YAYA 1 - Kenyah New Testament

Tiraʹ Udip

¹ Kena Allah nyelung uyan tanaʹ ini, un ca Laki iaʹ koʹ baʹan Tiraʹ cen kimet Allah. Tiraʹ ini un pemung ngan Allah. Atek kuaʹ Allah lete Tiraʹ ini pe.

² Cen tading tading are, lepa ne Tiraʹ ini un pemung ngan Allah.

³ Man Tiraʹ ini lete Allah uyan ketoʹ naʹan inu ne. Ca inu pe abeʹ un nuyan tahaʹ awang neng ia.

⁴ Tiraʹ ini ne iaʹ puʹun udip, ngan udip ini te iaʹ ngkin dema palaʹ kelunan.

⁵ Dema ini iaʹ ngedema dalau ntem, ngan ntem abeʹ un senteng kelemataʹ dema ini ne.

⁶ Kun Allah cuk lawa ha nai. Ia ne ca kelunan ngadan ne Yaya.

⁷ Yaya nai tuman ke badaʹ tugen me kelunan neng puyan dema ini. Nai te Yaya ngan penco dau tugen ne, apan mung kelunan ke kenahan dau katuk ke ngan ngelan dema ini.

⁸ Abeʹ e Yaya iaʹ dema ini. Yaya nai apan ne badaʹ tugen dau ue neng dema ini.

⁹ Dema ini iaʹ atek dema lan, dema iaʹ nai kusun tanaʹ ini, iaʹ ngedema udip kelunan mung.

¹⁰ Tiraʹ idai are, lepa un kaʹ usun tanaʹ ini. Man ia lete Allah lepa uyan usun tanaʹ ini. Naʹ pe pekina, dulu kusun tanaʹ ini abeʹ tisen ia are.

¹¹ Nai te ia palaʹ tanaʹ a tengen, un sepuʹo kelunan dina diaʹ anun ne tengen lete, abeʹ de ubaʹ alaʹ ia ne.

¹² Un te palai diaʹ alaʹ ia, penco ngelan ia. Ina ukoʹ o naʹ penyukat mida sukat uyan ida diaʹ anak Allah.

¹³ Abeʹ de tai nuyan diaʹ anak Allah koʹ baʹan kelayen kelunan are, koʹ baʹan puyan le tading anak kuʹun iaʹ tuʹa le; bang Allah tengen iaʹ Amai re.

¹⁴ Tiraʹ idai are, lepa nai pekaliu ca usa kelunan, penco mudip neng ahang ilu. Ameʹ diaʹ taʹan serema peniga ha sangan pengelesau ngan isiu iaʹ telit. Bang ca ia le iaʹ Anak Amai Bio, ina ukoʹ un pekina uban puyan serema peniga ha.

¹⁵ Yaya lepa badaʹ tugen neng ia. Kun Yaya ngelengap kuma ha: “Ikem nawai dau isiu heʹ are iaʹ akeʹ kuma: ‘Laki iaʹ kenai bayaʹ neng akeʹ, ia iaʹ pelapa bioʹ neng akeʹ, uban ia iaʹ un kena heʹ nai pempet.’ Isiu ina sihoʹ neng Laki ini ne.”

¹⁶ Pengelesau iaʹ sangan neng ia, ngan cen ina ha naʹ peniga me ilu mung. Seʹ e lemuto naʹ pit peniga ha milu.

¹⁷ Cen Musa, Allah lepa naʹ Katuk Adet milu. Un sepuʹo cen Yesus Keristus kenai pengelesau ngan isiu iaʹ telit.

¹⁸ Abeʹ un aheʹ milu kelunan iaʹ lepa taʹan Allah. Bang ca Laki ini le iaʹ atek kuaʹ ngan Allah are, ia iaʹ un petemping ngan Allah lete, ia ne iaʹ atek peluhaʹ Allah milu.

Katuk Yaya Guru Batis

¹⁹ Kelunan Yahudi kaʹ lepoʹ Yerusalim cuk detaʹu ngan diaʹ Liwi tai palaʹ Yaya apan nte lemutu ia: “Aheʹ koʹ ne?”

