YAKUP 3 - Kenyah New Testament

Puyan jelaʹ

¹ Ahaʹ cenganak cenganak keʹ, abeʹ tekep ikem kadoʹ ketai nuyan guru. Uban ikem tisen buk ilu diaʹ guru un salaʹ, bahat kuʹo ne ukum iaʹ ke pebetep dau neng ilu cen ʹo dulu diaʹ ca.

² Ilu mung un ti salaʹ tahaʹ palai ie. Daʹam puyan kelunan iaʹ nyahut abeʹ un ti ca salaʹ isiu. Senteng pe ia pubo mung usa ha.

³ Pekimet pun kuda: ilu naʹ ket malat kaʹ dalem paʹ a, apan ne bayaʹ kimet le. Senteng ilu cuk ia tai mele kempi kempi pengubaʹ le.

⁴ Buk are pekimet puyan ca kapen: naʹ pe usa ha bioʹ, ngan naʹ pe bahiu iaʹ kasa ke nyuntung nge, senteng ilu petelit asat te man ca besai iʹut kaʹ mudi ie, sulo ho tai bayaʹ kimet deliba ha.

⁵ Pekina lete puyan jelaʹ: naʹ pe ia iʹut, senteng nge badaʹ puyan bioʹ ngan balang dau. Pekimet baʹi tegoʹ tagaʹ majan, kumpin bioʹ ban tai ie tutung kuʹun ca lahang luten iaʹ iʹut le.

⁶ Koʹ baʹan luten ne jelaʹ lete. Jelaʹ ina iaʹ seleket pengejaʹat usun tanaʹ kaʹ dalem usa le. Kun ne nipo pengejaʹat te pa tipo usa le. Jelaʹ ina iaʹ pejiget luten neng mung puyan pengudip le singket singket tau, man ca puyan luten iaʹ nai cen lubang ukum luten.

⁷ Senteng kelunan pemelut mung naʹan cen, koʹ baʹan pun lajam, ngan sui, ngan pun iaʹ ngamang, ngan atuk pe. Lepa ne kelunan pemelut dina.

⁸ Un sepuʹo nyahut abeʹ un ca usa kelunan iaʹ lepa pemelut jelaʹ. Ia ne ca puyan iaʹ jaʹat, ngan iaʹ ilu abeʹ senteng ke ngaren. Sangan kuʹun pengelaʹit patai pe ia.

⁹ Ilu kanan jelaʹ ina man nyuaʹ tiga saheʹ palaʹ Tuhan iaʹ Amai Bioʹ le. Ngan pelaʹa ilu kanan ne man nunoʹ kelunan diaʹ penyeng ngan le, diaʹ ina kelunan diaʹ lepa nuyan kuaʹ koʹ seʹ layen Allah.

¹⁰ Dau isiu iaʹ nyuaʹ tiga saheʹ ngan dau tunoʹ nai musa cen ca le paʹ le. Ahaʹ cenganak cenganak keʹ, abeʹ e tekep puyan iaʹ pekina.

¹¹ Abeʹ un ca lubang tebut iaʹ ke pemusa sungai me ngan sungai paʹit cen ca lubang tuaʹ le.

¹² Ahaʹ cenganak cenganak keʹ, abeʹ ca inan abung ahaʹ senteng ngebuʹan buaʹ abang. Abeʹ ca inan buaʹ anggur senteng ke ngebuʹan buaʹ abung ahaʹ. Pekina lete sungai banget iaʹ me, abeʹ e senteng uyan sungai alo.

Penudi kimet iaʹ nai cen mpau

¹³ Un aheʹ neng ahang ikem iaʹ un penudi kimet ngan mencam tupe? Tekep pe peluhaʹ a man puyan pengudip pe iaʹ tiga, iaʹ ina menco pemuyan ine iaʹ tiga, ngan libaʹ kimet, ngan penudi kimet.

¹⁴ Un sepuʹo buk kem un puyan miʹet, ngan sakit kimet, ngan puyan maʹam kaʹ dalem kimet cem, ayen tai mpau kimet ngan palo dau ke nyakat katuk telit.

¹⁵ Puyan penudi kimet iaʹ pekini, abeʹ e nai cen surga. Un puʹun ne kusun tanaʹ ini. Abeʹ e sihoʹ udip berua, bang cen bali jaʹat kenai ie.

¹⁶ Kempi iaʹ un puyan petiʹit ngan maʹam, kina lete ke un puyan iaʹ abeʹ un tuman, ngan kina pe un singket naʹan puyan iaʹ jaʹat.

¹⁷ Un sepuʹo penudi kimet iaʹ nai cen mpau, iaʹ ading ading nge un puyan iaʹ buheʹ. Un laʹa tadan tekaʹ a, ngan denaʹ seʹ puyan ne, ngan ubaʹ pekejahi seʹ e. Laʹa ia un sangan kuʹun pengelesau ngan naʹan naʹan pemuyan tiga diaʹ seleket ban buʹan ne. Abeʹ e un selepeʹ kimet ngan puyan pekaloʹ-kaloʹ seʹ.

¹⁸ Moʹ kelunan diaʹ menco udip tadan, seleket de mula luang udip tadan, ngan ilu ke majau puyan peniga kuʹun ne.