RUM 7 - Kenyah New Testament

Alaʹ kata neng pepeto

¹ Ahaʹ cenganak keʹ, ke tisen te ikem dau heʹ, moʹ mung ngkem ngalai tisen neng katuk adet. Katuk adet ina ngaren ilu ngajan le mudip tuaʹ le.

² Alaʹ kata neng leto iaʹ un laki, ban pebeka ha ngan laki ie kuʹun katuk adet ngajan laki ie un mudip tuaʹ le. Buk laki ie matai, pesau ne balu ina cen katuk adet iaʹ ban pebeka ida dua idai.

³ Buk dalau laki ie caʹ un mudip, ngan dalau ina pe ketai leto ho pemung nyelem ngan laki diaʹ ca, seʹ e petaro laki ie baʹan dau dulu. Un sepe buk laki ie ban matai ne, pesau ne ia cen beka katuk adet iaʹ ban pebeka ida dua are. Abeʹ pe ia ca leto iaʹ petaro pe buk ke pepeto ngan laki diaʹ ca.

⁴ Pekina lete ikem diaʹ cenganak keʹ dini, matai ne ikem neng Katuk Adet moʹ kem ban kahum dalem usa Keristus. Keristus iaʹ ban numpak mudip cen patai ie naʹkini, ia iaʹ un ikem, apan pengudip le ke uyan bang me Allah.

⁵ Dalau le mudip bayaʹ penyaheʹ usa le are, nai pengubaʹ jaʹat peliung kimet le, moʹ katuk adet iaʹ pebeteʹ e. Pengubaʹ jaʹat ina uyan pemuyan iaʹ ketai umpeng nge patai.

⁶ Di lareʹ naʹkini, pesau ne ilu cen beka katuk adet, moʹ le ban matai pebulung ngan Keristus, ina ukoʹ le pesau cen sepin katuk adet ina iaʹ ban meput ilu cen kena are. Abeʹ le bayaʹ janan puʹun laʹa iaʹ ban pesente neng kelayen adet surat, di lareʹ ilu bayaʹ janan udip mading dalem Berua Tuhan naʹkini.

Katuk Adet: ngan penyalaʹ

⁷ Buk ban pekina, inu ke kun le ne taʹin? Katuk Adet ina iaʹ uyan penyalaʹ mo? Nyahut te pekina ne. Katuk Adet ina iaʹ petisen akeʹ neng penyalaʹ, moʹ abeʹ keʹ tisen puyan kaseng ban jaʹat buk Katuk Adet abeʹ un kebadaʹ a kuma ha: “Ayen kaseng.”

⁸ Kun penyalaʹ pebeteʹ mung naʹan kaseng dalem kimet ceʹ uʹo kenai katuk ukum ina. Buk abeʹ katuk adet un, abeʹ un diseʹ penyalaʹ mudip.

⁹ Un cen naʹaʹ, udip keʹ turan neng katuk adet ina. Kenai katuk ukum ina nuʹo, belekaʹ penyalaʹ tecu nai beteʹ, lematai akeʹ.

¹⁰ Katuk ukum iaʹ nengangan ke ngkin udip milu un tegoʹ akeʹ sepuʹo, ban kenai ie ngkin ca patai ban ne.

¹¹ Moʹ penyalaʹ ina mabang ngan pelingu akeʹ, ngan cuk akeʹ pesente tawai heʹ neng pemuyan bayaʹ katuk ukum ina. Lan ne penyalaʹ kanan katuk ukum ina lematai akeʹ.

¹² Atek buheʹ Katuk Adet ina peging katuk ukum me iaʹ buheʹ, teneng, ngan tiga.

¹³ Buk ban pekina, seʹ ca inu iaʹ tiga ban ngkin patai makeʹ mo? Nyahut te pekina ne. Bang penyalaʹ iaʹ uyan ne. Moʹ penyalaʹ ina kanan ca inu iaʹ tiga, man ne ngkin patai makeʹ, apan baloʹ ban penyalaʹ ina un luhaʹ. Pekina ban penyalaʹ tai pasak bioʹ kuʹo ke uban kuʹun katuk ukum ina.

