RUM 16 - Kenyah New Testament

Paulus badaʹ tiga saheʹ e

¹ Kanan surat ini akeʹ cuk ikem alaʹ Pibi, cenganak leto le iaʹ ban petubo Mpun diaʹ ngelan Tuhan kaʹ lepoʹ Kengkeria.

² Ikem alaʹ Pibi ne dalem ngadan Tuhan, koʹ baʹan kelayan iaʹ tekep diseʹ le alaʹ diaʹ cenganak le dalem Tuhan are, ngan mepo ho neng gayeng nge, neng inu iaʹ ia ke nebelum neng ikem. Moʹ kadoʹ dulu diaʹ ia ban mepo ne; kahum pe akeʹ kidi.

³ Akeʹ pekatu badaʹ tiga saheʹ keʹ palaʹ Periskila re dua Akila, ida dua iaʹ pebulung ngan nceʹ dalem gayeng Keristus Yesus are.

⁴ Nyahut de pesingo udip de ne dalua re pudip akeʹ dalau idai are. Akeʹ nyuaʹ tiga saheʹ keʹ palaʹ ida dua: abeʹ e bang akeʹ tuaʹ le, pekina pe singket Mpun diaʹ ngelan Tuhan diaʹ tahaʹ awang Yahudi.

⁵ Laʹa akeʹ badaʹ tiga saheʹ keʹ me Mpun diaʹ ngelan Tuhan diaʹ nai pempun dalem amin nte dua. Badaʹ tiga saheʹ keʹ me Ipinitus iaʹ akeʹ malaʹ. Ia iaʹ ading ading ban ngelan neng Keristus kaʹ tanaʹ Asia.

⁶ Badaʹ tiga saheʹ keʹ me Mariam iaʹ nyara diseʹ pegayeng me Mpun ncem.

⁷ Badaʹ tiga saheʹ keʹ me Adrunikus ngan Yunias diaʹ pemung lepoʹ Yahudi ngan nceʹ, diaʹ ban ngan nceʹ kedalem amin sepin are. Denga dau ngadan nte dua neng ahang diaʹ lawa Injil Tuhan. Ading nte ngelan Keristus neng akeʹ.

⁸ Badaʹ tiga saheʹ keʹ me Apliatus iaʹ akeʹ malaʹ dalem Tuhan.

⁹ Badaʹ tiga saheʹ keʹ me Ubanus iaʹ pemung ngan meʹ dalem gayeng Keristus, ngan me Stakis iaʹ akeʹ malaʹ.

¹⁰ Badaʹ tiga saheʹ keʹ me Apelis iaʹ luhaʹ seʹ ban ne teto bayaʹ Keristus. Badaʹ tiga saheʹ keʹ me ida diaʹ pemung amin ngan Astubulus.

¹¹ Badaʹ tiga saheʹ keʹ me Herudiun diaʹ pemung lepoʹ Yahudi ngan meʹ. Badaʹ tiga saheʹ keʹ me diaʹ amin Nakisus diaʹ cenganak le dalem Keristus kina.

¹² Badaʹ tiga saheʹ keʹ me Teripina ngan Teripusa, leto diaʹ pegayeng dalem gayeng Tuhan. Badaʹ tiga saheʹ keʹ me Persis iaʹ akeʹ malaʹ, iaʹ seriteng diseʹ pegayeng me Tuhan.

¹³ Badaʹ tiga saheʹ keʹ me Rupus iaʹ sangan kuʹun pengencai Tuhan ina, ngan ueʹ e iaʹ seleket ueʹ keʹ are.

¹⁴ Badaʹ tiga saheʹ keʹ me Asinkitus, ngan Peligun, ngan Hermis, ngan Patubas, ngan Hermas, ngan mung diaʹ cenganak pemung ngan nte kina.

¹⁵ Badaʹ tiga saheʹ keʹ me Pilugus ngan Yulia, nang Nirius, ngan cenganak ke diaʹ leto, ngan Ulimpas, ngan mung diaʹ cenganak le dalem Tuhan diaʹ pemung ngan nte kina.

