RUM 15 - Kenyah New Testament

Mepo dulu ading

¹ Tekep ilu diaʹ pali ngelan, mepo diaʹ mengut pengelan neng diaʹ ukoʹ de babak. Abeʹ tekep le uyan pengubaʹ le tengen.

² Di lareʹ tekep le, singket usa le, uyan pengubaʹ cenganak le, apan uyan peniga mia, ngan mepo ngepali pengelan ne.

³ Moʹ abeʹ Keristus uyan pengubaʹ a tengen. Koʹ baʹan dau ue dalem Kitap: “Mung dau tiraʹ kelunan diaʹ pejaʹat ikoʹ ban nantaʹ neng akeʹ.”

⁴ Moʹ mung isiu iaʹ ban un dalem Kitap cen naʹaʹ, mung nge lepa ida nyurat man pekatuk ilu. Kitap ina iaʹ pedenaʹ ngan petangen tawai le, apan le un tebelum.

⁵ Un baʹan le, Allah iaʹ atek puʹun denaʹ tawai, ngan puyan tangen tawai, ke payo ikem uyan ca le kimet cem neng ahang ikem. Ke tai te pekina buk kem ke bayaʹ layen Keristus Yesus,

⁶ apan kuaʹ le kimet cem mung, ngan kuaʹ le tiraʹ kem mung ke pempau Allah, iaʹ Amai Tuhan le Yesus Keristus ina.

Denga Injil me lepoʹ diaʹ tahaʹ awang Yahudi

⁷ Moʹ ban pekina, tiga hem nyelama ikem selepeʹ koʹ baʹan Keristus ban nyelama alaʹ ikem are, apan ne nai luhaʹ serema peniga Allah.

⁸ Dau heʹ mikem: Keristus ban nai petubo lepoʹ Yahudi apan luhaʹ seʹ ban lan Allah kanan tuket te, ngan palup dau tuket te me tepun le are.

⁹ Pekina pelaʹa apan lepoʹ diaʹ tahaʹ awang Yahudi senteng ke pempau Allah kuʹun pengelesau ue lete. Koʹ baʹan dau Kitap kuma ha: “Ina ukoʹ ke nyuaʹ tiga saheʹ palaʹ ikoʹ neng ahang lepoʹ diaʹ tahaʹ awang Yahudi. Akeʹ ke ngentau pempau ngadan ncoʹ.”

¹⁰ Un pe dau ue laʹa: “Bangen ne mung lepoʹ tahaʹ awang Yahudi, peging ngan lepoʹ diaʹ anun Allah.”

¹¹ Un pe dau ue laʹa: “Pempau ne Tuhan, mung lepoʹ diaʹ ca. Mung le pempau ia lan lan.”

¹² Pekina pe dau Yesaya laʹa: “Ban cen mela Isai kenai luhaʹ ca usa, iaʹ ke ngkang mung lepoʹ diaʹ tahaʹ awang Yahudi. Ida ke nebelum palaʹ ia.”

¹³ Awaʹ pe Allah iaʹ puʹun tebelum ina ke nyangan mung bangen ngan udip iaʹ tadan neng ikem, moʹ kuʹun pengelan ncem neng ia. Idi tebelum ngkem ketai un pit un pit pengali ie moʹ kuʹun penyukat Berua Buheʹ ne.

Tengangan ban Paulus tempa dau nyurat

¹⁴ Ahaʹ cenganak keʹ, akeʹ ngelan ncem sangan kuʹun iaʹ tiga, ngan sangan kuʹun penisen, ngan mencam ban pekatuk ikem selepeʹ apan.

¹⁵ Naʹ pia pekina, tempa te tekaʹ ban nceʹ nyurat mikem neng palai katuk iaʹ ban akeʹ cuk ikem petawai are. Moʹ kuʹun pengelesau ue Allah ban mencai gayeng ini makeʹ, ina iaʹ ukoʹ keʹ tempa tekaʹ.

¹⁶ Akeʹ iaʹ petubo gayeng Keristus Yesus me lepoʹ diaʹ tahaʹ awang Yahudi. Koʹ baʹan iaʹ detaʹu iaʹ ngkang liwa, pekina kenai heʹ badaʹ Denga Injil Allah, apan dulu diaʹ tahaʹ awang Yahudi ketai nuyan koʹ baʹan ca liwa iaʹ akeʹ mencai me Allah. Pengencai ina sihoʹ neng pengubaʹ Allah kuʹun Berua Buheʹ iaʹ nengen ida neng iaʹ buheʹ.

¹⁷ Moʹ pengudip keʹ pebulung ngan Keristus Yesus, ina ukoʹ keʹ bangen dau badaʹ gayeng Allah.

