TITUS 2 - Kenyah New Testament

Puʹun pengelan le iaʹ teneng

¹ Tiga hoʹ pali pekatuk ida neng puyan iaʹ tekep, iaʹ abeʹ un tai pebe neng puʹun pengelan le iaʹ teneng.

² Ngan pekina pe pekatuk ne kelunan lataʹ apan nte sebelang kimet, ngan mencam pekimet, ngan mencam mapo penyaheʹ usa re, apan nte mahing dalem pengelan nte, ngan teneng pengelesau re, ngan puyan tengayet de tegoʹ de sihoʹ taru.

³ Ngan pekina pe tiga hoʹ pekatuk leto lataʹ apan temek seʹ pemuyan nte kumpin iaʹ tekep dalem udip buheʹ ini. Ayen nte pejaʹat ngadan kelunan, ngan pekina pe ayen nte mabuk. Tekep de pekatuk dulu neng puyan iaʹ tiga,

⁴ apan pekalai leto tinen ke malaʹ laki re, ngan malaʹ anak de,

⁵ ngan mencam mapo penyaheʹ usa re, mentung buheʹ kimet de, ngan mencam pubo amin ngan tiga, apan nte tai nuyan leto diaʹ tisen tunuk laki re, apan ne ayen dulu senteng ke pejaʹat katuk Allah.

⁶ Pekina pe tiga hoʹ petangen demanai apan nte mencam mapo penyaheʹ usa re.

⁷ Tekep ne usa hoʹ tengen uyan ca kata neng mung pemuyan iaʹ tiga. Talan ne mung puyan ncoʹ ke ngelingai kimet iaʹ malaʹ katuk iaʹ telit, ngan sebelang dau hoʹ dalau hoʹ ke penco katuk ina.

⁸ Kanan ne isiu iaʹ teneng, iaʹ ukoʹ dulu abeʹ un senteng ke pesalaʹ ikoʹ, apan bunoʹ koʹ tai saʹe moʹ de abeʹ un senteng pejaʹat ilu.

⁹ Dau heʹ palaʹ diaʹ ulaʹ, tiga re bayaʹ dau pengecuk tuʹa re, ngan pebangen ida dalem mung naʹan pemuyan nte. Ngan ayen nte nyakat dau tuʹa re,

¹⁰ ngan ayen ngelau inu re. Di lareʹ tekep diaʹ ulaʹ lemuto peluhaʹ puyan nte iaʹ tiga ngan pejo kimet, apan ne pemuyan nte ke ngkin ca ngadan iaʹ tiga neng katuk Allah iaʹ Keniga Udip le.

¹¹ Allah lepa peluhaʹ pengelesau ue iaʹ ia lebang naʹ milu ina iaʹ senteng ke pudip mung kelunan.

¹² Pengelesau ue ina pekatuk ilu apan le senteng ke lepo pengudip iaʹ abeʹ un bayaʹ Tuhan Allah ina, ngan pengawaʹ usun tanaʹ ini. Ngan katuk pengelesau ina are, pekatuk ilu apan pengudip le kusun tanaʹ ini mencam mapo penyaheʹ usa le, mudip teneng ngan temek bayaʹ Allah.

¹³ Naʹkini ilu pengaʹ kenai Tau Bioʹ, iaʹ ilu nebelum kenai o. Tegoʹ ina ne, serema peniga Allah iaʹ atek bioʹ, iaʹ Keniga Udip le, kenai luhaʹ, iaʹ ina ne Yesus Keristus.

¹⁴ Ia lepa mencai usa ha ban tuman ilu, apan le pesau cen mung pengejaʹat le, ngan uyan ilu diaʹ anun ne tengen ca puhoʹ iaʹ buheʹ, iaʹ tangen ke menco pemuyan tiga.

¹⁵ Pekatuk ne mung puyan dini mida, ngan kanan ne mung tekaʹ penyukat coʹ neng puyan ncoʹ ke petangen ida, ngan negun dau neng diaʹ kenahan dau hoʹ. Ayen ncoʹ pele ca usa ke pengut ikoʹ.