YAKUP 2 - Kenyah New Testament

Katuk iaʹ mulen ilu nup pebetep dau neng kelunan

¹ Ahaʹ cenganak cenganak keʹ, koʹ baʹan ikem diaʹ ngelan Tuhan le Yesus Keristus, Tuhan iaʹ serema peniga, ayen ncem peletoʹ selepeʹ seʹ puyan neng kelunan bayaʹ seʹ puyan nte cen awang tuaʹ.

² Buk ca kelunan kayaʹ, iaʹ un angkoʹ mat ngan gelam iaʹ tiga, nai kaʹ mpun ncem, ngan pekina pe kenai ca kelunan kasip iaʹ un gelam apeʹ le.

³ Buk kem bioʹ selama neng kelunan iaʹ un gelam tiga ina, penco pisiu ia kuma ha: “Madung kukoʹ iaʹ tiga ini ne,” un sepuʹo dau hem neng kelunan kasip idai: “Nekejeng, buk are madung kaʹ tengkan kata taket ceʹ kini pe.”

⁴ Buk pekina dau hem, tai dengkep ne penyalaʹ kem iaʹ uyan selepeʹ neng ahang ikem, ngan puyan iaʹ pebetep dau iaʹ pebesun neng kimet iaʹ jaʹat.

⁵ Ahaʹ cenganak cenganak diaʹ akeʹ malaʹ, ngeringa dau heʹ. Allah iaʹ ban lemileʹ kelunan kasip kusun tanaʹ ini tai kayaʹ dalem pengelan, ngan tai un puyan pengaren iaʹ Allah lepa petuket ke naʹ me kelunan diaʹ malaʹ ia.

⁶ Un sepuʹo ikem abeʹ un selama seʹ neng kelunan kasip! Aheʹ diaʹ nyemenaʹ ikem ngan menat ikem palaʹ diaʹ pebetep ukum tupe? Kelunan kayaʹ lete.

⁷ Ida diaʹ pisiu jaʹat dau neng ngadan tiga iaʹ ikem un.

⁸ Atek tai teneng puyan ikem ke ti buk kem bayaʹ dau adet neng puyan ban Allah ke ngaren ilu, iaʹ ilu tisen un dalem Kitap iaʹ pekini dau: “Malaʹ neng kelunan diaʹ penyeng ngan ncem, kuaʹ baʹan usa hem tengen.”

⁹ Un sepuʹo buk kem selepeʹ seʹ puyan neng kelunan, bayaʹ seʹ puyan cen awang tuaʹ le, dengkep seʹ ban penyalaʹ kem, ngan Adet Tuhan Allah iaʹ ke nyalet penyalaʹ neng ikem, koʹ baʹan kelunan diaʹ ngesa adet.

¹⁰ Aheʹ diaʹ ngesa ca katuk ukum neng Adet Tuhan Allah lepa un penyalaʹ iaʹ ke ngesa mung katuk ukum.

¹¹ Moʹ ia iaʹ pisiu kuma: “Ayen tai pemung nyelem,” ia lete iaʹ pisiu kuma: “Ayen lematai kelunan.” Naʹ pe ikem abeʹ un tai pemung nyelem, un sepuʹo buk kem lematai kelunan, seʹ kem lepa ngesa katuk ukum lete.

¹² Tiga hem lemuto pisiu ngan ti puyan kuaʹ baʹan kelunan diaʹ ke nawai adet iaʹ pawang kelunan kelap cen iaʹ jaʹat, uban adet ina iaʹ ke pebetep dau neng ilu.

¹³ Uban tegoʹ Allah ke pebetep dau neng ca kelunan iaʹ abeʹ un pengelesau cen kena, abeʹ Allah ke un lesau neng ia. Un sepuʹo pengelesau iaʹ ke un usun neng puyan iaʹ pebetep dau.

Puyan pengelan ngan puyan pemuyan le

¹⁴ Ahaʹ cenganak cenganak keʹ, inu iaʹ bang buk ca kelunan pisiu kuma: “Akeʹ un pengelan,” buk pengelan ne abeʹ un nai luhaʹ neng puyan iaʹ pemuyan ne. Abeʹ nyatan puyan pengelan iaʹ pekina ke pudip ia.

¹⁵ Kumpin buk cenganak laki ngan cenganak leto le un kasip neng gelam ngan tepet neng penguman.

¹⁶ Inu iaʹ bang buk kem pisiu ida kuma ha: “Talan ne Allah naʹ peniga mikem, uman ne tiga tiga, ngan ayen jiwen uʹo,” mentung ngkem abeʹ un naʹ inu iaʹ tepet neng pengudip de tupe?

¹⁷ Pekina lete neng puyan pengelan. Buk pengelan ina tengen, mentung abeʹ un puyan pemuyan ngan ne, seʹ e pengelan iaʹ matai.

¹⁸ Masaʹ un kelunan iaʹ ke pisiu kuma ha: “Ca usa iaʹ un pengelan ngan ca usa pe iaʹ un pemuyan.” Dau heʹ ke mipa: “Badaʹ makeʹ kumpin seʹ ca kelunan senteng ke un pengelan petem abeʹ un pemuyan. Akeʹ ke peluhaʹ pengelan nceʹ mikem bayaʹ ban pemuyan nceʹ.”

¹⁹ Un ncem ngelan ca tuaʹ le Tuhan Allah tupe? Tiga buk pekina. Un pe bali diaʹ ngelan pekina lete, ngan laʹa ida ngeregen ngan takut pe.

²⁰ E kelunan palui, inu adeʹ kem abeʹ un tisen seʹ pengelan iaʹ petem abeʹ un pemuyan, atek pelo-lo le.

²¹ Uban inu iaʹ ukoʹ tepun le Ibrahim tai teneng ngan Allah tupe? Ina ne cen pemuyan ne tegoʹ o mencai anak ke Isak neng usun padung liwa are.

²² Adeʹ kem are tisen tupe? Puyan pengelan Ibrahim tai pebulung ngan puyan pemuyan ne, moʹ bayaʹ ban pemuyan ne pengelan ne tai nuyan daʹam.

²³ Tai nuyan lan ne dau Kitap iaʹ kuma ha: “Ibrahim ngelan Tuhan Allah, ngan kuʹun pengelan ne Tuhan Allah alaʹ ia ca kelunan teneng.” Pekina iaʹ ukoʹ dulu pisiu Ibrahim iaʹ tuyang Allah.

²⁴ Cen ina ikem ke tisen ban kelunan ketai teneng ngan Allah kuʹun pemuyan iaʹ ia ti, abeʹ e sepe kuʹun pengelan ne tengen le.

²⁵ Kuaʹ koʹ baʹan ina lete Rakap, leto pedayang are. Leto ina tai nuyan teneng ngan Allah moʹ kuʹun pemuyan iaʹ ia ti. Uban Rakap ina alaʹ diaʹ batang lawa Yahudi dina ngan selama dau, penco ho mepo ida tai kelap bayaʹ ca naʹan janan.

²⁶ Tuman ina, kuaʹ baʹan usa iaʹ abeʹ un berua un matai, pekina lete pengelan iaʹ abeʹ un pemung ngan pemuyan un matai lete.