Puyan penyaheʹ diaʹ pekesuk bulu dalem usa kelunan

¹⁴ Tisen le Katuk Adet ina sihoʹ neng udip berua, un sepe akeʹ mudip neng usa iaʹ laho ke salai, iaʹ ban tunuk penyalaʹ.

¹⁵ Un pemuyan iaʹ akeʹ uyan, abeʹ keʹ putuk ke ban puyan nceʹ. Moʹ abeʹ keʹ uyan pemuyan iaʹ akeʹ ubaʹ ke uyan, di lareʹ un iaʹ akeʹ miʹi, idi iaʹ akeʹ uyan.

¹⁶ Buk keʹ uyan pemuyan iaʹ akeʹ are ubaʹ, luhaʹ tekaʹ kimet ceʹ mayo Katuk Adet iaʹ teneng, naʹ pia ca naʹan pemuyan nceʹ.

¹⁷ Neng pemuyan iaʹ pekina, abeʹ e akeʹ iaʹ uyan ne laʹa, bang penyalaʹ iaʹ ban ngawen dalem usa heʹ iaʹ uyan ne.

¹⁸ Moʹ tisen nceʹ, abeʹ un ca inu iaʹ tiga ngelineʹ dalem akeʹ, iaʹ kedalem penyaheʹ usa heʹ. Naʹ pe un kimet ceʹ ubaʹ ke uyan tiga, abeʹ un pengali heʹ ke uyan ne.

¹⁹ Iaʹ tiga, iaʹ akeʹ ubaʹ ina, abeʹ keʹ uyan ne, di lareʹ iaʹ jaʹat iaʹ akeʹ abeʹ un ubaʹ, idi iaʹ akeʹ ban uyan.

²⁰ Buk keʹ uyan inu iaʹ akeʹ abeʹ un ubaʹ ina, abeʹ e akeʹ iaʹ uyan ne laʹa, di lareʹ penyalaʹ iaʹ ngawen dalem usa heʹ iaʹ uyan ne.

²¹ Kuʹun diaʹ pekina heʹ tisen ca janan adet ini iaʹ nuyan dalem akeʹ: buk keʹ ubaʹ ke uyan ca pemuyan iaʹ tiga, iaʹ jaʹat ina iaʹ nengasaʹ nai palaʹ akeʹ.

²² Moʹ dalem penyaheʹ kimet ceʹ iaʹ mading, un bangen tekaʹ keʹ neng adet Allah.

²³ Un ʹo tisen nceʹ ban dua naʹan penyaheʹ iaʹ pegayeng kedalem akeʹ. Penyaheʹ usa heʹ iaʹ pepatai ngan penyaheʹ kimet ceʹ iaʹ mading, iaʹ akeʹ ubaʹ ina. Puyan penyaheʹ usa heʹ idai iaʹ cuk akeʹ tai peput dalem adet penyalaʹ, iaʹ pegayeng kedalem usa heʹ.

²⁴ Siʹau pe akeʹ ini, ca kelunan taru. Penyaheʹ usa ini iaʹ ke ngkin akeʹ pemung ngan patai. Aheʹ iaʹ senteng ke nakau akeʹ kidi ʹo taʹin?

²⁵ Akeʹ nyuaʹ tiga saheʹ palaʹ Allah sedeʹ: atek takau te akeʹ uban kuʹun Yesus Keristus iaʹ Tuʹa le. Moʹ o ban pekina, pekini ne tekaʹ puyan nce: kuaʹ tuk akeʹ tengen, senteng ngkeʹ bayaʹ adet Allah dalem penyaheʹ kimet ceʹ tuaʹ le, un sepuʹo penyaheʹ usa heʹ, ia ne iaʹ tunuk bayaʹ adet penyalaʹ.