¹⁶ Tiga hem nyelama ikem selepeʹ man puyan paʹoʹ koʹ baʹan iaʹ tekep diseʹ me ilu diaʹ pecenganak. Mung Mpun diaʹ ngelan Keristus pekatu badaʹ tiga saheʹ palaʹ ikem.

Katuk ngebayaʹ

¹⁷ Ahaʹ cenganak keʹ, kelapen dau heʹ cuk ikem pejagaʹ neng aheʹ iaʹ ubaʹ ke lemasi Mpun ngan ngaham pengelan le, moʹ katuk de petekeng ngan katuk iaʹ ading ikem alaʹ. Ayen tai ngejahi ida.

¹⁸ Moʹ dulu diaʹ pekina puyan nte, abeʹ de tunuk bayaʹ Keristus iaʹ Tuʹa le, bang bayaʹ asam pengubaʹ usa re tengen le ida. Ban man tiraʹ de iaʹ lanya ngan pejauʹ dulu, ida pelingu kimet kelunan diaʹ turan ngan buheʹ penawai.

¹⁹ Denga ne ban ncem tudep bayaʹ dau katuk Injil Tuhan libut ne neng ahang dulu mung. Ina iaʹ ukoʹ keʹ saheʹ tekaʹ pekimet ikem. Ubaʹ keʹ ikem ke mencam ngan tudi neng puyan iaʹ tiga, ngan turan ngan buheʹ neng puyan iaʹ jaʹat.

²⁰ Ngan Allah iaʹ puʹun udip iaʹ tadan ke nyelarai ngejutaʹ Sitan iaʹ tuʹa bali, kentaʹ lalat taket cem ʹo. Pengelesau Tuhan le Yesus un ngan ncem.

²¹ Timutius iaʹ pemung pegayeng ngan nceʹ, ia pekatu badaʹ tiga saheʹ e mikem. Pekina pe Lukius, ngan Yasun, ngan Susipatar diaʹ pemung lepoʹ Yahudi ngan meʹ, ida pekatu badaʹ tiga saheʹ de mikem lete.

²² Akeʹ iaʹ Tertius, iaʹ Paulus cuk ti surat ini, akeʹ badaʹ pe tiga saheʹ keʹ mikem dalem Tuhan.

²³ Un Gayus, ia badaʹ tiga saheʹ e mikem. Ngan te meʹ neng amin. Kidi pe diaʹ ngelan Tuhan Pempun. Un Irastus iaʹ ngkang ligit lepoʹ, ia ca badaʹ tiga saheʹ e mikem, pekina pe cen Kuatus, cenganak le. [

²⁴ Pengelesau Tuhan le Yesus Keristus un ngan ncem mung. Amin.]

Dau temameʹ Paulus pempau Allah

²⁵ Tekep le badaʹ serema peniga palaʹ Tuhan Allah. Ia iaʹ un penyukat iaʹ senteng ke nyalet ikem dalem pengelan ncem, bayaʹ dau katuk Denga Injil iaʹ akeʹ badaʹ me dulu mung. Ina katuk neng puyan Yesus Keristus, koʹ baʹan katuk iaʹ telit iaʹ linget cen naʹaʹ, iaʹ ban luhaʹ ne naʹkini.

²⁶ Luhaʹ ne katuk iaʹ telit ina naʹkini kuʹun ban Kitap Pegawa Tuhan, ngan kuʹun pengecuk Allah iaʹ ngeriman mudip, iaʹ peluhaʹ a me mung lepoʹ, apan mung kelunan sukat ke ngelan ngan tunuk bayaʹ a.

²⁷ Palaʹ Allah iaʹ bang ca le ina, iaʹ atek mpau penudi ie, palaʹ ia ne ketai serema peniga kuʹun Yesus Keristus pa pa majan. Amin.