RUM 6 - Kenyah New Testament

Matai petat cen penyalaʹ: mudip dalem Keristus

¹ Buk pekina, inu iaʹ ke kun le ne taʹin? Penco ne ilu mudip dalem penyalaʹ apan luhaʹ bioʹ kuʹo ke pengelesau Allah ke sau penyalaʹ le mo?

² Nyahut te pekina ne. Ilu dini ban matai neng tekaʹ penyalaʹ iaʹ ban nyalet ukum neng ilu are. Kumpin le ke ngeliwet penco mudip kedalem penyalaʹ laʹa tupe?

³ Awaʹ pe ikem tisen, moʹ tegoʹ Berua Tuhan ngebatis ilu kedalem Yesus Keristus, serengan ina lete ia ngebatis ilu kedalem patai Keristus ne.

⁴ Moʹ kuʹun puyan batis ina, lepa ne ilu pemung tanem ngan ne, moʹ patai ie ina, patai le lete. Idi le tai pekuaʹ koʹ baʹan Keristus iaʹ ban numpak mudip cen patai ie kuʹun penyukat paren Amai Bioʹ. Pekina pe ilu naʹkini, sukat lete kanan ca udip iaʹ mading.

⁵ Buk lan ne ilu ban nuyan ca le pemung ngan Keristus moʹ le ban pemung matai ngan ne, atek le ke nuyan pebulung ngan ne laʹa moʹ le numpak mudip koʹ baʹan ia are.

⁶ Tisen te ilu, ban penyaheʹ usa le iaʹ puʹun idai lepa matai neng kayu tecek pemung ngan Keristus are, apan ukoʹ penyukat penyalaʹ ini ketai salai, idi le abeʹ un caʹ caʹ ulaʹ neng penyalaʹ laʹa.

⁷ Buk ca usa matai, seʹ e takau cen penyukat penyalaʹ.

⁸ Buk lan le ban matai ngan Keristus, ilu ngelan le ke mudip ngan ne.

⁹ Tisen te ilu, ban Keristus iaʹ numpak mudip cen patai ie ina, nyahut te ke matai ne laʹa. Moʹ patai ina abeʹ un penyukat neng ia laʹa.

¹⁰ Puyan patai Keristus ne, ia ban matai atek ca liwai lan lan moʹ kuʹun penyalaʹ le iaʹ ban nyalet ukum neng ia. Un udip pe naʹ kini, ia mudip me Allah.

¹¹ Pekina lete ikem, tekep kem ke petawai, ikem ne diaʹ ban matai petat cen penyalaʹ iaʹ ban nyalet ukum neng ikem are, di pareʹ naʹkini ikem mudip me Allah pebulung kedalem Keristus Yesus.

¹² Ayen dayo penyalaʹ ngaren usa hem laʹa. Ayen dayo ia cuk ikem bayaʹ pengubaʹ penyaheʹ usa hem laʹa.

¹³ Ayen ncem petunuk sangat usa hem me penyalaʹ ke nuyan senganan neng pemuyan iaʹ jaʹat laʹa. Di lareʹ mencai usa hem me Allah, koʹ baʹan kelunan matai iaʹ numpak mudip, ngan petunuk usa ngan berua hem mia, ke nuyan senganan neng pemuyan iaʹ teneng.

¹⁴ Un penyalaʹ ina, abeʹ e tekep ke ngaren ikem laʹa, moʹ abeʹ kem mudip dalem katuk adet ne, bang mudip ne ikem dalem pengelesau Allah, iaʹ ia lebang naʹ mikem.

Ulaʹ peneneng

¹⁵ Kumpin baʹan ncem? Moʹ abeʹ le mudip dalem katuk adet, bang mudip dalem pengelesau Allah le ilu. Ina ukoʹ tiga le penco uyan penyalaʹ mo? Peletoʹ are senteng pekina ne.

¹⁶ Moʹ atek ke tisen te ikem, buk kem ke tai ulaʹ dulu, tunuk kem bayaʹ dau re. Atek ulaʹ lete ikem neng aheʹ iaʹ ikem tunuk ina. Buk kem tunuk neng penyalaʹ, un suaʹ a patai. Buk kem tunuk bayaʹ dau Allah, un suaʹ a pemuyan iaʹ teneng.

¹⁷ Nyuaʹ tiga saheʹ ne palaʹ Allah, naʹ pe ikem ban ulaʹ neng penyalaʹ cen naʹaʹ are, un ʹo naʹkini lepa ne ikem bayaʹ dau katuk iaʹ telit, iaʹ ikem ban pekalai are ngan tekaʹ keluʹung kimet cem.

¹⁸ Uʹo hem takau cen penyalaʹ, tai hem ulaʹ neng pemuyan iaʹ teneng.

¹⁹ Akeʹ pekina dau alaʹ kata cen ulaʹ, moʹ melai hem ngetisen ne. Moʹ cen naʹaʹ are, ikem petunuk usa hem nuyan ulaʹ neng pemuyan iaʹ jameng ngan iaʹ jaʹat, apan ncem nengangan uyan puyan iaʹ jaʹat. Un ne naʹkini ʹo, tekep kem petunuk usa hem nuyan ulaʹ iaʹ tepeng neng pemuyan iaʹ teneng, apan ncem nengangan uyan puyan iaʹ buheʹ.

²⁰ Moʹ dalau hem ban ulaʹ penyalaʹ are, tahaʹ awang ngkem neng peneneng.

²¹ Kumpin baʹan ncem, inu peniga iaʹ ikem ban alaʹ cen pemuyan ncem cen naʹaʹ, iaʹ naʹkini ban uyan ca penyaʹe tuaʹ le mikem mo? Bang patai ketai umpeng umpeng pemuyan dina are.

²² Un sepuʹo naʹkini, takau ne ikem cen penyalaʹ, tai hem ulaʹ neng Allah. Bang ngkem kidi, ina ne pemuyan ncem tai dengkep neng iaʹ buheʹ, ngan ketai umpeng ngkem, udip saheʹ kelineʹ iaʹ ngeriman.

²³ Moʹ suaʹ penyalaʹ, ina ne patai; un sepuʹo pengencai Allah, ina ne udip saheʹ kelineʹ iaʹ ngeriman, iaʹ pebulung dalem Keristus Yesus, Tuʹa le.