²⁰ Tegoʹ ina, abeʹ Yaya leko mipa ida, un sepuʹo tempa dau ue badaʹ mida, kuma ha: “Abeʹ keʹ Keristus iaʹ ke ngkang pungu udip.”

²¹ Penco dau re lemutu ia laʹa: “Moʹ aheʹ koʹ ne tupe? Moʹ abeʹ koʹ ca Ilia mo?” Un dau Yaya mipa ida: “Naʹun, abeʹ keʹ ina.” Un dau re neng ia laʹa: “Moʹ abeʹ koʹ pegawa bioʹ pe?” “Naʹun,” kun ne.

²² Un dau re pisiu ia pelaʹa: “Badaʹ ne mameʹ, aheʹ koʹ ne. Ameʹ ke ngeliwet ngkin ipa palaʹ diaʹ cuk ameʹ ne ʹo. Kumpin baʹan ncoʹ?”

²³ Kun dau Yaya mipa: “Ukoʹ baʹan ini ne akeʹ: ‘Un ca usa ngelengap kaʹ tanaʹ lenga, Kun dau ue: Petelit ne janan iaʹ kukoʹ Tuhan ke nai.’ ” (Ini ne iaʹ ukoʹ baʹan dau pegawa Yesaya lepa pisiu re.)

²⁴ Un sepuʹo ketoʹ kelunan Perisi dina ke cuk diaʹ lawa dina tai palaʹ Yaya.

²⁵ Dau re lemutu ia: “Buk koʹ abeʹ un Keristus iaʹ ngkang pungu udip, ngan abeʹ koʹ Ilia, ngan abeʹ koʹ iaʹ pegawa bioʹ, moʹ inu adeʹ koʹ ngebatis dulu?”

²⁶ Dau Yaya mipa: “Akeʹ iaʹ ngebatis dulu man sungai. Un sepuʹo un ca usa iaʹ nekejeng neng ahang ikem, abeʹ kem nyituk ia.

²⁷ Ia ina iaʹ ke nai tebayaʹ akeʹ ne ʹo. Abeʹ pe akeʹ un tiga, di pe ke mubai tali sepatu ue, abeʹ pe akeʹ tekep.”

²⁸ Ketoʹ puyan ini nuyan kaʹ lepoʹ Bitani, tahaʹ sek tau sungai Yardin, kukoʹ Yaya ngebatis dulu.

Anak Dumba Allah

²⁹ Neng kenempam me, Yaya taʹan kenai Yesus palaʹ ia ngan kuma ha: “Ini ne atek Anak Dumba Allah iaʹ senteng mesau penyalaʹ kusun tanaʹ ne.

³⁰ Ini ne iaʹ akeʹ badaʹ dalau heʹ pisiu are: ‘Un ca Laki iaʹ nai bayaʹ akeʹ. Ia iaʹ lapa bioʹ cen akeʹ, uban ia ne lepa un kena heʹ nai pempet kusun tanaʹ ini re.’

³¹ Moʹ abeʹ keʹ putuk aheʹ e, un sepuʹo kenai heʹ ngebatis kelunan man sungai, apan lepoʹ Israil ke tisen neng ia.”

³² Pekini dau tugen Yaya: “Akeʹ lepa taʹan kenai Berua Tuhan cen lanit kuaʹ layan ca sui garaʹ are ngedung kempau ia.

³³ Pa tegoʹ puyan ina abeʹ keʹ tisen ia lepe, un sepuʹo Allah iaʹ cuk akeʹ ngebatis kelunan man sungai, kun dau ue makeʹ: ‘Ikoʹ ke taʹan Berua Tuhan nai kentaʹ ʹo, ngedung kempau ca Laki, ia ne iaʹ ke ngebatis kelunan man Berua Buheʹ.’

³⁴ Akeʹ lepa taʹan ia, ngan badaʹ tugen mikem, ia ne iaʹ atek Anak Allah.”

