YAHUDA 1 - Kenyah New Testament

¹ Cen Yahuda ca ulaʹ Yesus Keristus, ngan cenganak Yakup: Palaʹ mung kelunan diaʹ Allah ban mengin are, diaʹ ban mudip dalem pengemalaʹ Allah iaʹ Amai Bioʹ ngan dalem gaham Yesus Keristus iaʹ petubo ida.

² Awaʹ pe nai un pit un pit seʹ pengelesau ngan udip iaʹ tadan ngan pengemalaʹ ke nyangan neng ikem.

Guru diaʹ palo

³ Ahaʹ cenganak keʹ diaʹ akeʹ malaʹ, tekaʹ sedep keʹ are, ubaʹ ke pemuʹo tekaʹ penyanget ceʹ ke nyurat palaʹ ikem neng puyan iaʹ ke pudip ilu dalem Tuhan, iaʹ ilu ban pemung un. Un kaʹ kenai kimet ceʹ laʹa ke nyurat ca naʹan iaʹ ke petangen ikem ke pali ngkang katuk pengelan ini, iaʹ Allah lepa naʹ me ilu diaʹ anun ne ca liwai lan lan le.

⁴ Un palai kelunan diaʹ muau, diaʹ ban nyelem nai ngedalau ilu. Ida diaʹ pekaliu katuk pengelesau Allah apan nte un ukan neng pemuyan selabu re, penco re nyekang Yesus Keristus. Ia tengen iaʹ Paren le ngan Tuʹa le. Cen naʹaʹ ne Kitap Allah lepa badaʹ ukum iaʹ ke nantaʹ kelunan dina ʹo.

⁵ Naʹ pe ikem tisen mung puyan ini, ubaʹ keʹ ke petawai ikem kumpin ban Tuhan lepa pudip lepoʹ Israil cen tanaʹ Masir are. Un sepuʹo uʹo ina ia lematai diaʹ abeʹ un ngelan.

⁶ Caʹ laʹa, tiga hem ngetawai ban melikat diaʹ abeʹ un pesingo pengaren iaʹ Allah petulat mida are, pa re kelap kukoʹ de tengen. Allah ban meput ida ngan lemeka ida man beka iaʹ abeʹ senteng pesau dalem sepin ntem, pekena ukum tegoʹ Tau Bioʹ uʹo.

⁷ Ca laʹa, tiga hem ngetawai lepoʹ Sudum, ngan lepoʹ Gumura, ngan lepoʹ diaʹ nyeng pipa ida. Pekuaʹ de koʹ baʹan melikat didai are lete, ngan ida naʹ usa re neng puyan peselabu ngan leto ngan neng laki pe. Ida sihoʹ ukum luten iaʹ abeʹ un ketai pataʹ, nuyan ca kata iaʹ ke mulen kelunan mung.

⁸ Pekina lete guru palo dini. Ida ngenupi ngukan puyan penyalaʹ iaʹ ngejaʹat usa re tengen. Ida muau neng pengaren Allah, ngan ida pejaʹat dau neng paren kaʹ surga.

⁹ Naʹ pe Mikal iaʹ pengebioʹ paren melikat, abeʹ e pejaʹat dau neng aheʹ pe. Tegoʹ Mikal pesakat ngan Bali Jaʹat, punan patai Musa are, abeʹ e makang ngukum Bali Jaʹat ina man isiu iaʹ jaʹat dau, bang dau ue kuma ha: “Mele ne dau Tuhan ke ngenca ikoʹ ʹo.”

¹⁰ Ca naʹan pe kelunan dini. Ida pejaʹat dau neng puyan iaʹ ida abeʹ un tisen. Koʹ baʹan pun iaʹ abeʹ un mencam pekimet, ida un penisen cen seʹ baloʹ de, penco re ngejaʹat pengudip de man puyan ina lete.

¹¹ Siʹau pe ida. Ida bayaʹ ban janan Kain. Uban nte malaʹ ligit koʹ baʹan Bilam cen naʹaʹ are, ida petunuk usa re bayaʹ ban puyan salaʹ Bilam pe. Ida nyakat koʹ baʹan puyan Kurak nyakat cen naʹaʹ are, ngan kuaʹ ia lete ida tai tasaʹ.