¹⁸ Abeʹ keʹ tempa ke pisiu neng inu puyan diaʹ ca, buk are neng puyan iaʹ ban Keristus uyan kanan akeʹ, iaʹ ina ke payo dulu diaʹ tahaʹ awang Yahudi tunuk bayaʹ Allah.

¹⁹ Moʹ Keristus kanan tiraʹ keʹ, ngan pemuyan nceʹ, uyan tedanaʹ iaʹ bulen, ngan puyan nyingan kuʹun penyukat Berua Tuhan. Pekina sukung dau heʹ pedenga Denga Injil neng puyan Keristus iaʹ man pungu keniga udip, ketai heʹ cen Yerusalim pa libut abeʹ tanaʹ Ilirikum.

²⁰ Cen kena, tengangan nceʹ ubaʹ ketai pedenga Denga Injil me dulu kempi kempi iaʹ abeʹ un tisen ngadan Keristus lepe, apan nceʹ abeʹ un tai petempan medeng neng usun anun dulu.

²¹ Koʹ baʹan dau Kitap kuma ha: “Ida diaʹ abeʹ un tisen denga Keristus cen kena, ida iaʹ ke taʹan ia. Ida diaʹ abeʹ un kenahan lepe, ida iaʹ ke tisen ʹo.”

Paulus nyedep pekimet ke menoʹ lepoʹ Rum

²² Moʹ cen ina, tajen nceʹ pempeng kenai menoʹ ikem.

²³ Naʹkini nuʹo, muʹo ne gayeng ngkeʹ dalem dale ini. Un kudaʹ uman ne tekaʹ keʹ bampa ubaʹ ke nai naʹat ikem.

²⁴ Akeʹ nebelum kenai liwai ini ʹo. Mentung ngkeʹ ketai kaʹ tanaʹ Sepaniul, ubaʹ keʹ ke taʹan ikem moʹ keʹ ubaʹ ikem ke mepo matet akeʹ ketai kina. Kena ketai heʹ kina, ubaʹ keʹ ke peteto tawai heʹ ngan ncem kaʹ lepoʹ Rum ne, mele pe kudaʹ majan nceʹ ngan ncem ʹo.

²⁵ Un sepe naʹkini, ketai heʹ kaʹ Yerusalim ke pabeʹ pengencai me cenganak le dalem Tuhan kina.

²⁶ Moʹ lepoʹ Makedunia, ngan Gerika ne, ban ca le diseʹ tawai re pempun ligit man nte mepo diaʹ taru mudip neng ahang diaʹ cenganak le dalem Tuhan kaʹ Yerusalim te.

²⁷ Kenuen pia kuaʹ ayo kimet de, un utang nte neng diaʹ taru mudip kaʹ Yerusalim ne, moʹ un Mpun diaʹ ngelan Tuhan kaʹ Yerusalim ne, ida iaʹ ban pawat peniga udip berua me lepoʹ diaʹ ca. Ina ukoʹ tekep dulu diaʹ ca dina ke mepo lepoʹ Yahudi man peniga kusun tanaʹ ne.

²⁸ Buk lepa ne akeʹ pedaʹam gayeng ini, ngan naʹ mung pengencai ligit ini mida ʹo, kenai heʹ puke tugung kapen kaʹ tanaʹ Sepaniul, mentung kenai heʹ menoʹ ikem.

²⁹ Dalau kenai heʹ palaʹ ikem ʹo tisen nceʹ akeʹ ke sangan kuʹun peniga Keristus.

³⁰ Ahaʹ cenganak cenganak keʹ, moʹ kuʹun Tuhan le Yesus Keristus, ngan kuʹun pengemalaʹ iaʹ Berua Tuhan naʹ milu, ngelapen dau heʹ nyat ikem ke pepo ngan nceʹ ke tangen lemameʹ Allah makeʹ.

³¹ Lemameʹ apan nceʹ abeʹ un sihoʹ jaʹat kuʹun dulu diaʹ abeʹ un ngelan Tuhan kaʹ tanaʹ Yudia, apan gayeng ngkeʹ kaʹ Yerusalim sihoʹ neng pengubaʹ cenganak le dalem Tuhan kina.

³² Ina tuman nceʹ nai palaʹ ikem ngan tekaʹ bangen tawai, buk un pengubaʹ Allah. Idi ie un tekaʹ awang ngkeʹ penteng jengan nceʹ ngan ncem ʹo.

³³ Awaʹ pe Allah iaʹ puʹun udip iaʹ tadan ina lemuto un ngan ncem mung. Amin.