YAKUP 5 - Kenyah New Testament

Katuk mulen kelunan diaʹ kayaʹ

¹ Naʹkini tiga hem diaʹ kayaʹ ngeringa dau heʹ ading. Nange ngan ngadui kuʹun puyan pengetaru iaʹ kenai nantaʹ ikem uʹo.

² Pengekayaʹ kem ketai mero, ngan ulat ke uman umpat cem.

³ Mas ngan pirak kem lepa meting, ngan ting nge ina ke nuyan ca tugen iaʹ ke badaʹ penyalaʹ kem, ngan uman sin usa hem koʹ baʹan luten nte. Neng tau diaʹ kebayaʹ ini, ikem pempun pengekayaʹ kem.

⁴ Kelunan diaʹ pegayeng kaʹ uma hem, abeʹ kem nyuaʹ ban tau re. Ngeringa dau re nguheng. Kelunan diaʹ majau uma hem, un dau lengap de lepa abeʹ palaʹ telinga Allah, Tuhan iaʹ Un Bioʹ Penyukat.

⁵ Ikem diaʹ mudip neng penyelap ngan pengawaʹ usun tanaʹ ini. Seleket cem pelempoʹ usa hem koʹ baʹan puyan sapi kena tau dulu ke nebek ke.

⁶ Ikem lepa ngukum ngan lematai kelunan diaʹ abeʹ un salaʹ, ngan abeʹ de nyakat ikem are.

Puyan denaʹ tawai ngan temameʹ

⁷ Tuman ina cenganak cenganak keʹ, denaʹ ne tawai hem pabeʹ kenai Tuhan abeʹ. Pekimet ne puyan kelunan diaʹ pegayeng uma. Denaʹ tawai re pekena seʹ kenai pula re ngebuʹan. Ngan denaʹ tawai re pekena ujan iaʹ nai ading, ngan pekina pe ujan iaʹ nai ngebayaʹ a.

⁸ Pekina lete ikem, tekep kem ke un denaʹ tawai. Nengayet ne nyalet tebelum ngkem, uban tau iaʹ Tuhan kenai un nyeng laʹa.

⁹ Ahaʹ cenganak cenganak keʹ, ayen nguheng dau neng ikem semaheʹ, idi Allah abeʹ un ke pebetep ukum neng ikem. Lepa nyeng ne kenai Laki iaʹ ke Pebetep Ukum, bang tenup seʹ kenai ie naʹkini.

¹⁰ Ahaʹ cenganak cenganak keʹ nawai tiga neng kelunan diaʹ pegawa cen naʹaʹ, ida diaʹ menco isiu dalem ngadan Tuhan are. Tiga hem alaʹ kata cen ida, kumpin puyan nte denaʹ tawai ngihen dalau re sihoʹ penaru.

¹¹ Ilu kuma ida, diaʹ ngihen ngan denaʹ tawai cen naʹaʹ are, un tiga udip naʹkini. Ikem lepa tisen denga puyan denaʹ tawai Ayup cen naʹaʹ, ngan tisen te ikem kumpin ban Tuhan pubo ia neng kebayaʹ a. Uban Tuhan iaʹ un sangan pengelesau ngan pengemalaʹ tekaʹ.

¹² Ahaʹ cenganak cenganak keʹ, un iaʹ bioʹ neng mung diaʹ ca, iaʹ ina tegoʹ kem ke petuket ca inu, ayen pesantet dau. Ayen pesantet man ngadan surga, buk are man ngadan tanaʹ ini, buk are inu inu diaʹ ca pe. Bang pisiu “ahaʹ” tegoʹ kem ke badaʹ ahaʹ, ngan “naʹun” tegoʹ kem ke badaʹ naʹun pe, idi hem abeʹ un sihoʹ ukum Tuhan Allah uʹo.

¹³ Un aheʹ neng ahang ikem iaʹ un penaru tupe? Tekep pe ke lemameʹ. Un aheʹ iaʹ bangen tawai tupe? Tekep pe ke nyanyi pempau Tuhan.

¹⁴ Un aheʹ iaʹ un sakit tekaʹ tupe? Tekep pe ke mengin diaʹ tuʹa Mpun diaʹ ke lemameʹ mia, ngan muso kelaʹang neng ia dalem ngadan Tuhan.

¹⁵ Temameʹ ini, iaʹ peging ngan pengelan, ke paget kelunan sakit ina. Tuhan iaʹ ke meteʹ ia nai tiga laʹa. Ngan Tuhan ke mesau penyalaʹ diaʹ ia lepa ti.

¹⁶ Tuman ina, tiga hem teto ngahaʹ penyalaʹ kem palaʹ ikem semaheʹ, ngan lemameʹ mikem semaheʹ, apan ncem ketai maget. Moʹ temameʹ ca kelunan teneng un nyingan kuʹun ne.

¹⁷ Cen naʹaʹ are, Ilia ca kelunan kuaʹ layen ilu lete, kun ne lemameʹ ngan taten dau nyat ayen un ujan, sulo abeʹ un ujan kaʹ tanaʹ ina pa dalem telu uman pa beluaʹ.

¹⁸ Kun ca liwai laʹa Ilia lemameʹ, sulo nai ujan laboʹ cen langit, penco ke un padai mudip kaʹ tanaʹ ina laʹa.

¹⁹ Ahaʹ cenganak cenganak keʹ, buk ca usa mikem iaʹ tai duncau cen katuk telit, penco ketai ca usa ke ngkin kimet te uleʹ liwet laʹa,

²⁰ nawai tiga dau ini, aheʹ diaʹ ngkin ca kelunan penyalaʹ nyepuleʹ kimet te cen janan udip pe iaʹ salaʹ are, atek ke ke pudip berua kelunan penyalaʹ ina cen patai, mentung uyan ukoʹ kadoʹ penyalaʹ ketai pesau. 12