Kelunan diaʹ ading bayaʹ katuk Yesus

³⁵ Un neng kenempam me laʹa, Yaya ngan dua re diaʹ bayaʹ katuk ke

³⁶ taʹan ketai Yesus masat lapa ida. Kun dau Yaya: “Ini ne iaʹ atek Anak Dumba Allah.”

³⁷ Kun dua usa diaʹ bayaʹ katuk Yaya dina kenahan dau ue pisiu ini, penco tai re ngan Yesus.

³⁸ Kun Yesus mupa taʹan kenai re bayaʹ ia, ngan lemutu ida: “Aheʹ iaʹ ikem pita tupe?” Kun dau re mipa ia: “Rabi, (sen ngadan ina ‘guru’,) kempi ukoʹ koʹ ngelineʹ?”

³⁹ Kun dau Yesus mipa ida dua: “Nai ne naʹat te.” Sulo ketai re ngan Yesus, taʹan kukoʹ o ngelineʹ, penco re ngelineʹ ngan ne utung tau ina. (Kihoʹ kihoʹ tegoʹ jam pat tai tahup ne ina.)

⁴⁰ Ca usa me dua dina diaʹ kenahan dau Yaya, penco tai ngan Yesus, ina ne Anderias cenganak Simun Peterus.

⁴¹ Pelapa Anderias tegoʹ diaʹ cenganak ke simun, kun ne badaʹ mia: “Un meʹ taʹan Mesias.” (Sen ngadan ina Keristus, Laki iaʹ ngkang pungu udip.)

⁴² Kun Anderias ngkin Simun palaʹ Yesus. Kun Yesus naʹat ia ngan kuma ha: “Ikoʹ Simun anak Yaya. Ngadan ncoʹ ʹo Kipas.” (Ngadan ini kuaʹ Peterus, sen ne “Batu.”)

Puyan Yesus mengin Pilipus ngan Natanil

⁴³ Neng kenempam me, betep ne tekaʹ kimet Yesus penco ubaʹ tai kaʹ tanaʹ Galilia. Kun ne tegoʹ Pilipus ngan kuma ha neng ia: “Nai ne ngan nceʹ.”

⁴⁴ Pilipus iaʹ nai cen Bit-saida, lepoʹ iaʹ ukoʹ Anderias ngan Peterus ngelineʹ.

⁴⁵ Pelapa Pilipus petegoʹ ngan Natanil, kun ne badaʹ mia: “Un meʹ tegoʹ Laki iaʹ Musa badaʹ milu dalem Kitap Katuk Adet are. Un diaʹ pegawa nyurat neng ia lete. Ia ne Yesus anak Yusup lepoʹ Nasarit.”

⁴⁶ Kun dau Natanil lemutu: “Un inu iaʹ tiga senteng nai cen Nasarit taʹin?” Dau Pilipus mipa ia: “Nai ne naʹat te ading.”

⁴⁷ Dalau Yesus taʹan kenai Natanil palaʹ ia, kun ne pisiu puyan laki ina: “Atek ca kelunan Israil lan ini. Abeʹ un inu iaʹ palo neng ia.”

⁴⁸ Natanil lemutu Yesus: “Kumpin ncoʹ tisen akeʹ?” Un dau Yesus mipa ia: “Akeʹ lepa taʹan ikoʹ dalau hoʹ kentaʹ kayu abung ahaʹ idai are, kena Pilipus mengin ikoʹ are.”

⁴⁹ Un dau Natanil mipa ia: “Guru, ikoʹ iaʹ Anak Allah, ikoʹ iaʹ paren lepoʹ Israil.”

⁵⁰ Un dau Yesus: “Un ncoʹ ngelan kuʹun dau puyan nceʹ bang badaʹ akeʹ lepa taʹan ikoʹ kentaʹ kayu abung ahaʹ idai? Ikoʹ ke taʹan iaʹ pelapa tiga cen ini ʹo.”

⁵¹ Sulo dau ue pisiu mida: “Atek lan dau heʹ badaʹ mikem, ikem ke taʹan langit pesik, ngan melikat Allah tai kempau nai kentaʹ neng Anan Sio ini.”