TITUS 1 - Kenyah New Testament

¹ Cen Paulus, ulaʹ Allah ngan lawa Yesus Keristus. Allah lepa lemileʹ akeʹ, cuk akeʹ tai mepo pengelan diaʹ anun Allah, diaʹ ia lepa lemileʹ, mentung ngkeʹ ke ngkin ida ke tisen katuk iaʹ telit, kuaʹ baʹan layen adet buheʹ le are.

² Ban ne katuk adet le un tentan ne neng tebelum le palaʹ udip saheʹ kelineʹ iaʹ ngeriman. Allah petuket ke naʹ udip ini milu cen tading pengudip le kusun tanaʹ ini. Ngan Allah, abeʹ e lemalo.

³ Dalau neng iaʹ marung, Allah lepa ban peluhaʹ puyan ini dalem Denga Injil, iaʹ ia ngelan akeʹ ke ngkang. Pekina ne akeʹ ke pedenga ha bayaʹ dau pengecuk Allah iaʹ Keniga Udip le.

⁴ Akeʹ nyurat ini palaʹ Titus, iaʹ atek anak keʹ ban tuman ca le pengelan le. Awaʹ pe Allah iaʹ Amai Bioʹ, ngan Keristus Yesus iaʹ Keniga Udip le, ke naʹ pengelesau ue ngan udip iaʹ tadan mikoʹ.

Gayeng Titus kaʹ tanaʹ Keriti

⁵ Akeʹ pelek ikoʹ kaʹ tanaʹ Keriti cen naʹaʹ apan ncoʹ ke peteneng mung puyan iaʹ tekep ke nuyan kina, ngan pekina pe apan ncoʹ nyalet kudaʹ usa diaʹ tuʹa dalem Mpun singket singket lepoʹ. Tiga hoʹ petawai dau katuk keʹ ne.

⁶ Ca kelunan iaʹ tuʹa le dalem Mpun, tekep pe ca kelunan iaʹ abeʹ un mampin penyalaʹ, ngan ca le leto ho. Ngan dia anak ke lepa ngelan Tuhan, ngan iaʹ dulu tisen abeʹ un manteng ngan abeʹ un muau dau.

⁷ Moʹ o ngkang gayeng Tuhan Allah, kelunan iaʹ tuʹa Mpun tekep pe ca kelunan iaʹ abeʹ un salaʹ, ngan abeʹ e balang, pekina pe abeʹ e laho buseʹ, mabuk, mahing kimet, ngan pekina pe abeʹ e tutun.

⁸ Tekep pe ia nyelama pubo kelunan, ngan malaʹ neng pemuyan iaʹ tiga, ngan mencam mapo usa ha tengen, telit kimet, buheʹ, ngan mencam pekatuk usa ha tengen.

⁹ Ngan pekina pe atek ke ngkang pali neng tiraʹ iaʹ ilu ngelan ini, iaʹ pekuaʹ ngan puʹun katuk le are. Man puyan ini ne ia senteng ke petangen kelunan man katuk iaʹ telit, ngan ke peluhaʹ mung salaʹ dulu diaʹ ke nyakat katuk ini.

¹⁰ Ban ne kadoʹ kelunan diaʹ muau dau ngan pelingu dulu man katuk iaʹ abeʹ un tuman, nco pelaʹa diaʹ laho nai mecin adet Yahudi.

¹¹ Tekep le ke penceng tiraʹ kelunan dina, moʹ de pekasing dulu neng pengamin nte man katuk iaʹ abeʹ un tuman ina. Tekep de saʹe moʹ tengangan ban puyan nte bang ke pekimet mita ligit le.

¹² Un dau ca pegawa diaʹ cen tanaʹ Keriti lete, iaʹ lepa kuma ha: “Kelunan diaʹ kaʹ tanaʹ Keriti puto laleʹ le ida lemalo. Ida ne iaʹ koʹ baʹan pun jaʹat, ngan kelunan leko ngan tutun.”

¹³ Lan lete dau tugen neng ina are. Ina ukoʹ tekep koʹ pali pekatuk ngan negun dau hoʹ, apan pengelan nte nai pali lan.

¹⁴ Ayen nte ngelan laʹa dau tekenaʹ palo lepoʹ Yahudi, ngan pekina pe katuk adet kelunan diaʹ muau katuk iaʹ telit.

¹⁵ Toʹ inu inu ne un buheʹ neng kelunan iaʹ buheʹ penawai re. Un sepuʹo palaʹ kelunan diaʹ jameng penawai re ngan abeʹ un ngelan Tuhan, ca inu inu pe iaʹ abeʹ un buheʹ. Moʹ kimet ngan tekaʹ dalem penawai re lepa jameng.

¹⁶ Ida badaʹ de lepa tisen Tuhan Allah, un sepuʹo pemuyan nte iaʹ badaʹ ida abeʹ un tisen ia. Sematu re luhaʹ miʹi ngan muau. Abeʹ nyatan nte senteng uyan inu iaʹ tiga.