¹² Kelunan dina diaʹ seleket ca tebik jameng neng Mpun ncem tegoʹ re pemung uman Bunut Tuhan ngan ncem. Abeʹ de saʹe asam seʹ uman, bang seʹ de pubo usa re tengen tuaʹ le. Ida koʹ baʹan abun iaʹ tai palit kuʹun bahiu ngan abeʹ un pelaboʹ ujan milu. Ida koʹ baʹan buaʹ iaʹ upa are, inu pia jakaʹ buaʹ ke ngebuʹan, abeʹ pe ida un buʹan. Ida koʹ baʹan puʹun kayu diaʹ lepa pubit peging pakat de, matai lan uban nte.

¹³ Ida koʹ baʹan luyak kaʹ banget iaʹ nai ngerepu, ngan puyan penyaʹe re nai luhaʹ koʹ baʹan budaʹ are. Ida koʹ baʹan betuʹen iaʹ matung bareng-areng, iaʹ Allah ke petenup ukoʹ de dalem ca ntem iaʹ malep seʹ pa pa majan uʹo.

¹⁴ Cen naʹaʹ un Inuk iaʹ kenem sun udip cen Adem, un dau ue iaʹ badaʹ dau Allah neng guru palo dini, kuma ha: “Naʹat cem, Tuhan kenai ngkin kudaʹ puloʹ ibu melikat buheʹ tugung ia.

¹⁵ Ia ke pebetep dau neng kelunan mung. Neng kelunan diaʹ un penyalaʹ muau, ia ke pelaboʹ ukum suaʹ ban pemuyan nte muau peging isiu re iaʹ jaʹat, man nte pejaʹat dau neng Allah are.”

¹⁶ Guru palo dini lemuto nguheng ngan pesalaʹ kelunan diaʹ ca. Ida bayaʹ sam pengubaʹ kimet de tengen. Mpau pe dau re neng puyan peniraʹ de, mentung nte pancau kelunan apan nte ke un bang mida tengen.

Dau mulen ngan dau katuk neng pemuyan

¹⁷ Ahaʹ cenganak keʹ diaʹ akeʹ malaʹ, petawai tiga le dau isiu diaʹ lawa Tuhan Yesus Keristus, iaʹ ida ban lepa badaʹ mikem cen naʹaʹ are.

¹⁸ Un dau re mikem are: “Dalau kenai nyeng iaʹ ke kuʹo udip ʹo, kenai luhaʹ kelunan diaʹ ke ngetepet dau neng ikem, ngan ke bayaʹ asam pengubaʹ kimet de tengen.”

¹⁹ Guru palo dini ne diaʹ uyan selepeʹ kimet neng ahang kelunan, ida tunuk pengubaʹ usa re, abeʹ e Berua Tuhan iaʹ man ida.

²⁰ Un sepuʹo ikem diaʹ cenganak keʹ, nemek ne nekedeng pengudip kem pebesun ne neng pengelan ncem iaʹ atek buheʹ. Lemameʹ ne ikem dalem pengali Berua Tuhan,

²¹ ngan mudip temek dalem pengemalaʹ Allah ngajan ncem mengaʹ kenai Tuhan le Yesus Keristus, iaʹ ke ngkin udip iaʹ saheʹ kelineʹ iaʹ ngeriman milu kuʹun ban pengelesau ue.

²² Lesau ne ikem neng kelunan diaʹ un kawaʹ tekaʹ ngelan.

²³ Pudip de, seleket ke lemencut ida cen dalem ukum luten. Neng kelunan diaʹ ca, lesau lete ida mentung ngkem takut tai tabin bayaʹ puyan penyalaʹ de. Un sepuʹo miʹi hem neng puyan asam pengubaʹ usa re, koʹ baʹan ncem ke miʹi neng ca keluma iaʹ jameng, iaʹ ke petabin ikem neng iaʹ jameng.

Dau temameʹ iaʹ pempau Allah

²⁴ Tuhan Allah iaʹ mencam ke petubo ikem malap ikem ketai laboʹ ʹo. Atek ke mencam ke mencai ikem ca ncai iaʹ buheʹ ngan bangen neng juma serema pengaren ne ʹo.

²⁵ Tuhan Allah iaʹ bang ca le, ia iaʹ Keniga Udip le kuʹun Yesus Keristus, Tuhan le ina. Palaʹ ia ketai serema peniga, ngan pengaren, ngan pengali, ngan penyukat iaʹ un cen kena, ngan iaʹ un naʹkini pe, ngan pekina pe pabeʹ pabeʹ bayaʹ ʹo. Amin. 4