akeʹ pisiu ini uban kuʹun kelunan dini, apan nte ke ngelan ikoʹ iaʹ cuk akeʹ nai.”

⁴³ Lepa ha pisiu pekini dau, kun ne lemikaʹ bioʹ dau: “Lasarus, nai ne kawang.”

⁴⁴ Laki iaʹ lepa matai ina nai kawang petem belasoʹ iʹuk ujoʹ o, ngan iʹuk taket te, ngan belasoʹ iaʹ bino silung nge. Dau Yesus cuk ida: “Sau iʹuk ke ne, pawang ne ia tai.”

Peseket ke lematai Yesus

⁴⁵ Kadoʹ kelunan Yahudi, diaʹ lepa tai menoʹ Mariam ne, taʹan diseʹ pemuyan iaʹ Yesus ti, ngan ngelan neng ia.

⁴⁶ Un sepuʹo ketai palai mida ngeliwet palaʹ diaʹ Perisi ngan badaʹ mida diseʹ puyan iaʹ Yesus lepa ti.

⁴⁷ Ina ukoʹ diaʹ Perisi ngan diaʹ detaʹu lataʹ dina tai petiraʹ ngan Mpun diaʹ Pengelataʹ Lepoʹ ina, ngan kuma ha: “Inu ne iaʹ ilu ke ti, uban kadoʹ diseʹ puyan nyingan kuʹun laki ini?

⁴⁸ Buk le ke pele diseʹ puyan ne pekini, mung dulu iaʹ ke ngelan neng ia ʹo, ngan perinta Rum ke nai beteʹ ngan nasaʹ Umaʹ Palan le ngan peging lepoʹ le mung.”

⁴⁹ Un ca laki iaʹ Pengebioʹ Detaʹu re uman ina, ngadan ne Kayapas, iaʹ kuma ha: “Abeʹ kem tisen ca inu.

⁵⁰ Moʹ abeʹ kem tisen mo? Tiga kuʹo pe ca usa matai tuman kelunan kadoʹ, cen uʹo lepoʹ ilu mung ke salai.”

⁵¹ Iaʹ lan ne, abeʹ e pisiu ini man kimet te tengen, un sepuʹo uban ia iaʹ Pengebioʹ Detaʹu uman ina, ia badaʹ kimet Allah neng puyan Yesus ke matai tuman kelunan Yahudi.

⁵² Abeʹ e tuman ida tengen le, un sepuʹo tuman mung anak Allah diaʹ purat kusun tanaʹ ini, apan ne ke ngkin ida pempun seleket ca le usa.

⁵³ Cen tau ina ne kelunan lataʹ Yahudi peseket ke mita janan ubaʹ ke lematai Yesus.

⁵⁴ Ina ukoʹ Yesus abeʹ un peluhaʹ tai masat kaʹ tanaʹ Yudia, penco tai ie mecin ngan tai kaʹ ca lepoʹ, ngadan Ipraim, kukoʹ o ngelineʹ ngan diaʹ byaʹ katuk ke are, iaʹ nyeng kata tanaʹ lenga.

⁵⁵ Nyeng laʹa kelunan Yahudi ke ti Adet Bunut Paska, ngan kadoʹ dulu nai cen iʹut sungai tai kaʹ Yerusalim ke ti adet puyan buheʹ, kena Adet Bunut ina.

⁵⁶ Dalau re pempun dalem Umaʹ Palan, ida mita Yesus. Kun nte lemutu ida selepeʹ: “Kumpin baʹan ncem, abeʹ nyatan ne nai neng Adet Bunut ini ʹo sedeʹ?”

⁵⁷ Lepa ne diaʹ detaʹu lataʹ ngan diaʹ Perisi cuk dulu, mele aheʹ iaʹ tisen kempi Yesus, tai badaʹ mida apan nte senteng mapo ia.