YAKUP 1 - Kenyah New Testament

¹ Cen Yakup iaʹ ulaʹ Allah, ngan ulaʹ Tuhan Yesus Keristus: Akeʹ badaʹ tiga kimet palaʹ mung kelunan diaʹ anun Allah, diaʹ ban purat tipo kusun tanaʹ ini.

Pengelan ngan penudi kimet

² Cenganak cenganak keʹ, tegoʹ kenai naʹan naʹan puyan iaʹ ke ten ikem, tekep kem ke kuma tiga ukun,

³ uban ncem tisen tegoʹ pengelan ncem tai un usun neng puyan pengeten ina, ketai kuʹo ho ikem un penyukat tekaʹ ke ngihen ne.

⁴ Tiga tiga ne apan pengihen ncem ke nuyan pa sukung daʹam. Abeʹ un tepa, idi hem tai nuyan daʹam ngan sukung tekaʹ, ngan abeʹ un tepet neng inu inu pe.

⁵ Un sepuʹo buk un ca mikem iaʹ tepet neng penudi kimet te, tekep ia lemameʹ palaʹ Allah iaʹ ke naʹ penudi kimet ina mia. Moʹ Allah iaʹ naʹ milu mung ngan iaʹ lebang ngan lesau kimet.

⁶ Un sepuʹo tegoʹ kem lemameʹ, abeʹ kem are senteng ke ngelan, ngan peletoʹ abeʹ un kawaʹ tekaʹ. Aheʹ iaʹ kawaʹ tekaʹ, seʹ e koʹ baʹan ca luyak kaʹ banget iaʹ tai suntung ngan pelutoʹ udu, pa piu ue lero, ngan peniga ha pe tai iaʹ pekina, abeʹ un betep kimet te neng inu inu iaʹ ia ke uyan. Ayen ne kuma ia ke alaʹ inu inu cen Tuhan ʹo.

⁷ Kelunan yaʹ pekina ayen pekimet iya sukat alaʹ inu inu chen Tuhan.

⁸ Uban kelunan yaʹ dua kimet baʹ un teneng dalem puyan udip iya.

Puyan kasip ngan puyan kayaʹ

⁹ Tekep cenganak le diaʹ kasip un bangen tawai tegoʹ Allah ke pempau ia,

¹⁰ ngan pekina lete cenganak le diaʹ kayaʹ, tegoʹ Allah ke pelibaʹ ia. Uban diaʹ kayaʹ ketai salai koʹ baʹan piu udu kaʹ baʹi.

¹¹ Kenai mpau tau, sulo tai katan ngan pelutoʹ udu, pa piu ue lero, ngan peniga ha pe tai jaʹat. Pekina lete puyan kelunan kayaʹ ketai tasaʹ dalau ue bubo seʹ menco gayeng nge.

Pengeten ngan puyan ten pelaboʹ ilu neng penyalaʹ

¹² Bangen ne kelunan diaʹ ngihen tuaʹ dalau pengeten, uban tegoʹ o lepa un usun neng pengeten ne, Tuhan Allah ke naʹ bang mia. Iaʹ ina pengudip iaʹ Allah lepa petuket ke naʹ me kelunan diaʹ malaʹ neng ia.

¹³ Buk ca keluna, iaʹ sihoʹ pengeten iaʹ pekina, un tekaʹ iaʹ ten pelaboʹ ia neng penyalaʹ, ayen kelunan ina kuma: “Cen Allah kenai puyan iaʹ ten pelaboʹ akeʹ neng penyalaʹ ini.” Uban puyan iaʹ ten pelaboʹ neng penyalaʹ abeʹ e senteng sihoʹ Tuhan Allah, ngan pekina pe Allah tengen abeʹ un ten kelunan, mele aheʹ pe, ke ten pelaboʹ ia neng penyalaʹ.

¹⁴ Un sepuʹo tegoʹ ca kelunan tai pihit ngan sihoʹ tepap kuʹun pengubaʹ jaʹat kimet te tengen, ina ne puyan iaʹ ten pelaboʹ ia neng penyalaʹ.

¹⁵ Uʹo lepa lemaleʹ ne pengubaʹ jaʹat kimet te, sulo ho mempet penyalaʹ, ngan tegoʹ penyalaʹ lepa sukung bioʹ ʹo, sulo ho mempet patai.

¹⁶ Cenganak cenganak diaʹ akeʹ malaʹ, ayen dayo peseluk.

¹⁷ Cen surga kenai mung puyan iaʹ mencai tiga, pekina pe singket pencai iaʹ daʹam. Atek nai cen Allah puyan dina, iaʹ ban nyelung uyan mung naʹan dema kaʹ langit. Ia tengen abeʹ un tali pekaliu. Abeʹ e uyan ntem kuʹun puyan ne ketai paso.

¹⁸ Uban kuʹun pengubaʹ a tengen, Allah uyan ilu man puyan tiraʹ iaʹ telit lan, apan ilu ke un ukoʹ iaʹ ading neng ahang mung inu diaʹ ia uyan.

Ngeringa ngan ti bayaʹ dau

¹⁹ Cenganak cenganak diaʹ akeʹ malaʹ, nawai ne ini. Tekep ilu mung sangkit ke ngeringa dau. Un sepuʹo tekep le ayen busak ke pisiu, ngan ayen laho miʹa.

²⁰ Moʹ sedep Allah iaʹ teneng, abeʹ un nalan kuʹun iʹa kelunan.

²¹ Tuman ina, ngerada ne usa hem cen singket naʹan puyan iaʹ jameng, ngan singket naʹan puyan adet jaʹat iaʹ petem nyalit neng ikem. Tunuk ne palaʹ Allah, ngan alaʹ tiraʹ iaʹ ia ke mula dalem penawai hem. Tiraʹ ina iaʹ senteng ke pudip ikem.

²² Ayen panyi ikem loʹ bang ngeringa dau tiraʹ a tuaʹ le, di lareʹ menco ne bayaʹ dau ue.

²³ Aheʹ aheʹ pe diaʹ ngeringa dau tiraʹ ina, ngan abeʹ un menco bayaʹ dau ue, ia koʹ baʹan ca kelunan iaʹ naʹat kaʹ ca kelingai, ngan nugen seʹ puyan usa ha.

²⁴ Uʹo ina ha tai kelap, penco ia lingu neng kumpin seʹ layen usa ha are.

²⁵ Un sepuʹo aheʹ aheʹ iaʹ nugen lan naʹat kaʹ dalem adet iaʹ daʹam iaʹ pawang kelunan kelap cen iaʹ jaʹat ini, ngan tudep ke ngeringa dau ue, abeʹ e ke ngeringa tuaʹ le sulo tai lingu kidi, un sepuʹo ia ke penco bayaʹ dau ina. Kelunan iaʹ pekina iaʹ ke un peniga cen Allah neng mung ban pemuyan ne.

²⁶ Un aheʹ iaʹ kuma ia ca kelunan iaʹ un adet tiga tupe? Buk ke abeʹ un mapo jelaʹ a, bang pelo-lo ne adet te, ngan ia peseluk ia loʹ lete.

²⁷ Ini ne Tuhan Allah iaʹ Amai Bioʹ ban kuma adet iaʹ buheʹ ngan iaʹ lan, iaʹ ina puyan ke pubo anak ilun ngan leto balu neng pengeketa re, mentung pubo usa ha tengen malap ketai tabin jameng kuʹun puyan kusun tanaʹ ini.